Me ren Mattu
3 Iwe, Jon Papatais a poputá le afalafal lón ewe fénúpéén lón Jutia, 2 a apasa: “Oupwe áier pwe ewe Mwúún láng a arapoto.” 3 Ren enletin, iei i ewe emén ewe soufós Aisea a fós ussun, a erá: “Méngúngúún emén a kékkéwu me lón ewe fénúpéén: ‘Oupwe ammólnatá alen Jiowa!* Áwenecharaaló alan kewe.’ ” 4 Jon a úféúf úf seni únen kamel me a peniti ngeni lukanapan efóch penit seni silin man. Anan mwéngé nifichifichimas me chénún pulech seni lein petewel. 5 Iwe, ekkewe aramas seni lón Jerusalem me unusen Jutia me chón ekkewe fénú meinisin mi nóm órun Jortan ra feiló ren, 6 me i a papataisiir* lón ewe Chénúpupu Jortan, me ra pwáraaló ar kewe tipis.
7 Lupwen a kúna chómmóng Farisi me Satusi pwe ra feito lón ena leeni, a ereniir: “Ámi néún serepenit, ié a éúréúrakemi pwe oupwe sú seni án Kot we song epwele waroto? 8 Iwe, oupwe féri ekkewe angang mi pwáári pwe oua áier. 9 Ousap ekieki lón letipemi, ‘Eperiam i semem.’ Pún úa erenikemi pwe Kot a tongeni féraatá néún Eperiam seni ekkeei faw. 10 Ewe kouk a fen nóm lepopun ewe irá. Iwe, iteiten irá ese uwaéch epwe pékúpék me kóturulong lón ekkei. 11 Nge ngang, úa papataisikemi ren konik pokiten oua áier, nge ewe emén epwe feito mwiri a watte an nemenem lap seniei, ese fich ngeniei ái úpwe pwiliti seni ipwan kewe. Ena emén epwe papataisikemi ren ewe ngún mi fel me ren ekkei. 12 A fen nóm lepéún an we séfélún áimuni ekkewe wiich seni péér. Epwe limetiéchú ewe leeni ia ewe wiich a áimu seni wasan we ie. Iwe epwe ionaalong an kewe féún wiich lón ewe leenien iseis, nge péér kewe epwe kenaaló lón ekkei ese kun.”
13 Iwe, Jises a ló seni Kalili me feiló ren Jon lón Jortan pwe epwe papatais ren. 14 Nge átena a sótun pinei ren an ereni: “Itá fen en ewe kopwe papataisiei, nge pwata ka etto rei?” 15 Jises a pélúweni: “Iei kopwele mutatá, pún a fich ngenikich ach sipwe féri mettóch meinisin mi pwúng ren ei.” Iwe, átena ese chúen pinei. 16 Mwirin án Jises papatais, i a mwittir tuutá seni lón ewe konik. Nge nengeni! láng a suukuló me a* kúna án Kot we ngún mi fel a feitiw ussun emén lisom me a feitiw wóón Jises.* 17 Nengeni! Pwal eú méngúngú seni láng a apasa: “Iei i nei Át, ewe mi áchengicheng, ewe úa pwapwa ren.”