Ewe Áeúin Resim

EN MI silei met Noa a akkomw féri lupwen i me an we famili ra towu me lón ewe waimw? A féri eú liffang are asor ngeni Kot. Ka tongeni kúna an ei féri me lón ei lios fan. Noa a féri ei asorun man ngeni Kot ren an epwe apasa an kilisou ren án Kot amanawa an famili seni ewe noter mi lap.

Met óm ekiek, Jiowa a pwapwa ren ena liffang? Ewer, a pwapwa. Iwe, a pwisin apwúngaló pwe esap tongeni chúen ataieló fénúfan ren eú noter.

Ekiseló mwirin, a pwappwasetá unusen ewe fénú, iwe, Noa me an famili ra poputá le féri leenier lúkún ewe waimw. Kot a efeiéchúúr me a pwal ereniir: ‘Ámi oupwe chómmóngóló. Néúmi kewe repwe chómmóngóló tori a wor aramas wóón unusen fénúfan.’

Nge mwirin, ika aramas repwe rongorong usun pwóróusen ewe noter mi lap, eli repwe fókkun niwokkus pún eú noter usun ewe mi fókkun eniwokkus epwe tongeni fissefál. Iwe, Kot a awora eú pisekin áchem ngeni aramas usun an pwon ngeniir ren an esap chúen atai ewe fénúfan ren eú noter. En mi silei met a awora ren an epwe áchema ekkewe aramas? Ina eú resim.

Sia tongeni kúna resim fán láng lupwen ewe akkar a kan ttin mwirin an púng rán. Ewe resim a fókkun lingéch, a sókkópat anúwan. Ka fen piin kúkkúna? En mi kúna lón ei lios?

Iei met Kot a apasa: ‘Ua pwon pwe esap chúen wor eú ninniilóón aramas me man ren eú noter. Iei ua fératá eú resim fán láng. Lupwen ewe resim epwe pwá, ngang upwe kúna me chechchemeni ai we pwon.’

Iwe, lupwen ka kúna eú resim, met epwe áchema ngonuk? Án Kot we pwon pwe esap chúen ataieló fénúfan ren eú noter.