Aurur fan iten Ekkewe mi Letipechou
“Masouen fonufan meinisin ra chok ngungufengen tori ei fansoun.” (Rom 8:22) A watte riaffoun aramas atun an a makketiu ena poraus lap seni 1900 ier lom. Chommong ra letipechou. Ina minne, a wor ei kapasen pesepes ngeni ekkewe Chon Kraist: “Eani kapasen aurur ngeni ir kewe mi letipechou.”—1 Tesalonika 5:14.
Ikenai, an aramas riaffou a wakattelo, iwe, a pwal chommongelo ekkewe aramas mi letipechou. Nge sipwe ita mairu ren? Aap, pun ewe Paipel a era pwe ikkeei “ekkewe ranin le sopwolon,” iwe, a pwal eita ngenir “fansoun weires.” (2 Timoti 3:1-5) Jises a fen oesini pwe lon ekkewe ranin le sopwolon, “ekkewe muu repwe riaffou” me “aramas repwe meserochelo ren ar niuokus me ar ekieki ekkewe mettoch repwe fis won fonufan.”—Luk 21:7-11, 25-27; Mattu 24:3-14.
Lupwen aramas repwe aurek, niuokus, lolilen are met kan mwo ren langattam fansoun, fan chommong repwe letipechoulo. Epwe fis ar repwe letipechou are letipeta, pokiten a malo emon attonger we, are ra mufesen me puluwer we, are a pout senir ar angangen pau, are ar samau a chok nonnomottam. Aramas repwe pwal letipechoulo lupwen ra meefi pwe esor lamoter, lupwen ra meefi pwe rese auchea pun ra alichipungu aramas. A tongeni fis eu fansoun osukosuk watte ngenikich meinisin, nge lupwen fansoun emon ese chuen wor an apilukuluk allim, are ese pwal tongeni kuna ewe alen ngaselo, iwe, epwe meefi letipechou watte.
Aramasen lom lom ra pwal kuna ena sokkun memeef. Job a kuna riaffou ren samau me osukosuk watte lon manauan. A meefi pwe Kot a likitalo i, ina pwata a apasa pwe a oput ewe mettoch manau. (Job 10:1; 29:2, 4, 5) Jekop a letipechou lupwen a ekieki pwe noun we a malo, ese tongeni chipelo, nge a chok mochen malo. (Keneses 37:33-35) Lupwen King Tafit a meefi osukosuk pokiten an tipis watte, a apasa: “Ua chok lolilen seni lessosor tori lekuniol. Ua chok ngungures pokiten fitikokoon letipei.”—Kol Fel 38:6, 8; 2 Korint 7:5, 6.
Ikenai, chommong ra letipechou pokiten ar aweiresi pwisin ir, iwe, ra achocho le manaueni ewe sokkun manau ran me ran mi kon ssenuk seni ar pochokkul lon pekin ekiek, memeef me inis. A pwapwalo pwe aurek watte, fengen me ekiek me memeef ese pwung, a tongeni aweiresi ewe inis me efisi lon tupuach och osukosuk mi efisata letipechou.—Alollofengeni Proverbs 14:30.
Alillis mi Lamot Ngenir
Epafrotaitos, emon Chon Kraist seni Filipai lon ewe aeuin senturi, a “letipeta pun [chienan kewe] ra rong pwe a samau.” A semmwenilo mwirin an chienan kewe tinalo i ngeni Rom fan iten an epwe uwei ngeni ewe chon kuno Paul ekkoch pisek, iwe, eni a meefata pwe ese apwonueta minne chienan kewe ra mochen me ra mangau ren. (Filipai 2:25-27; 4:18) A ifa usun ewe aposel Paul a awora an alillis?
A enniwilalo Epafrotaitos ngeni leenian we fan echo taropwe ngeni chienan kewe chon Filipai, ewe mi apasa: “Oupwe etiwa [Epafrotaitos] lon ewe Samol ren sokkun pwapwa meinisin, o oupwe pwal asamolu ei sokkun aramas.” (Filipai 2:28-30) Pokiten Paul a kapasoch usun Epafrotaitos me ekkewe chon Filipai ra etiwa ren pwapwa me tong, a aururu letipen Epafrotaitos me a chipelo seni an letipeta.
Esor tipemwaramwar pwe an ewe Paipel fon mi apasa pwe sipwe “eani kapasen aurur ngeni ekkewe mi letipechou” a murinno seni meinisin. Emon fefin mi kuna riaffou pokiten an letipechou a apasa, “A lamot ach sipwe silei pwe aramas ra tongeikich. A lamot ach sipwe rong an emon epwe apasa, ‘Ua wewe; iwe, kopwe pochokkulsefal.’”
