Me ren Jon
19 Iwe, Pailat a angei Jises me awata i. 2 Me ekkewe soufiu ra piti epa mwárámwár seni irá félúfél me watá wóón mékúran me éúféúfa ngeni eché úf mi forket, 3 me ra kan soun feiliiti i me apasa: “Rán allim, Kingen ekkewe chón Jus!” Ra kan pwal pésapei. 4 Pailat a liwinsefáliwu lúkún me a ereniir: “Nengeni! Úa uwawu átei remi pwe oupwe silei pwe úse kúna och mwáállin.” 5 Iwe, Jises a towu, a mwárámwár epa mwárámwár seni irá félúfél me úféúf eché úf mi forket. Me Pailat a apasa ngeniir: “Nengeni! Ewe mwán!” 6 Iwe nge, atun ekkewe souasor mi lap me ekkewe chón mmas ra kúna i ra púchérútá: “Epwe ninniiló wóón ewe irá! Epwe ninniiló wóón ewe irá!” Pailat a ereniir: “Oupwe pwisin angei átei me nieló i,* pún ngang úse kúna och mwáállin.” 7 Ekkewe chón Jus ra pélúweni: “Mi wor ám we allúk, iwe me ren ewe allúk i epwe ninniiló pokiten a pwisin féri pwe i néún Kot.”
8 Atun Pailat a rong minne ra apasa, a lapóló an niwokkus, 9 me a liwinsefálilong lón ewe imwen governor me ereni Jises: “En seni ia?” Nge Jises ese pélúweni i. 10 Iwe, Pailat a ereni: “Kese mochen kapas ngeniei? Kese silei pwe a wor ái pwúúng le omusakoló me a wor ái pwúúng le nikoló?”* 11 Jises a pélúweni i: “Esap fókkun wor óm pwúúng wóói me lúkún chék iká a mumu ngonuk seni asan. Iei popun ewe aramas mi atolongaei lepoum a watte tipisin.”
12 Iei minne, Pailat a achocho le kútta alen an epwe omusawu i, nge ekkewe chón Jus ra púchérútá: “Iká kopwe omusawu ei mwán esap en emén chiechien Sisar. Ié mi pwisin féri an epwe emén king a ú ngeni Sisar.” 13 Iwe, mwirin án Pailat rong ekkeei kapas, a uwawu Jises lúkún me a móttiw wóón eú leenien móótun apwúng lón ewe leeni itan Asóssón Ngeni Faw, nge lón kapasen Ipru Kapata. 14 Iei ewe ránin Ammólnatá fán iten ewe Pasofer. Ina epwe ewe awonuen kulók.* Me a ereni ekkewe chón Jus: “Nengeni! Iei i néúmi we king!” 15 Iwe nge, ra púchérútá: “Kopwe nieló! Kopwe nieló! Epwe ninniiló wóón ewe irá!” Pailat a ereniir: “Úpwe nieló néúmi ei king?” Ekkewe souasor mi lap ra pélúweni: “Ese wor néúm king pwe Sisar chék.” 16 Mwirin, a atolonga i lepéúr pwe epwe ninniiló wóón ewe irá.
Iwe ra uwealó Jises. 17 A pwisin mwárei ewe iráán ninni,* a feiló ngeni ewe leeni mi iteni Péénsékún Mékúr, weween Kolkota lón kapasen Ipru. 18 Me ikena ie ra chúfélúetá Jises wóón ewe irá. I a nóm lukanapen pwal rúúemén mwán, emén peliefichin me emén pelieméngún. 19 Pailat a pwal makkeei eú itelap me pacheetá wóón ewe iráán ninni.* A mak: “Jises re Nasaret ewe Kingen chón Jus.” 20 Chómmóng me lein ekkewe chón Jus ra állea ei itelap pokiten ewe leeni ia Jises a chúfélútá ie wóón ewe irá a kkan ngeni ewe telinimw, me a mak lón kapasen Ipru, Latin, me Krik. 21 Iwe nge, ekkewe souasor mi lap me lein ekkewe chón Jus ra ereni Pailat: “Kosap makkeei, ‘Ewe Kingen chón Jus,’ nge kopwe fen makkeei pwe i a apasa, ‘Ngang Kingen chón Jus.’ ” 22 Pailat a pélúweni: “Met úa makkeetiw, úa makkeetiw.”
