“Omusaaló Ekkewe Tipis Ra Fis me Lóóm”

A tongeni musoló ach kewe tipis ren chék ewe méén kepich Jises a méénatiw ren chchaan. (Efi. 1:7) Iwe nge, ewe Paipel a apasa: “Ren an [Kot] likiitú a omusaaló ekkewe tipis ra fis me lóóm,” weween me mwen án Jises awora ewe méén kepich. (Rom 3:​25, ftn.) Ifa ussun Jiowa a tongeni féri ena, nge pwal chúen apwénúetá met a fen apwúngaló pwe mi pwúng?

Jiowa a pwonei pwe ewe ‘mwirimwir’ epwe seláni chókkewe mi lúkú I me an kewe pwon. Lupwen a eáni ena pwon, ussun nge a fen kamétiw ewe méén kepich. (Ken. 3:15; 22:18) Kot a fókkun lúkúlúk pwe Néún we epwe tipemecheres le awora ewe méén kepich lón ewe fansoun a filaatá. (Kal. 4:4; Ipru 10:​7-10) Atun Jises a nóm fénúfan, Jiowa a fang ngeni an pwúúng le omusaaló tipis me mwen an kawor ewe méén kepich. I a tongeni omusaaló tipisin chókkewe mi wor ar lúkú pokiten a silei pwe ewe asor epwe awora, a tongeni pwélúoló ar kewe tipis.—Mat. 9:​2-6.