Kapas Eis Seni Chón Állea
Met weween masouen Kölfel 12:7?
Ewe epwipwiin pwóróus a affata pwe a weneiti aramas.
Lón Kölfel 12:1-4, sia álleani pwe Tafit a akkomw erá pwe “esap chüen wor eman chon pin.” Iwe nge lón Kölfel 12:5-7, a erá:
“Ewe Samol mi Lapalap a üra, ‘Iei ngang üpwe feito,
Pokiten ekewe chon wöüngau ra osupwang,
Pwal ekewe chon mwelele ra ngüngü.
Ngang üpwe alenier lon ewe lenien kinamwe ra älälei.’
Än ewe Samol mi Lapalap kewe pwon ra allükülük o fatafatöch,
Usun silifer a kurufat me lon ewe lenien um lepwül,
Lupwen a ketel fän fisu pwe epwe limöch.
Äm Samol mi Lapalap, kopwe amwöchükem,
Kopwe tümwünükem fansoun meinisin seni ei täppin aramas mi ngau.”
Wokisin 5 a affata met Kot a erá ussun ekkewe mi wéúngaw. Epwe selániir.
Wokisin 6 a pwal erá pwe “än ewe Samol mi Lapalap kewe pwon ra allükülük o fatafatöch,” “usun silifer a kurufat.” Chón Kraist mi enlet ra fókkun tipeeú ngeni ekkena kapas.—Kölf. 18:30; 119:140.
Lón ekkóch afféún Paipel, a iei ussun chiyakúún Kölfel 12:7: “Äi SAMOL, en kopwe tümwünür.” Me pokiten wokisin 6 a fós ussun “än ewe Samol mi Lapalap kewe pwon,” iwe ekkóch ra lúkú pwe a wewe ngeni pwe Jiowa epwe ‘tümwünü’ an kewe pwon. Me sia silei pwe Kot a túmúnú ewe Paipel inaamwo iká chómmóng chón ú ngeni ra sótun pinei are atai.—Ais. 40:8; 1 Pit. 1:25.
Iwe nge, Jiowa a pwal túmúnú chókkewe mi mak ussur lón wokisin 5, me epwe sópweeló le álisi me seláni “ekewe chon wöüngau” me “chokewe mi riaföü.”—Hiop 36:15; Kölf. 6:4; 31:1, 2; 54:7; 145:20.
Iwe, lón ewe wokisin 7, ié kewe are met ekkewe Jiowa a túmúnúúr? Aramas, are an we Kapas?
Iká sia etittinafichi ena kél mi pin, a ffat pwe a weneiti aramas.
Lepoputáán Kölfel 12, Tafit a fós ussun néún Jiowa kewe chón angang mi túppwél, aramas mi ngaw ra chofona ngeniir. Iwe lón wokisin 3, sia álleani ekkewe kapas pwe Jiowa epwe ú ngeni chókkewe mi eáni kapasen otuputup. Ena kél mi pin a alúkúlúkúkich pwe sia tongeni lúkúlúk wóón Kot me an tufich le seláni néún kewe aramas pokiten an kewe kapas ra wenechar.
Iwe me ren wokisin 7, Jiowa epwe túmúnú chókkewe mi kúna weires seni aramas mi ngaw.
Iwe pwata ekkóch afféún Paipel ra chiyakúúni ena wokisin ngeni ei itiitin “kopwe amwéchúr”? Ena itiitin kapas a tipeeú ngeni ekkóch ekkewe kapiin Tesin Ipru. Nge lón ewe Septuagint lón fósun Krik a néúnéú ekkeei itiitin “kopwe amwéchúkem” me “kopwe túmúnúkem.” A weneiti ekkewe mi túppwél mi nóm fán weires. Repwe kúna túmún “seni ei täppin aramas mi ngau,” iir kewe mi apéchékkúla minne mi fókkun ngaw. (Kölf. 12:7, 8) Lón eú afféún ewe Tesin Ipru lón fósun Aramaik a iei itiitin ena wokisin: “En, O SAMOL, kopwe túmúnú ekkewe mi pwúng, kopwe túmúnúúr seni ei táppin aramas mi ngaw tori feilfeiló.” Ena wokisin a pwal affata pwe Kölfel 12:7 ese fós ussun án Kot kewe pwon.
Ina popun, ena wokisin a awora ngeni chókkewe mi túppwél ápilúkúlúk pwe Kot epwe wisen álisiir.