Ngeni Chón Ipru
6 Ina minne, pokiten iei sia fen silei ekkewe asukul sia akkomw káé ussun ewe Kraist, ousipwe ásimawóló, sisap chék ekkenniwili ekkewe afalafalen lepopun, choweán áier seni féffér mi lamotongaw me lúkú Kot, 2 ekkewe asukul ussun papatais me ewe angangen iseis paw wóón mékúren aramas, manawsefálin ekkewe mi máló me ewe kapwúng esemuch. 3 Ina met sipwe féri iká Kot epwe mutatá.
4 Pún chókkewe ra fen angei ewe saram, angei ewe liffang seni láng ese kamé, me angei ewe ngún mi fel 5 me etiwa án Kot kapas mi múrinné, me kúna ekkewe feiéch* repwe fis lón mwachkkan,* 6 nge ra kul seni ewe lúkú, ese fókkun tufich án emén epwe eliwinisefáliir ar repwe áier pokiten ra chúfélúsefálietá ewe Néún Kot wóón ewe iráán ninni me ásáwa mwen mesen aramas. 7 Púngútiwen rán fán chómmóng, ina eú feiéch seni Kot ngeni ewe pwúl ren an únúmi me ámáári irá mi múrinné fán iten chókkewe mi atakeni. 8 Nge iká a ámáári irá félúfél me pétéwélingaw, esap ketiw, me fetál ngeni epwele anúmamaw, me lesópwólóón epwe kekiló.
9 Nge ren ámi, ekkewe mi áchengicheng, inaamwo iká a iei ussun napanapen ám kapas, nge áúa lúkúlúkú mettóch mi múrinné, me mettóch mi riri ngeni amanaw. 10 Pún Kot mi pwúng, iwe esap ménúkaaló ámi angang me ewe tong oua pwáári fán ásengesin itan ren ámi angang me sópweeló le angang ngeni ekkewe chón pin. 11 Nge ám áúa mochen pwe emén me emén leimi oupwe pwáári ena pwal chék esin tinikken pwe epwe núkúchar ámi ápilúkúlúk tori lesópwólóón, 12 me ousap chipwang, nge oupwe áppirú chókkewe mi álemwiri ekkewe pwon ren ar lúkú me mosonottam.
13 Pún lupwen Kot a pwon ngeni Eperiam, ese wor emén mi tekia seni I an epwe ékképélú, ina popun a ékképélú pwisin i, 14 me apasa: “Ngang úpwe fókkun efeiéchuk me úpwe fókkun achómmóngaaló mwirimwirum.” 15 Iwe, mwirin án Eperiam mosonottam, a angei ena pwon. 16 Pún aramas ra ékképélú emén mi tekia seniir, me ar ékképél a aúkatiw ánini meinisin pún ina alúkúlúkún minne ra apasa. 17 Pwal ina ussun ren Kot, atun a filaatá an epwe pwáriéchú ngeni chókkewe repwe álemwiri ewe pwon pwe minne a tipeni esap fókkun ekkesiwil, iwe a anúkúchara ren eú ékképél. 18 Ren án Kot pwon me an ékképél, kich ekkewe mi eáni I leenien op ousipwe akkamwéchú ach ápilúkúlúk pokiten sia angei kapasen apéchékkúl. I ese tongeni kapas chofona pokiten an pwon me an ékképél resap fókkun siwil. 19 Ei ápilúkúlúk mi nóm rech ussun efóch angké fán iten manawach, a núkúchar me alúkúlúk. Ena ápilúkúlúk a emmwenikichelong lúkúsékúrún ewe kaaten mi refifesenni kinikinin lón ewe imwenfel, 20 ikewe Jises a fen akkomwolong ie fán ásengesich, ewe a wiliiti souasor mi lapalap ussun chék Melkisetek tori feilfeiló chék.