An Kot Ekiek Ussun Ekkewe Mi Malo

MALOON emon attongach we a fokkun aletipechoukich. A fokkun alollol ach meefi poon, pos, me letipeta. Ewe mettoch letipechou epwe tongeni ameef ngeni emon pwe a lamotongau, pun ese lifilifil ika emon a woummong, manaman, are itefoulo, nge esor emon won fonufan epwe tufichin amanauasefallieta emon mi fen malo.

Iwe nge, a sokkolo ekiekin ewe Chon Forikich. Pokiten a foriata ewe aemonun aramas seni susuun pwul, epwe pwal tufichin forisefalli emon aramas mi malo. Ina ewe popun Kot a tongeni ekieki pwe ussun ita nge chokewe mi malo ra chuen manau. Ren ekkewe chon angang mi tuppwol mi fen malo me lom, Jises a apasa: “Pun aramas ra chok manau ren [Kot].”​—⁠Luk 20:38.

Atun a nonnom won fonufan, a wor an Jises manamanen amanauasefallieta ekkewe mi malo. (Jon 5:21) Ina minne, a pwal eani ekiekin Seman we ussun ekkewe mi fen malo lon ar tuppwol. Ren chok awewe, lupwen chienan we Lasares a malo, Jises a ereni noun kewe chon kaeo: “Upwele feilo pwe upwe fongunata.” (Jon 11:11) Me ren aramas, Lasares a fen malo, nge me ren Jiowa me Jises, a chok annut.

Fan nemenien an Jises we muu, epwe fis ewe “manausefal ren ekkewe mi pung pwal ekkewe rese pung.” (Foffor 24:15) Lo, lo, lo, Kot epwe asukula ekkewe mi manausefal, iwe, repwe pwal eani ewe apilukulukun manau esemuch won fonufan.​—Jon 5:​28, 29.

Ewer, maloon emon attongach we epwe efisi letipeta me letipechou mi tongeni nonnom rech fitu ier. Iwe nge, ach silei an Kot ekiek ussun ekkewe mi malo epwe tongeni aururu letipach me auralo lelukach ren apilukuluk allim.​—2 Korint 1:​3, 4.