Ewe Áeúin Taropwe Ngeni Chón Tesalonika

1 Paul, Silfenus,* me Timoty, ngeni ewe mwichefelin Tesalonika iir néún Kot ewe Sam me ewe Samol Jises Kraist:

Amwo kirekiréch mi somwoló me kinamwe epwe nónnóm remi.

2 Fansoun meinisin áúa kilisou ngeni Kot atun áúa féúnikemi meinisin lón ám kewe iótek, 3 pún áúse fókkun ménúkaaló mwen mesen Semach Kot ewe angang oua féri pokiten ámi lúkú Kot me ámi tong, me ussun ámi likiitú fán ekkewe weires pokiten ámi ápilúkúlúk lón ach Samol Jises Kraist. 4 Pún ámi pwiim kana mi áchengicheng me ren Kot, áúa silei an filikemiitá, 5 pokiten ewe kapas allim áúa afalafala ese feito remi ren kapas chék, nge pwal ren manaman me ngún mi fel me lúkú mi péchékkúl, ussun chék ámi silei met sókkun aramas áúa wiliiti me leimi fán ásengesimi. 6 Me oua áppirúkem me ewe Samol, pún oua etiwa fán pwapwa ewe kapas mi pop seni ewe ngún mi fel inaamwo iká oua nóm lón watteen riáfféú, 7 ina minne oua eú leenien áppirú ngeni meinisin ekkewe chón lúkú lón Masetonia me lón Akaia.

8 Pún ren enletin, esap chék án Jiowa* we kapas a esilefeil lón Masetonia me Akaia pokitemi, nge ámi lúkú Kot a pwal chéúfetál lón iteiten leeni meinisin, ina minne ese pwal chúen lamot ám áúpwe apasa och. 9 Pún pwisin iir ra kan akkapwóróusa ussun ewe áeúin fansoun áúa chuurikemi me ifa ussun oua likitaaló néúmi kewe uluulun me kul ngeni Kot pwe oupwe angang ngeni emén Kot mi manaw me enlet, 10 me witiwiti Néún we seni láng, ewe i a amanawaatá seni máló, ina i Jises, ewe epwe selánikich seni án Kot we song epwele waroto.