Eú Pwáraatá Ngeni Jon
19 Mwirin ei, úa rong eú méngúngú mi léúwommóng seni láng ussun méngúngúún eú mwiich mi fókkun chóchó. Ra apasa: “Mwareiti Jiowa!* Amanaw me ling me manaman ra nónnóm ren ach Kot, 2 pún an kapwúng ra enlet o pwúng. A fen apwúngú ewe fin lisowu mi lap, ewe mi elimengawa fénúfan ren an féfférún lisowumwáál,* me a ngeni neminna chappen an nieló néún kewe slave.” 3 Ra pwal mwittir apasa fán oruuan: “Mwareiti Jiowa!* Me ewe étúét seni neminna a étútá feilfeiló chék.”
4 Iwe, ekkewe 24 souakkomw* me ekkewe fémén ménúmanaw ra chapetiw me fel ngeni Kot, ewe mi móót wóón ewe leenien móótun king me apasa: “Amen! Mwareiti Jiowa!”*
5 Pwal och, eú méngúngú seni wóón ewe leenien móótun king a apasa: “Oupwe mwareiti ach Kot, ámi meinisin néún chón angang, ekkewe mi niwokkusiti i, ekkewe mi kis me ekkewe mi lap.”
6 Me úa rong eú méngúngú mi ussun méngúngúún eú mwiich mi fókkun chóchó me ussun úngúúngún eú watteen konik me ussun púngúmmóngun chopulap. Ra apasa: “Mwareiti Jiowa,* pún Jiowa* ach Kot, ewe mi Unusen Manaman, a poputá le nemenem lón ewe wis king! 7 Ousipwe pwapwa me pwal chengel chapur me elingaaló i, pún a tori fansoun apwúpwúlúún ewe Laam, nge pwúlúwan we a mmólnetá. 8 Ewer, a mumu ngeni neminna an epwe úféúf úf mi saramaram, liméch, me mangaak mi múrinné, pún ewe mangaak mi múrinné a liosuetá án ekkewe chón pin féffér mi pwúng.”
9 Iwe, a ereniei: “Kopwe makkeetiw ei: Ra pwapwa chókkewe mi ketiw ngeni kametipen apwúpwúlúún ewe Laam.” A pwal ereniei: “Ikkeei ekkewe kapas mi enlet seni Kot.” 10 Iwe úa chapetiw órun pechen pwe úpwe fel ngeni. Nge i a ereniei: “Kopwe túmúnuk! Kosap féri ena! Ngang emén chón angang, ussun chék en me pwiium kewe mi féri ewe angangen pwáraatá ussun Jises. Kopwe fel ngeni Kot! Pún ewe angangen pwáraatá ussun Jises, ina ewe popun a kawor oesini.”
11 Úa kúna láng pwe a suukuló, me a wor emén oris mi pwech. Nge ewe mi móót wóón a iteni Túppwél me Enlet, me a eáni apwúng me maun fán pwúng. 12 Mesan kewe ra ussun pulopulen ekkei, me a wor chómmóng mwárámwár wóón mékúran. A wor eú it mi makketiw wóón nge ese wor emén a silei me lúkún pwisin i, 13 me a úféúf eché úféúfen lúkún mi wor limengawen chcha wóón, me iei ewe it a iteni, Ewe Kapasen Kot. 14 Pwal och, ekkewe mwichen soufiun láng ra tapweló mwirin wóón waar oris mi pwech, me ra úféúf úf mi pwech, liméch, me mangaak mi múrinné. 15 Me efóch ketilas mi kken me ttam a itiwu me lón awan pwe epwe nieló chón ekkewe mwú, me i epwe nemeniir fán efóch wok mechá. Pwal och, epwe puratiw ewe leenien kata féún kreip án ewe Kot mi Unusen Manaman, ewe mi wewe ngeni án Kot song. 16 Wóón úfan we úféúfen lúkún, me wóón lewoon pechen, a makketiw ei it wóón, Kingen ekkewe king me Samolun ekkewe samol.
17 Úa pwal kúna emén chónláng mi útá lón ewe akkar, me a kékké fán léúwommóng me apasa ngeni meinisin ekkewe machchang mi ákkáás fán láng: “Oupwe feito me mwichfengen fán iten án Kot we kametip mi lapalap, 18 pwe oupwe ocheei futuken ekkewe king me futuken ekkewe meilapen soufiu me futuken ekkewe aramas mi péchékkúl me futuken ekkewe oris me chókkewe mi móót wóór, me futuken meinisin aramas, ekkewe mi ngas me ekkewe slave, ekkewe mi kis me ekkewe mi lap.”
19 Iwe, úa kúna ewe manmwacho me ekkewe kingen fénúfan me ar kewe mwichen soufiu ra kochufengen pwe repwe maun ngeni ewe emén mi móót wóón ewe oris me an we mwichen soufiu. 20 Iwe, ewe mi móót wóón ewe oris a liapeni ewe manmwacho me ewe soufós chofona mi féri ekkewe esissil mwen ewe manmwacho pwe epwe otupu chókkewe mi eáni esissillen ewe manmwacho me chókkewe mi fel ngeni uluulun we. Iir me rúúemén ra kóturmanawolong lón ewe nómun ekkei mi ngetenget ren primiston. 21 Nge ekkewe lusun ra ninniiló ren ewe ketilas mi ttam mi itiwu me lón awen ewe mi móót wóón ewe oris. Iwe, meinisin ekkewe machchang ra métúló ren futuker kewe.