Néún Piter Áeúin Taropwe
2 Iei minne oupwe péútaaló senikemi meinisin minne mi ngaw, otuputup, likótuputup, lólówó, me meinisin kapasen turunufas. 2 Oupwe ussun ekkewe upwufé mi mwoneiti chénún oupun iner, oupwe mwoneiti ewe kapasen Kot mi enlet, ewe mi ussun milik ese nofit ngeni och, pwe oupwe mámmááritá ren me kúna manaw, 3 pún oua fen kúna* pwe ewe Samol a kirekiréch.
4 Aramas ra péútaaló ewe faw mi manaw, nge a filitá o aúchea me ren Kot. Lupwen oua feito ren, 5 ámi oua ussun ekkewe faw mi manaw. Oua ussun eú imw mi kaútá ren án Kot we ngún mi fel pwe oupwe souasor mi pin, pwe oupwe eáni asor mi tipeeú ngeni án Kot we ngún mi fel me a ketiw me ren. Jises Kraist a féri ei fán itemi. 6 Pún ewe Taropwe mi Pin a apasa: “Nengeni! Úa isettiw lón Sion eféú faw mi kefilitá, eféú féún lóngólóngun lepwokuku mi aúchea, me esap fókkun wor emén mi lúkú epwe lichippúng.”
7 Ina minne, i a aúchea me remi pokiten ámi chón lúkú, nge esap ina ussun me ren chókkewe rese lúkú. Ewe Taropwe mi Pin a apasa, “ewe faw ekkewe chón kaú ra péútaaló, iei a wiliiti eféú féún lepwokuku mi fókkun aúchea,” 8 me “eféú féún chepetek me eú achaw mi asonga aramas.” Iir ra chepetek pokiten ra álleasolapa kapasen Kot. Iei met sópwólóór mi ewitiwit ngeniir. 9 Nge ámi “eú einang mi fil, ámi eú mwichen souasor mi wiseni ewe wis king, chón eú mwú mi pin, néún Kot aramas mi fil pwe oupwe esilefeili ekis meinisin ussun kirekiréchún Kot,” ewe mi kérikemiiwu seni lón rochopwak ngeni an saram mi ling. 10 Pún me mwan esap ámi néún Kot aramas, nge iei oua néún aramas. Me mwan Kot ese pwáár ngenikemi úméúméch, nge iei a pwáár ngenikemi úméúméch.
11 Ámi mi áchengicheng, úa pesekemi ussun ámi chón ekis me choisá, oupwe sópweeló le atowawaaló senikemi ekkewe mochenian futuk mi fiffiu ngenikemi. 12 Oupwe sópweeló le féri féffér múrinné lein aramasen ekkewe ekkóch mwú, pún atun repwe etipisikemi pwe oua féri féffér mi ngaw, iir repwe chón pwáraatá ussun ámi féffér múrinné, iwe repwe elingaaló Kot lón an we fansoun etittin.
13 Fán ásengesin ewe Samol, oupwe onómukemi fán nemenien meinisin ekkewe nemenem férien aramas. Ese lifilifil iká emén king mi tekia sonuk 14 are emén governor mi tiitiito me ren pwe epwe apwúngú ekkewe chón féfféringaw nge mwareiti ekkewe chón féfféréch. 15 Pún iei letipen Kot, pwe ren ámi féffér múrinné oupwe afanafanelóói án ekkewe aramas rese mirit kapas mi umwes. 16 Oupwe aramas mi ngas. Ousap áeá ámi ngas le pwélúoló* ámi féffér mi ngaw, nge oupwe áeá lón ámi angang ngeni Kot. 17 Oupwe asamolu sókkun aramas meinisin, oupwe tongei pwiimi kewe chón lúkú* meinisin. Oupwe niwokkusiti Kot, me asamolu ewe king.
18 Ekkewe chón angang repwe onómuur fán nemenien néúr kewe masta ren unusen ar mennin, esap chék ngeni ekkewe mi múrinné me mirit, nge pwal ngeni ekkewe mi weires ar repwe apwapwaar. 19 Kot a pwapwa ren emén mi achocho le eáni eú mwelien letip mi liméch mwen mesan, likiitú fán weires, me kúna riáfféú inaamwo iká ese féri minne mi mwáál. 20 Pún epwe met lamoten ámi likiitú atun oua kawet ren ámi tipis? Nge iká oua likiitú fán riáfféú pokiten ámi féri minne mi múrinné, iwe, Kot a pwapwa ren.
21 Ren enletin, ina popun oua ké pwe pwal mwo nge Kraist a kúna riáfféú fán itemi, a likit ngenikemi eú leenien áppirú pwe oupwe tapweló mwirin lón ipwan fán túppwél. 22 I ese féri och tipis, ese pwal apasa och kapas mi otuputup. 23 Lupwen aramas ra esiita, i ese pwal esiiter. Lupwen a riáfféú, ese eniwa chókkewe mi eriáfféwú, nge a onómu pwisin i fán ewe Emén mi eáni kapwúng fán pwúng. 24 I a pwisin uwei ach kewe tipis wóón inisin lupwen a chúfélútá wóón ewe iráán ninni pwe sipwe ngaseló seni ach kewe tipis me manaw pwe sipwe féri minne mi pwúng. Iwe “ren kinásan kewe oua chikar.” 25 Pún oua ussun siip mi mwálecheló, nge iei oua liwiniti ewe chón mmasen siip me ewe chón túmúnú manawemi.