Rahap A Aopa Ekkewe Spai

EKKEEI mwán ra nóm lón osukosuk. Ika resap sú, repwe ninniiló. Iir spai seni Israel, iwe ei fefin mi álisiir, i Rahap. Rahap a nónnóm ikeei ie lón eú imw mi nóm wóón ttitin ewe telinimw Jeriko. Sipwe ppii ika met popun ekkeei mwán ra nóm lón osukosuk.

Ekkewe chón Israel ra fen mmólnetá pwe repwe pwereló ngeni ewe epek ren ewe chénúpupu Jortan ren ar repwe tolong lón ewe fénú Kanaan. Nge mwen ar repwe fetál, Josua a tiinaaló ekkewe rúúemén spai. A ereniir: ‘Ou ló nengeni ewe fénú me ewe telinimw Jeriko.’

Lupwen ekkewe spai ra tolong lón Jeriko, ra feiló ngeni imwen Rahap we. Nge emén a ereni ewe kingen Jeriko: ‘Rúúemén chón Israel ra tolong lón ei pwinin pwe repwe operi ewe fénú.’ Lupwen ewe king a rong ei mettóch, a tiinaaló ekkóch mwán ren Rahap, iwe ra ereni: ‘Kele átekinató ekkewe mwán ka anómuur lón imwom na!’ Nge Rahap a fen aopa ekkewe spai wóón osun imwan we. Ina popun a apasa: ‘Ekkóch mwán ra pwereto ren imwei ei, nge use silei ia ra feito me ie. Ra ló lupwen an a poputá le kirocholó, mwen an a kapúng asamen ewe telinimw. Ika oua mwittir, oupwe tongeni liapeniir!’ Iwe, ekkewe mwán ra ló cheer.

Mwirin ar ló, Rahap a mwittiritá wóón osun ewe imw. A ereni ekkewe spai: ‘Ua silei pwe Jiowa epwe ngenikemi ei fénú. Ám aua fen rong usun an ápwasa ewe Setipar lupwen oua ló seni Isip me usun ámi nieló ekkewe king Sihon me Ok. Ua fen úméúméch ngenikemi, ina popun ouse mochen oupwe pwon ngeniei pwe oupwe kirekiréch ngeniei. Oupwe seláni semei, inei, mongeei kewe me pwii kewe.’

Ekkewe spai ra pwonei pwe repwe féri ika Rahap epwe féri eú mettóch. Ekkewe spai ra apasa: ‘Angei ei sáál mi parapar, me ri ngeni asammwachoon imwom ei, iwe kopwe ionaató lón imwom meinisin márárum kewe. Iwe, ika aupwe liwin pwe aupwe liapeni Jeriko, aupwe kúna ei sáál lón ei asammwacho, iwe ausap nieló emén me lón imwom ei.’ Lupwen ekkewe spai ra liwiniti Josua, ra apwóróusa usun mettóch meinisin minne a fis.