Ekiek me Föfför mi Longuni Kapasen Emmwen
1. Met weween ekkewe kapasen emmwen?
1 Met weween ekkewe kapasen emmwen? A wewe ngeni “och pworaus mi enlet mi tongeni weneiti chommong mettoch.” Ifa usun ekkewe kapasen emmwen ra sokko seni allük? Ekkewe kapasen emmwen ina longolongun fisitään allük.
2. (a) Pwata ach akkapwönüetä än Paipel kewe kapasen emmwen a weires lap seni ach älleasochisi eü pinükün allük? (b) Pwata sipwe angang weires le ekiekiöchü än Paipel kewe kapasen emmwen lap seni ach sipwe kütta ekkewe allük mi tichik?
2 Fän chommong, “alon ach we Kot” a pesekich ach sipwe eäni ekiek me föfför mi longolong woon än Paipel kewe kapasen emmwen. (Aisea 40:8) Ach wewefichiti än Paipel kewe kapasen emmwen me akkapwönüetä ese mecheres usun ach älleasochisi eü pinükün allük. Pokiten sise unusöch, eli sisap mochen angang weires le ekiekiöchü än Paipel kewe kapasen emmwen. Eli sipwe tipeni an epwe wor eü allük epwe affata met sipwe föri lupwen epwe torikich och kefil are osukosuk. Eli fän ekkoch sipwe kütta emmwen seni emön Chon Kraist mi äsimaü, eli emön elter lon ewe mwichefel, iwe, sipwe ekiekin rong seni i wesewesen eü allük mi weneiti ach we osukosuk. Iwe nge, eli esap mak lon ewe Paipel are lon ekkewe puk mi longolong woon Paipel wesewesen eü allük, me inaamwo ika epwe affatetiw wesewesen eü allük, nge eli esap fichiiti meinisin sokkun osukosuk iteiten fansoun meinisin.
3. (a) Pwata sia tongeni erä pwe Josef a angei emmwen seni än Paipel kewe kapasen emmwen lap seni allük? (b) Ifa usun sipwe tongeni äppirü Josef?
3 Sipwe ppii än Josef we leenien äppirü, ren an ese tipeeü ngeni pwülüwen Potifar we lupwen a ekiekin sike ngeni. Inaamwo ika Jiowa esaamwo awora eü allük mi makketiw fän iten lisowu mwääl, me ese affatetiw liwinin tipisin än emön lisowu ngeni pwülüwen emön, nge Josef a silei än Paipel kewe kapasen emmwen mi weneiti än Kot kokkot usun tüppwöl lefilen mi pwüpwülü. (Keneses 2:24; 12:18-20) Sia tongeni küna pwe a mmen watte nemenien än Paipel kana kapasen emmwen woon manauan, ren minne a apasa: “Ifa usun, upwe fori och fofor mi fokun ngau o tipis ngeni Kot?”—Keneses 39:9.
4. Ifa usun ach akkapwönüetä än Paipel kewe kapasen emmwen a tümünükich seni ach sipwe elingepin lon ach fel ngeni Kot?
4 Ach silei me akkapwönüetä än Paipel kewe kapasen emmwen a pwal tümünükich seni ssären ach sipwe elingepin lon ach fel ngeni Kot. Apwönüetä än Paipel kapasen emmwen me ssenükün tinikken fän iten älleasochisi allük, ra sokkofesen. Ach älleasochisi än Paipel kewe kapasen emmwen, epwe tümünükich seni ach sipwe nom fän chommong sokkun allük mi tichik, nge mi lu seni än Paipel kewe asukul, me sisap pwal echchimwa aramas le föri ina usun. Nge sipwe ekilapei än Paipel kewe kapasen emmwen usun tong me älleasochis ngeni Kot lap seni ekkewe föfförün fel ngeni Kot mi pwä ngeni mesen aramas.—Luk 11:42.