23 Iwe, lupwen ekkewe soufiu ra chúfélúetá Jises wóón ewe irá, ra angei úfan we úféúfen lúkún me kinietiw lón rúáánú kinikin, ákkáeú ngeni emén soufiu, me ra pwal angei ewe úféúfen lón. Nge ewe úféúfen lón ese wor lekochuun, mi chék teunus seni asan ngeni fan. 24 Iwe, ra eráfengen lefiler: “Sisap kamwetiw nge sipwe úttút wóón pwe epwe pwá ié epwe angei.” A fis ei pwe epwe pwénúetá ewe taropwe mi pin: “Ra eineti lefiler úfei kewe úféúfen lúkún, me úttút wóón úfei we.” Ekkewe soufiu ra wesewesen féri ekkeei mettóch.
25 Iwe nge, únúkkún ewe iráán ninni* Jises a nóm wóón, ra úkkúútá inan we me pwiin inan we, pwal Meri pwúlúwen Klopas me Meri Maktalin. 26 Iwe, lupwen Jises a kúna inan we me ewe chón káé i a kon tongei ra úkkúútá kkan ngeni, i a ereni inan we: “Fefin, nengeni! Noum na!” 27 Mwirin a ereni ewe chón káé: “Nengeni! Inom na!” Iwe, seni ena fansoun ewe chón káé a uwei neminna ngeni pwisin imwan we pwe epwe nónnóm ie.
28 Mwirin ei, Jises a silei pwe a féri meinisin met Seman we a mochen. Iwe, a apasa: “Úa kaka.” A apasa ei pwe epwe pwénúetá ewe taropwe mi pin. 29 A wor eú sepi ikena ie mi ur ren wain mi mwóón. Iwe ra pacheetá wóón efóch irá* eú ammat mi ur ren ewe wain mi mwóón me chúraatá ngeni awan. 30 Lupwen Jises a neni ewe wain mi mwóón, a apasa: “A wesiló!” me a rootiw, a máló.
31 Pokiten iei ewe ránin Ammólnatá, iwe ren án ekkewe inis resap nóm wóón ekkewe iráán ninni lón ewe Sapat (pún ina eú ránin Sapat mi lap), ekkewe chón Jus ra tingorei Pailat an epwe kupukup pecher kewe me ekkewe inis repwe ettititiw. 32 Iwe, ekkewe soufiu ra feito me kupi pechen ekkewe rúúemén mwán mi eitiwetá ren Jises. 33 Nge lupwen ra tori Jises ra kúna pwe a fen máló, ina minne, rese kupi pechen kewe. 34 Nge emén me lein ekkewe soufiu a pwosu ngeni lepekin wokun we siles, me mwittir chék a kusuwu chcha me konik. 35 Me ewe emén mi kúna ei a pwáraatá, me a enlet an pwáraatá, me a silei pwe minne a apasa mi enlet, pwe ámi oupwe pwal lúkú. 36 Ren enletin, a fis ekkeei mettóch pwe epwe pwénúetá ewe taropwe mi pin: “Esap wor efóch chúún epwe kup.”* 37 Pwal eú taropwe mi pin, a apasa: “Repwe katol ewe emén ra pwosu.”
38 Iwe, mwirin ekkeei mettóch, Josef seni Arimatia emén néún Jises chón káé nge lemonomon chék pokiten a niwokkusiti ekkewe chón Jus, a tingorei Pailat iká a tongeni angei inisin Jises we, me Pailat a mut ngeni. Iwe a feito me uwealó ewe inis. 39 Ewe mwán Nikotemus, ewe a feiló ren i lepwin me mwan, a pwal feito nge a uwei mér* me aloe* mi nofitfengen, úkúúkún choun, ina epwe ipúkú paun.* 40 Iwe, ra angei inisin Jises we me túkúmaaló fengen me ewe lémmis lón mangaak mi fókkun múrinné, me ren éérenien chón Jus fán iten peiás. 41 Iwe, a wor eú tánipi lón ena leeni ikena a ninniiló ie wóón ewe irá. Nge lón ena tánipi a wor eú mineféén peiás ese mwo piin áeá. 42 Pokiten ina ewe ránin Ammólnatá án chón Jus me mi chék kkanoto ewe peiás, iwe ra akoonaaló inisin Jises we ikena ie.