Akkaúseling Ngeni Kot​—Néúnéún

Ewe brochure Akkaúseling Ngeni Kot a ur ren lios fán iten asukulen ekkewe lóngólóngun áitien Paipel ngeni chókkewe a weires ngeniir ar repwe káé seni mesenimak. Eú me eú ekkewe lesen mi ruu pekin taropwe ra ur ren lios nge a pwal wor ekkewe esissil repwe emmweni ewe pwóppwóróusfengen wóón eú lios ngeni pwal eú lios.

Ekkewe lios lón ewe brochure Akkaüseling ngeni Kot pwe Kopwe Küna Manau Esemuch ra léllé ngeni ekkewe lón Akkaúseling Ngeni Kot. Nge, ewe akkomw a kon chómmóng ekkewe mak lón me ekkewe chón káé mi mwaren tufichin állea ra tongeni néúnéú. Lape ngeni ekkewe chón afalafal ra kan sani le néúnéú ena brochure atun néúr kewe chón káé ra kan néúnéú ewe Akkaúseling Ngeni Kot. A wor eú pwóór lón chómmóng me lein ekkewe pekin taropwe nge mi wor ekkóch pwóróus lón fán iten pwóppwóróusfengen, nge áeáán ena pwóór epwe chék alóngólóng wóón tufichin ewe chón káé.

Ka tongeni anéúnéú menni lein ekkena brochure ineet chék, ikaamwo esap ina met itá sipwe anéúnéú lón ena maram. Atun eú káéén Paipel, áeá ekkewe lios le áweweei eú pwóróus seni ewe Paipel. Áeá kapas eis pwe epwe wor alen pwóppwóróusfengen me ewe chón káé me pwal alen óm kopwe silei ika mi wewe. Álleani me pwóróusfengen wóón ekkewe wokisin ra nóm fachikin eú me eú pekin taropwe. Mwirin óm áwesaaló ewe brochure, káé Met Ewe Paipel a Wesewesen Apasa? le álisi noum chón káé le feffeitá pwe epwe tufichin papatais.