Ewe Áeúin Taropwe Ngeni Chón Korint

8 Iwe, ussun mwéngé mi asor ngeni uluulun, sia silei pwe kich meinisin a wor ach sile. Sile a tongeni efisi lamalamtekia, nge tong a aúfichietá emén. 2 Iká emén a ekieki pwe a wor an sile wóón och mettóch, ren enletin i esaamwo silei meinisin ussun ena mettóch. 3 Nge iká emén a tongei Kot, iwe Kot a silei ena emén.

4 Iwe, ussun án aramas mwéngé ekkewe mwéngé mi asor ngeni uluulun, kich sia silei pwe ese wor lamoten emén uluulun wóón fénúfan me mi wor emén chék Kot. 5 Aramas ra apasa pwe a wor chómmóng sókkopaten kot, lón láng me pwal wóón fénúfan. Ina minne, me ren aramas a wor chómmóng “kot” me “samol,” 6 nge me rech a wor emén chék Kot, ewe Sam, mettóch meinisin ra pop seni i me kich sia manaw fán itan. Me a wor emén Samol, Jises Kraist, ewe ren i mettóch meinisin ra ffér me kich sia manaw ren i.

7 Iwe nge, esap meinisin a wor rer ei sile. Nge ekkóch, pokiten me lóóm ra fel ngeni uluulun, iwe lupwen ra mwéngé ekkewe mwéngé mi asor ngeni uluulun ra ekieki pwe ra fel ngeni uluulun, me pokiten mi apwangapwang mwelien letiper, iwe a aosukosuker. 8 Nge mwéngé, esap akkanakich ngeni Kot. Iká sise mwéngé, esap péút senikich och mettóch, me iká sia mwéngé, esap atoto ngenikich och mettóch. 9 Nge oupwe túttúmúnú pwe ámi pwúngún filaatá ete wiliiti eú minen chepetek ngeni ekkena mi apwangapwang. 10 Pún iká emén mi apwangapwang epwe kúnók, en ewe mi wor óm sile pwe ka mwéngé lón eú imwenfelin uluulun, esap pwe mwelien letipen ena emén epwe lóllónetá tori an epwe mwéngé ekkewe mwéngé mi asor ngeni uluulun? 11 Iwe, ren óm sile, lúkúen ena emén mi apwangapwang a taló, i pwiium we Kraist a máló fán ásengesin. 12 Iká oua tipis ngeni pwiimi kewe lón ei esin napanap me ekinása mwelien letiper mi apwangapwang, oua tipis ngeni Kraist. 13 Ina minne, iká pwe mwéngé a áchepeteki pwii we, úsapw fókkun chúen ochooch futuk pwe úsapw áchepeteki pwii we.