Mi Lamot ngeni Ekkewe Chon Afalafal Ar Repwe Iotek
1. Met a lamot ren ach sipwe apwönüetä ach angang?
1 Sise tongeni apwönüetä ewe angangen afalafal ren pwisin ach tufich. Jiowa a akkapöchökkülakich le föri ei angang. (2 Kor. 4:7, TF) A nöünöü ekkewe chon läng pwe repwe älisikich le küna nöün kewe siip. (Pwar. 14:6, 7) Jiowa a kan ämääri ekkewe pwikilin enlet sia fen fotukiir me achöchchönuur. (1 Kor. 3:6, 9) A ifa me lamoten än ekkewe chon afalafal lükülük woon Jiowa lon iotek!
2. Met sia tongeni iotek usun?
2 Fän Itach: Mi lamot sipwe iotek iteiten sia afalafal. (Ef. 6:18) Met sipwe iotek usun? Sipwe tongeni iotek pwe sipwe pwora me eäni ekiek mi öch usun ach leenien afalafal. (Fof. 4:29) Sia tongeni tingorei Jiowa le emmwenikich ngeni ekkewe mi letip wenechar pwe sipwe käeö ngeniir ewe Paipel. Ika ewe chon imw a kapas eis, sia tongeni mwittir iotek le monomon pwe Jiowa epwe älisikich le pölüweniöchü an kapas eis. (Ne. 2:4) Sia pwal tongeni tingor tipatchem pwe sipwe akkakkomwa ach angangen afalafal. (Jem. 1:5) Pwal och, Jiowa a pwapwa lupwen sia apasatä ach kilisou ren wisach we, chon afalafal.—Kol. 3:15.
3. Ifa usun ach iotek fän iten ekkewe ekkoch a älisatä ewe angangen afalafal?
3 Fän Iten Ekkewe Ekkoch: Mi pwal lamot sipwe ‘iotekifengenikich,’ pwal mwo nge apasa iten pwiich kewe ika mi fich. (Jem. 5:16; Fof. 12:5) Ka fen apwangapwang me kese kon lien tongeni fiti angangen afalafal? Iwe, ka tongeni iotek fän iten pwiich kewe mi fen pöchökkül. Kosap ekieki pwe esor lamoten om kewe iotek fän äsengesiir! A pwal öch ach ioteki ekkewe sou nemenem pwe resap oput ewe angangen afalafal pwe pwiich kewe repwe tongeni “manaueni eu manau fän mosonoson me kinamwe.”—1 Tim. 2:1, 2.
4. Pwata sipwe iotek fansoun meinisin?
4 A watte wisach le esilefeili ewe kapas allim woon unusen fönüfan. Nge, ika sia “iotek fansoun meinisin,” sipwe tongeni apwönüetä ei angang ren än Jiowa älillis.—Rom 12:12.