Ngeni Chón Ipru
12 Ina minne, pokiten eú mwichemmóngun chón pwáraatá ra pwellifeilikich, ousipwe pwal pwiliti senikich meinisin met mi chounikichetiw me ekkewe tipis mi ffitikicheló me sipwe likiitú le ssá lón ewe kitir mi nóm mwach, 2 atun sia nefótófót wóón Jises, ewe Samol me Chón Ounuséchúoló ach lúkú. A likiitú wóón ewe iráán ninni* me ese ekieki ássáwan pokiten ewe pwapwa mi nóm mwan, me a móttiw lepeliefichin án Kot we leenien móótun king. 3 Iei minne, oupwe ekiekifichi ussun ewe emén mi likiitú fán án aramas tipis kapas mi ámmetek, iir kewe mi pwisin atolonger lón tipis, pwe oute achaanú me fangetá.
4 Lón ámi fiu ngeni ena tipis, ousaamwo nge tori ewe kaúkún ámi oupwe máló. 5 Me oua unusen ménúkaaló ei kapasen fén mi torikemi pokiten ámi néún: “Nei kosap aúcheangawa án Jiowa* emirit, me kosap fangetá atun a apwúnguk. 6 Pún Jiowa* a emiriti chókkewe a tongeer, ren enletin, a apwúngú* meinisin chókkewe a etiwer pwe néún.”
7 A lamot oupwe likiitú pún ina chienen emirit. A ina ussun féfférún Kot ngeni néún kewe. Pún ié naw seman esap emiriti? 8 Nge iká Kot ese emiritikemi ussun an emiriti ekkewe ekkóch, iwe ámi esap wesewesen néún, ámi néún emén. 9 Pwal och, semach kewe wóón fénúfan ra kan emiritikich me sia súfélitiir. Iwe, itá esap fen kon lap ach sipwe onómukich fán ewe Sam mi emmweni manawach ren an we manaman mi fel pwe sipwe manaw? 10 Iir ra emiritikich ren mwochomwochen fansoun alóngólóng wóón met mi múrinné me rer, nge i a emiritikich fán iten feiéchúch pwe sipwe pin ussun chék i. 11 Ewer, atun sia angei emirit sise pwapwa, nge fen letipechou. Iwe nge, iká sia etiwa ena emirit, epwe uwaani kinamwe me pwúng.
12 Iei minne, oupwe apéchékkúla ekkewe paw me pwásuk mi apwangapwang, 13 me oupwe sópweeló le fetál wenewen wóón ewe al mi pwúng pwe kinikinin pechemi we mi apwangapwang esap ruwofesen, nge epwe fen chikar. 14 Oupwe achocho le kinamwefengen me aramas meinisin me oupwe pin, pún iká emén ese pin, iwe esap tongeni kúna ewe Samol. 15 Oupwe túmúnúkemi pwe esap wor emén me leimi epwe sipenúk me lúkún án Kot we kirekiréch mi somwoló, pwe ete máár ewe waaren irá mi poison mi efisatá osukosuk me chómmóng repwe limengawoló ren. 16 Oupwe pwal túmúnú pwe esap wor emén me leimi mi féri tipisin lisowumwáál* are emén ese aúcheani ekkewe mettóch mi pin ussun chék Iso, ewe mi ekkesiwili wisan wisen mwánichi ngeni och mwéngé. 17 Oua silei pwe mwirin, a mochen álemwiri ewe feiéch nge ese chúen ketiw. Inaamwo iká a fókkun achocho fiti ssúrún mesan le siwili án seman we ekiek, nge ese chúen tongeni.
18 Pún ouse feiló ngeni och mettóch oua tongeni attapa, mi ngetenget ren ekkei, mi nóm lón kuchuchu, rochopwak, me eú mélúmél, 19 me ttikimóngun rappwa me méngúngúún án Kot kapas ngeni ekkewe aramas. Me atun ekkena aramas ra rong, ra tingormaw ngeni an esap chúen kapas ngeniir. 20 Pún ra mwo nge niwokkus ren ei allúk: “Pwal mwo nge emén man mi tétá wóón ei chuuk, epwe mamman ngeni faw.” 21 Pwal och, minne a fis a fókkun eniwokkus pwe iwe Moses a apasa: “Úa niwokkus me chechchech.” 22 Nge ámi oua feiló wóón eú Chuuk Sion me eú telinimwen ewe Kot mi manaw, ewe Jerusalem lón láng, me ngeni mwichemmóngun chónláng 23 mi mwichfengen, me ewe mwichefelin néún Kot kewe mwánichi mi mak iter lón láng, me Kot ewe Soukapwúng wóón meinisin, me manawen ekkewe chón pwúng mi manaweni manawer fán emmwenien ewe manaman mi fel me unuséchúló, 24 me Jises ewe chón affér fán iten ewe pwonen etipeeú mi fé, me i ewe a osupwatiw wóóch ewe chcha, ewe mi múrinné seni chchaan Epel.
25 Oupwe túmúnú pwe oupwe aúseling ngeni léúwen ewe emén mi kapasetiw me láng. Me lóóm ekkewe aramasen fénúfan rese aúseling ngeni met Kot a eáni éúréúr,* ra angei kapwúngúúr. Iwe, epwele fen ifa me watteen kapwúngúch iká sise aúseling ngeni léúwen ewe emén mi kapasetiw seni láng! 26 Lón ena atun léúwan a áchchecha fénúfan, nge iei an pwon: “Pwal fán eú úpwe áchchecha esap chék fénúfan nge pwal láng.” 27 Iwe, ei itiitin kapas “pwal fán eú” a pwáári pwe Kot epwe amóeló ekkewe mettóch a áchchecha, ikkena ekkewe mettóch I ese fériiretá, pún ekkewe mettóch ese áchchecha, repwe nónnóm. 28 Ina minne, pokiten sipwe angei eú Mwú esap tongeni mwékút, ousipwe sópweeló le angei feiéchún án Kot we kirekiréch mi somwoló, pún ren ena, sia tongeni eáni angang mi pin mi ketiw me ren Kot fán niwokkus me súfél. 29 Pún ach Kot a ussun eú ekkei mi unusen efeiengaw.