Pworun Kapas Eis

◼ Ifa usun sipwe älisatä än chon ewe mwichefel aüselingöch lon ekkewe mwich? (Tut. 31:12)

Sia pwäralo alolloolun ach süföliti Jiowa me an kewe kokkot fän iten ekkewe mwich ika sipwe warekkäi me ammolnatä ekiekich pwe sipwe angei käit me ren. A mürinnö ach sipwe mommot woon ekkewe seaa mwan me likiti ekkewe seaa mwirin fän iten ekkewe mi wor nöür semirit me ekkewe ra waremmang fän ekkoch. Mwen ewe mwich epwe poputä, tümünü pwe nöüch kewe cel fon me met kkan resap atai än chon ewe mwichefel aüselingöch. Ika sia älillisfengen meinisin, iwe, ekkewe mettoch mi tongeni aosukosuka chon aüseling resap kon fis.—SalAf. 5:1; Fil. 2:4.

Ika ekkoch ra kerän fiti mwich, nge mi wor emön me lon ewe mwichefel a sissileer, iwe epwe mommot ünükür. A äkkäeüin lamot ngeni ekkewe mei wor nöür semirit pwe repwe mosonoson. Pokiten resaamwo eörenalo le fiti mwich, a öch ar repwe mommot woon ekkewe seaa mwirin pwe rete aosukosuka ekkewe ekkoch, nge ika mi lamot ekkewe sam me in repwe towu lukun pwe repwe tümünü nöür kewe. (SalF. 22:6, 15) Ekkewe famili mi wor nöür semirit resap mommot lon ekkewe rum mi imulo, pun semirit ra kan mesepaat ika pwe ra imulo. A mürinnö ngeni ewe sam are in an epwe towu lukun ewe leenien mwich le apwüngü nöün kewe are ataweei met ra osupwang ren, mwirin repwap liwinlong.

Ekkewe chon tümünü mwich ra tümünüfichi pwe ewe leenien mwich epwe kinamwe me fich ngeni imwen Jiowa. Ra älisi ekkewe famili me ekkewe ra mmangoto fän ekkoch ar repwe künökün leenier. Ra kirekiröch me pwäratä fäiro le älisi ekkewe ekkoch le kütta leenier pun rete aosukosuka ekkewe ekkoch. Ra pwäralo mirit ika ekkoch osukosuk ra pwal piitä. Nge ika emön semirit a kon mesepaat me aosukosuka chon aüseling, ekkewe chon tümünü mwich ra älillisöch.

Meinisin chon fiti mwich ra tongeni älisatä än chon ewe mwichefel käeö usun Jiowa, me an kewe kokkot fän iten ewe fönüfan mi fö mi kinamwe me pwüng.—Ipru 10:24, 25.