Rúúemén Fefin Mi Pwora

LUPWEN ekkewe chón Israel ra nóm lón fitikoko, ra sié ngeni Jiowa. Jiowa a pélúweni ar sié ren an awora ngeniir ekkewe sou emmwen mi pwora pwe repwe álisiir. Ewe Paipel a eita ngeni chókkeei soukapwúng. Josua, i ewe áeménún soukapwúng, iwe ekkóch ekkewe soukapwúng mwirin, iter Otniel, Ehut me Samkar. Nge rúúemén me lein ekkewe aramas mi álisi chón Israel, iir fefin, iter Tepora me Jael.

Tepora emén finesoufós. Jiowa a kan áiti ngeni pwóróusen fansoun mwan, iwe mwirin, a ereni ekkewe aramas met Jiowa a apasa. Tepora, pwal i emén soukapwúng. A kan mómmót fán efóch irá itan palm lón ewe fénú mi ppanetá me aramas ra kan feito ren pwe repwe kútta ar álillis ren ar kewe osukosuk.

Lón ei atun, Japin, i ewe kingen Kanaan. A wor 900 waan wokenin maun. A kon péchékkúl an we mwichen soufiu pwe iwe ra eriáni chómmóng ekkewe chón Israel ar repwe wiliiti néún Japin chón angang. Sisera i ewe meilap lón án Japin we mwichen soufiu.

Lón eú rán, Tepora a tiiti ewe Soukapwúng Parak, iwe a ereni: ‘Jiowa a fen apasa, “Angei 10,000 mwán me emmweniireló tori ewe chuuk Tapor. Me ikena ie upwe panato reom Sisera. Iwe, upwe aota pwe kopwe akkufu i me an we mwichen soufiu.”’

Parak a ereni Tepora: ‘Upwe ló ika pwe kopwe fitiei.’ Tepora a fiti, nge a ereni Parak: ‘Esap en ewe kopwe itéch lón ewe maun, pún Jiowa epwe atolonga Sisera lepéún emén fefin.’ Iwe, ina ewe mettóch a fis.

Parak a ettiw me wóón ewe chuuk Tapor pwe epwe maun ngeni néún Sisera kewe soufiu. Nge mwittir chék, Jiowa a efisi och pupuun konik mi pupummong, iwe chómmóng néún Sisera kewe soufiu ra mwalum. Nge Sisera a tétiw me wóón waan we woken, iwe a sú.

Mwirin och fansoun, Sisera a tori imwen Jael we imw mangaku, iwe neminna a etiwaalong me aúnú ngeni och milik. Ewe milik a efisi an eiessum, iwe mwirin ekis fansoun, a annutoló. Jael a angei efóch mettóchun ewe imw mangaku, iwe a ammanaalong lón mékúren ei mwán mi ngaw. Mwirin lupwen Parak a war, neminna a áiti ngeni pwe Sisera a máló! Iwe, ka kúna pwe minne Tepora a apasa a pwénútá.

Iwe mwirin, King Japin a pwal ninniiló, iwe ekkewe chón Israel ra kinamwesefál ekis fansoun.