Eú Pwáraatá Ngeni Jon
20 Mwirin úa kúna emén chónláng a feitiw seni láng fán ewe kiien apis me efóch sein mi éúmmóng a nóm lepéún. 2 A turufi ewe trakon, ewe serepenitin lóóm, i ewe Tefil me Setan, me a fééti ren úkúúkún 1,000 ier. 3 A oturaalong lón ewe apis me éppúngaaló me a pwauni wóón pwe esap chúen otupu ekkewe aramas tori muchúlóón ekkewe 1,000 ier. Mwirin ena, epwe kepichiló ren ekis chék fansoun.
4 Iwe, úa kúna ekkewe leenien móótun king me chókkewe mi móót wóór Kot a ngeniir ar nemenem le féri kapwúng. Úa kúna chchaan chókkewe mi ninniiló* pokiten ra pwáraatá ussun Jises me fóffós ussun Kot, iir chókkewe rese fel ngeni ewe manmwacho are uluulun we me rese angei ewe esissil wóón chamwer me wóón péúr. Iwe, repwe manaw me eti Kraist le nemenem lón ewe wis king ren úkúúkún 1,000 ier. 5 Ina ewe áeúin manawsefál. (Ekkewe lusun mi máló resap manaw tori an epwe muchúló ekkewe 1,000 ier.) 6 Ra pwapwa me pin chókkewe mi eáni ewe áeúin manawsefál. Ese wor án ewe oruuen máló nemenem wóór, nge repwe néún Kot souasor me pwal néún ewe Kraist, me repwe eti le nemenem lón ewe wis king ren úkúúkún 1,000 ier.
7 Iwe, mwirin chék án ekkewe 1,000 ier repwe muchúló, Setan epwe musowu seni an fétek, 8 iwe epwe towu pwe epwe otupu chón ekkewe mwú mi nóm lón ekkewe rúáánú pwokukuun fénúfan, Kok me Makok, pwe epwe ochufengeniir pwe repwe maun. Úkúúkún chóchóór a ussun ppien leset. 9 Iwe, ra parasfetál wóón unusen fénúfan me ra rongeeló ewe leeni ia ekkewe chón pin ra nóm ie me ewe telinimw Kot a echeni. Nge ekkei a feitiw seni láng me keniireló. 10 Iwe, ewe Tefil mi otupureló a kóturulong lón ewe nómun ekkei me primiston, ikewe ewe manmwacho me ewe soufós chofona ra nóm ie. Iwe, repwe kúna riáfféú* lerán me lepwin tori feilfeiló chék.
11 Mwirin, úa kúna eú leenien móótun king mi watte o pwechepwech me ewe Emén mi móót wóón. Nge fénúfan me láng ra sú me mwan, iwe ese chúen wor leeni fán iter. 12 Úa pwal kúna ekkewe mi máló, ekkewe mi kis me ekkewe mi lap, ra útá mwen ewe leenien móótun king, me ekkewe puk* ra suukuló. Mwirin pwal eú puk a suukuló, ina ewe puken manaw. Iwe, ekkewe mi máló ra kapwúng me ren met mi mak lón ekkena puk alóngólóng wóón féfférúr. 13 Iwe, ewe mataw a fangewu ekkewe mi máló mi nónnóm lón, me máló me Peiás* ra fangewu ekkewe mi máló mi nónnóm lóór, iwe emén me emén iir ra angei kapwúngúúr alóngólóng wóón féfférúr kewe. 14 Iwe, máló me Peiás* ra kóturulong lón ewe nómun ekkei. Weween ei nómun ekkei, iei ewe oruuen máló. 15 Pwal och, ié ese makkelong itan lón ewe puken manaw epwe kóturulong lón ewe nómun ekkei.