Aüchean Ekkewe “Fefin Mi Apwangapwang”

EWE aposel Piter a makkei: “Ami mwan kena, oupwe nonnom ren puluemi ren ach tipatchemen Soulang; oupwe asamolu ir, pun fefin mi apwangapwang senikemi.” (1 Piter 3:7) Piter a esiita fefin ren ei pworaus lon Paipel mi apasa pwe ir “mi apwangapwang”? Sipwe ppii met Piter a mochen pwe sipwe weweiti ren ei wokisin.

Ewe kapas “asamolu” lon fosun Krik a wewe ngeni “liwinin, aüchean, . . . suföl.” Ina popun, emön mwan pwüpwülü epwe kirökiröch ngeni pwülüwan. Epwe eteneki pwülüwan we ussun chök epwe kamwöch le pöün eü sepi mi fokkun aüchea nge a mwökukkäi. Saminne ei pworaus lon Paipel a esiita fefin. Iwe, ekieki mwo ussun ewe Tiffany lotus lamp. Ei lamp mi fokkun ling a mwökkai. Weween pwe, a mökükkün ewe lamp? Aapwi! Lon 1997, ra amömölo eü Tiffany lotus lamp ren 2.8 milion chana! Apwangapwangen ewe lamp a alapalo liwinin, ese ekisalo.

Ussun we chök, Piter ese esiita fefin lupwen a apasa pwe mwän repwe asamolu fefin pun ir mi apwangapwang. An mwän nonnom ren pwülüwer ren “tipatchemen Soulang” a wewe ngeni än ewe mwän ekieki ussun an pwülüwan pöchökkül me apwangapwang, met a saani me ese saani, ekiekin me meefian. Emön mwän pwüpwülü mi tongei pwülüwan a silei me weweiti sokkoloon sorosorun pwülüwan. A etenekifichi pwülüwan ‘pwe esap wor och epwe pinei an iotek.’ (1 Piter 3:7) Lupwen emön mwän pwüpwülü ese suföliiti pwülüwan, iwe, a efeiengaüa an chiechi ngeni Kot. Pwüngün pwe än Kot we Kapas a alingalo me suföliiti fefin, ese esiiter.