Ewe Áeúin Taropwe Ngeni Chón Korint
10 Ámi pwii kana, úa mochen oupwe silei pwe semelapach kewe meinisin ra fetál fán ewe kuchu me iir meinisin ra pwereló lón ewe mataw, 2 me iir meinisin ra papatais ren ewe kuchu me ewe mataw atun ra tapweló mwirin Moses, 3 me iir meinisin ra mwéngé ewe chék mwéngé Kot a awora, 4 me iir meinisin ra ún ewe chék konik Kot a awora. Fán chómmóng ra ún konik seni ewe watteen achaw mi kkan ngeniir. Ei a feito seni Kot me a liosuetá Kraist. 5 Iwe nge, Kot ese pwapwa ren chómmóng me leir, ina minne ra ninniiló me lón ewe fénúpéén.
6 Iwe, ekkeei mettóch ra eú lesen ngenikich ren ach sisap tipeni ekkewe mettóch mi efeiengaw, ussun ar ra tipeniir. 7 Are, sisap chón fel ngeni uluulun, ussun met ekkóch me leir ra féri, ussun a makketiw: “Ekkewe aramas ra móttiw pwe repwe mwéngé me ún. Mwirin, ra útá pwe repwe apwapwa.” 8 Are, sisap féri féfférún lisowumwáál,* ussun ekkóch me leir ra féri, ina minne 23,000 me leir ra ninniiló lón eú rán. 9 Are, sisap sótuni Jiowa,* ussun ekkóch me leir ra sótuni i, iwe ra máló ren ekkewe serepenit. 10 Are, sisap ngúnúngúnúngaw ussun ekkóch me leir ra ngúnúngúnúngaw, ina minne, ra máló ren ewe chón ninni. 11 Iwe, ekkeei mettóch meinisin mi fis ngeniir, ra áitikich eú lesen me ra makketiw pwe eú minen éúréúr ngenikich pwe sipwe káé seniir, oukich ekkeei sia manaw lesópwólóón ei ótóten fénúfan.
12 Ina minne, ewe emén mi ekieki pwe i mi útá, epwe túmúnú pwe esap turuló. 13 Ese wor sóssót mi torikemi pwe ekkewe chék mi tottori aramas. Nge Kot mi túppwél, me i esap mutatá ámi oupwe kúna eú sóssót mi lap seni met oupwe tongeni likiitú ngeni, nge atun ena sóssót, i epwe pwal féri efóch alen towu pwe oupwe tongeni likiitú.
14 Ina minne, ámi mi áchengicheng, oupwe sú seni fel ngeni uluulun. 15 Úa kapas, ussun nge úa kapas ngeni aramas mi mirit. Oupwe pwisin apwúngú met úa apasa. 16 Esap sia angei feiéch seni chchaan ewe Kraist ren ewe kapen kilisou, ewe sia kilisou ngeni Kot ren?* Esap sia angei feiéch seni inisin ewe Kraist ren ewe pilawa sia kinikisietiw? 17 A wor eféú pilawa, ina minne, inaamwo iká sia chómmóng, nge sia eú inis, pún kich meinisin sia mwéngé seni ena eféú pilawa.
18 Oupwe ekieki ekkewe chón Israel. Esap ar mwéngé ekkewe asor mi asoretá wóón ewe róóng a ussun itá ra mwéngé ren Kot? 19 Iwe, met ei úa apasa? Ewe uluulun me ekkewe mettóch ra eáni asor ngeni uluulun ra lamot? 20 Aapw. Nge úa apasa pwe met aramasen ekkewe ekkóch mwú ra eáni asor, ra asor ngeni ekkewe timon nge esap ngeni Kot. Me úse mochen ámi oupwe echiechi ngeni ekkewe timon. 21 Ouse tongeni ún seni án Jiowa* we kap me pwal án ekkewe timon kap, ouse tongeni mwéngé seni “án Jiowa* we cheepel” me pwal án ekkewe timon cheepel. 22 Are, ‘sia efisi án Jiowa* epwe lólówó’? Kich sise péchékkúl seni i, iká met?
23 Mettóch meinisin ra mumutá, nge esap mettóch meinisin ra álilliséch. Mettóch meinisin ra mumutá, nge esap mettóch meinisin ra apéchékkúl. 24 Emén me emén epwe sópweeló le kúkkútta esap pwisin feiéchún, nge feiéchún ekkewe ekkóch.
25 Oupwe ochooch met mi amémé lón ekkewe leenien amémé futuk, nge ousap eis och pwe mwelien letipemi ete aosukosukakemi, 26 pún “ei fénúfan me mettóch meinisin lón, án Jiowa.”* 27 Iká emén esap chón lúkú a etiwakemi me oua mochen eti, oupwe mwéngé met a isettiw mwemi, ousap eis och pokiten mwelien letipemi. 28 Nge iká emén a erenikemi, “Ei futuk a fen piin asor ngeni ekkewe uluulun,” ousap ochooch pwe oute áchepeteki ewe emén mi erenikemi ena, me esap wor mwelien letip epwe osukosuk. 29 Úse kapas ussun mwelien letipemi, nge mwelien letipen ewe emén. Pún pwata ái ngaseló epwe kapwúng ren mwelien letipen emén? 30 Ikáámwo úa mwéngé me kilisou ngeni Kot ren, itá úpwe féri ena iká epwe efisi án ekkewe ekkóch repwe esiitaei?
31 Ina minne, iká oua mwéngé are ún are féri och mettóch, oupwe féri mettóch meinisin pwe Kot epwe ling ren. 32 Oupwe túmúnúkemi pwe ousap eú minen chepetek ngeni ekkewe chón Jus me pwal ngeni ekkewe chón Krik me ngeni ewe mwichefelin Kot, 33 ussun chék ngang úa achocho le apwapwaai aramas meinisin lón mettóch meinisin ren ái úse kúkkútta pwisin feiéchúi, nge feiéchún chómmóng ren ar repwe kúna manaw.