Mi wor ngawen ekkewe eérenien Krismas?

Chómmóng aramas ra erá pwe Krismas ina án Chón Kraist eéreni fán iten ránin apwapwaan uputiwen Jesus. Iwe nge, atun sia nennengeni ekkewe eéreni ra féfféri lón Krismas, sia mochen eis ika ifa usun ra poputá le weneiti uputiwen Jesus.

Áwewe chék ren ewe tutulap usun Santa Claus. Lón 1931 eú kompenien soft drink lón Merika a áeá Santa pwe an minen advertise fán iten Krismas, nge iei napanapan, i emén mwán mi wópwapwa, pwech enisan, parapar sapan, me a úféúf úf mi par. Ina napanapen Santa mi chéú iei. Lón ekkewe ier 1950 som, ekkóch chón Brazil ra sótun siwili Santa Claus ngeni pwal emén lón án chón Brazil tutulap itan Papa Indian pwe epwe esissillen Krismas. Iwe met mwirilóón? Me ren Professor Carlos E. Fantinati, Santa Claus ese chék okkufu Papa Indian, nge a pwal “okkufu ewe át Jesus pwe epwe esissillen fetellapen December 25.” Nge met, ekkena tutulap áwewe chék ren Santa Claus, ina chék ekkewe osukosuk mi weneiti Krismas? Ren ach sipwe silei pélúwen ena kapas eis, mi lamot sipwe etittina uruwoon ewe lamalamen Chón Kraist.

Iei met ewe Encyclopedia Britannica a erá: “Lón ekkewe 200 ier atun a kerán poputá ewe lamalamen Chón Kraist, chón ena lamalam rese fókkun tipeeú ngeni ar repwe féri áchechchemenien ránin uputiwen aramas mi ninniiló pokiten ar lúkú are pwal mwo nge ránin uputiwen Jesus.” Pwata? Pún Chón Kraist ra lúkú pwe eérenien apwapwaan ránin uputiw a feito seni chón fel ngeni kot chofona, iwe mi lamot repwe fókkun túmúnúúr seni. Ren enletin, ewe Paipel ese mwo nge affata ewe rán Jesus a uputiw lón.

Úlúpúkú som ier mwirin Kraist, inaamwo ika ekkewe popun Chón Kraist ra úppós ar resap féri apwapwaan ránin uputiw, nge ewe lamalamen Katolik a poputááni Krismas. Pokiten a mochen awattei an nemenem wóón chómmóng aramas, iwe a sótun amóeló minne a eppeti, ina án aramas fókkun pwapwaiti lamalamen Rom me ar kewe fetellap lón fansoun patapat. Me ren ewe puk Christmas in America, makkeien Penne L. Restad, iteiten ier seni December 17 ngeni January 1, “lap ngeni chón Rom ra féri kametip, urumwot, karis, me fiti pwal ekkóch apwapwa pwe repwe asamolu ar kewe kot.” Nge lón December 25, ekkewe chón Rom ra kan féri apwapwaan uputiwen ar kot mi fókkun manaman me rer, ina ewe akkar. Ren án ewe lamalamen Katolik filatá Krismas lón chék pwal ena rán, iwe a liapeni letipen chómmóng chón Rom ar repwe ekkesiwili apwapwaan uputiwen ewe akkar ngeni apwapwaan uputiwen Jesus. Iwe, me ren Santa Claus, a Biography, makkeien Gerry Bowler, ekkewe chón Rom “ra chúen tongeni pwapwaiti apwapwaan ekkewe fetellap lón fansoun patapat.” Ren enletin, ra féri ar mineféén ránin apwapwa ren ar fiti eérenier lóóm.

Iwe, met ngawen Krismas me eérenian kewe? A ffat pwe ewe ákkáeúin popun, pún ra feito seni lamalamen chón fel ngeni kot chofona. The Battle for Christmas, makkeien Stephen Nissenbaum, a erá pwe apwapwaan Krismas “wesewesen án chón fel ngeni kot chofona fetellap nge ra chék tipin erá pwe án Chón Kraist.” Ina minne, Krismas a ésúfélúngawa Kot me Néún we Jesus Kraist. Nge mi kon watte ngawan? Ewe Paipel a eáni ei kapas eis: “Ifa usun än pwüng me pwüngingau epwe chufengen ren? Are meta saram epwe chiechi ngeni rochopwak ren?” (2 Korint 6:14) Krismas a fókkun pwór, pwe “sisap tongeni awenecharela,” usun chék popun efóch irá mi pwór sise pwal tongeni áwena.​—Än Salomon Afalafal 1:15.