Me ren Mark
13 Atun an epwele ló seni ewe imwenfel, emén me lein néún kewe chón káé a ereni: “Sense, nengeni! a ifa me amwararen ekkewe faw me unusen ewe imwenfel!” 2 Iwe nge, Jises a ereni: “Pwata ka nennengeni ena imwenfel mi amwarar? Esap fókkun chúen wor eféú faw ikeei ie epwe nóm wóón eféú faw nge esap toropasetiw.”
3 Atun Jises a mómmóót wóón ewe Chukun Olif ikewe mi sápe ngeni ewe imwenfel, Piter, Jemes, Jon, me Andru chék ra fiti me ra eisini: 4 “Erenikem ineet ekkeei mettóch repwe fis, me met esissil epwe pwáári pwe ekkeei mettóch meinisin epwele tori sópwólóór?” 5 Iwe, Jises a poputá le ereniir: “Oupwe túmúnú pwe esap wor emén epwe otupukemi. 6 Chómmóng repwe feito fán ásengesin itei, me apasa, ‘Ngang i,’ me epwe otupwaaló chómmóng. 7 Pwal och, lupwen oupwe rong akúrangen maun me pwóróusen maun ousap niwokkus. Ekkeei mettóch repwe fókkun fis, nge esap mwo tori ewe sópwólóón.
8 “Pún fénú me fénú repwe maunfengen lefiler, me mwú epwe ú ngeni mwú, epwe wor chechchechin fénú ekis meinisin, epwe pwal wor nafangawen mwéngé. Ekkeei mettóch, ra pwáári pwe a poputá ewe riáfféú.*
9 “Nge ren ámi, oupwe túmúnúkemi. Aramas repwe uweikemiilong lón kapwúng, me oupwe kawet me lón ekkewe sinakok me oupwe útá mwen ekkewe governor me ekkewe king fán ásengesi, pwe epwe eú minen pwáraatá ngeniir. 10 Pwal och, ewe kapas allim epwe akkomw afalafalfeil ngeni mwú meinisin. 11 Iwe, lupwen repwe angeikemi pwe repwe uweikemiiló ngeni kapwúng, ousap aúreki me mwan met oupwe apasa, nge met mi kawor ngenikemi lón ena kulók, oupwe apasa, pún esap ámi ewe oua fóffós nge ewe ngún mi fel. 12 Pwal och, pwipwi repwe uwealó pwiir ngeni máló, nge emén sam néún we, me ekkewe naw repwe ú ngeni sam me in me repwe uweiirelong pwe repwe ninniiló. 13 Me aramas meinisin repwe oputakemi fán ásengesin itei. Nge ewe emén mi likiitú* tori sópwólóón epwe kúna manaw.
14 “Iwe nge, lupwen oupwe kúna ewe mettóch mi ánnioput mi atai mettóch meinisin mi útá ikewe úrúrún esap nóm ie (a lamot ewe chón állea epwe állea fán mirit), iwe chókkewe mi nóm Jutia repwele poputá le sútá wóón ekkewe chuuk. 15 Emén aramas mi nóm asen ewe imw, esap tétiw are tolong an epwe angei och mettóch me lón imwan, 16 me ewe aramas mi nóm lón tánipi esap liwinsefál an epwe angei úfan úféúfen lúkún. 17 Riáfféú ngeni ekkewe fefin mi pwopwo me chókkewe mi oupwu ménúkol lón ekkena rán! 18 Oupwe ikkiótek pwe esap fis lón fansoun affééú, 19 pún lón ekkena rán epwe ránin riáfféú, ussun an ese mwo fis seni lepoputáán fénúfan, ewe Kot a féraatá, tori ena fansoun, me esap pwal fissefál. 20 Ren enletin, iká Jiowa* esap amwochomwochaaló ekkewe rán, esap wor emén aramas epwe kúna manaw. Nge fán iten ekkewe mi filitá, chókkewe i a filaatá, i a amwochomwochaaló ekkewe rán.
21 “Iwe mwirin, iká emén a erenikemi, ‘Katol! Ewe Kraist a nóm ikeei,’ are, ‘Katol! A nóm ikenan,’ ousap lúkú. 22 Pún Kraist chofona me soufós chofona repwe pwáátá me repwe féri esissil me manaman ar repwe otupwaaló ekkewe mi kefilitá, iká mi tufich. 23 Ina minne, ámi oupwe mammasa. Úa fen erenikemi ekkeei mettóch meinisin me mwan.
24 “Nge lón ekkena rán, mwirin ena riáfféú, ewe akkar epwe rocholó, me ewe maram esap ttin, 25 me ekkewe fúú repwe turutiw seni láng, me ekkewe mettóch mi nóm fán láng repwe chechchech. 26 Iwe mwirin, repwe kúna án ewe Néún aramas feffeito lón kuchu fán an manaman mi lapalap me ling. 27 Me i epwe tiinaawu ekkewe chónláng me repwe ionfengeni néún kewe mi kefilitá seni ekkewe rúáánú ásepwál, seni ewe epek lesopwun fénúfan tori ewe epek lesopwun láng.
28 “Iei oupwe káé seni ei kapas áwewe ussun ewe irá fiik: Atun chék palan kewe ra kerán pwúk me chéén kewe ra fasar, iwe oua silei pwe a arapoto fansoun pwichikkar. 29 Iei ussun pwal ámi, atun oua kúna ekkeei mettóch ra fiffis, oupwe silei pwe i a arapoto ppen ekkewe asam. 30 Enlet úa erenikemi pwe ei táppin aramas resap fókkun máló tori án meinisin ekkeei mettóch repwe fis. 31 Láng me fénúfan repwe móróló, nge ái kewe kapas resap fókkun móróló.
32 “Ren ena rán are ewe kulók ese wor emén a silei, esap pwal ekkewe chónláng lón láng esap pwal ewe Naw, nge ewe chék Sam a silei. 33 Oupwe nennengeni, oupwe mammasa, pún ouse silei ineet ewe fansoun mi kefililó. 34 A ussun emén mwán mi sái towaw mi likitaaló imwan we me ngeni néún kewe slave ewe nemenem, a ewisa ngeni emén me emén an angang, me allúkú ngeni ewe chón mmasa ewe asam an epwe mammasa. 35 Iei minne, oupwe mammasa, pún ouse silei ineet ewe mastaan imw epwe waroto, iká lekuniolóroch are lukenipwin are mwen tétáán akkar* are lesossorusich, 36 pún atun a weiweitá warotoon, esap kúnakemi lón ámi méúr. 37 Nge met úa erenikemi, úa ereni meinisin: Oupwe mammasa.”