Fan chommong a lamot ngeni emon mi letipechou an epwe pwisin mwokutukut le kutta emon epwe tongeni suuki letipan ngeni. Emonna epwe emon mi auselingoch me fokkun mosonottam. Esap kapas chommong ngeni ewe mi letipechou, esap pwal apasa kapasen apwung, awewe chok, esap era, ‘Kesap meefi ina usun’, are ‘Mei mwaal om na ekiek.’ Meefien ewe mi letipechou a tongeni muttir tatakkiselo, iwe, ekkena sokkun kapas epwe chok aingaua an memeef usun pwisin i.
Emon mi letipechou epwe tongeni meefi pwe ese fokkun wor auchean. (Sona 4:3) Iwe nge, emon epwe fokkun chechemeni pwe a chok lamot meefien Kot usuch. Aramas ra meefi pwe “esor auchean” Jises Kraist, nge ese siwili wesewesen auchean ngeni Kot. (Aisea 53:3) Kopwe lukuluk pwe usun chok Kot a tongei noun we mi achengicheng, a pwal tongeiok.—Jon 3:16.
Jises a tongei ir mi letipechou me a achocho le alisir ar repwe mefi pwe ir mi auchea. (Mattu 9:36; 11:28-30; 14:14) A awewei pwe Kot a pwal mwo nge aucheani ekkewe litchok mi kukkun mi lamot kisikis. A apasa, “Kot esap monuki emon leir.” Iwe, ekkewe aramas mi achocho le fori letipan repwe fokkun auchea ngeni Kot lap seni chommong litchok! Jises a apasa ei mettoch ngenir: “Pwal mwo nge meten mokuremi meinisin ra fen allea.”—Luke 12:6, 7.
Pwungun pwe epwe weires ngeni emon mi fokkun letipechou, emon mi wesewesen osukosuk pokiten an kewe mwaal me apwangapwang, an epwe luku pwe Kot a aucheani. Eni epwe luku pwe ese fich ngeni an Kot tong me tumun. “Letipach epwe apwungukich,” an Kot we Kapas a apasa. Nge, ita ina ewe mettoch mi lamot? Aap, sap ina. Kot a weweiti pwe aramas mi tipis repwe eani ekiek–mwaal me pwal mwo nge apwungu pwisin ir. Ina popun an Kot we Kapas a aururur: “Kot mi lapalap seni letipach, o a fen silei mettoch meinisin.”—1 John 3:19, 20.
Ewer, Semach we lon lang mi tong a kuna lap seni ach kewe tipis me mwaal. A silei ekkewe lapalap mi tongeni arikikichelo, pwal lapalapen unusen manauach, ekkewe mettoch mi achungu letipach me ach kewe mochen. A silei pwe sia alemwiri tipis, semmwen me malo, ina minne, mei aukuk ach kewe tufich. Nge ach mefi lolilen me letipechou a annetata pwe sise mochen tipis me sisaamwo poutmwaalilo. Ewe Paipel a era pwe sia “lamotengauelo”, nge sap ren pwisin letipach. Ina popun, Kot a tongeikich lon ach ei osukosuk, a pwal umoumoch ngeni ach kewe apwangapwang.—Rom 5:12; 8:20.
Ewe Paipel a alukuluku ngenikich, “Jiowa, i mi umoumoch o kirokiroch . . . Usun touaufesenin meseiran o apilen, iei usun a atouaualo senikich ach kewe foforingau. Pun a fen silei usun meeta sia fisita seni; a pwal chechemeni pwe kich seni falangen pwul.” (Kol Fel 103:8, 12, 14) Enlet, Jiowa, “i mi Koten sokkun aururu meinisin, i mi aururu letipach lon sokkun ach riaffou meinisin.”—2 Korint 1:3, 4.
Ewe alillis mi fokkun lamot ngeni ir mi letipechou a popu seni ar arap ngeni ar Kot mi umoumoch me nguuri an kapasen etiwetiw ar repwe ‘likiti ngeni ar kewe chou.’ I epwe tongeni “amanaua ngunun emon mi luketatakkis.” (Kol Fel 55:22; Aisea 57:15) Ina minne, an Kot we Kapas a peseikich ach sipwe iotek, a apasa: “Oupwe iseta won [Jiowa] mettoch meinisin minne oua aurek ren, pun a fen tongeikemi.” (1 Piter 5:7) Ewer, ren iotek me sio, aramas repwe tongeni arap ngeni Kot me pwapwaiti “an Kot we kinamwe mi somelo seni ach ekiek meinisin.”—Filipai 4:6, 7; Kol Fel 16:8, 9.
Ach sipwe ekis siwili minne sia foffori ran me ran epwe pwal tongeni alisikich le pworaiti ach letipechou. Taiso, mongo sokkun mongo mi lamot ngeni pochokkulen inisich, ngasangaseri asepwal mi limelimoch, nafochun ach asoso, me ach aukukuochu fansoun katol TV, ekkeei mettoch meinisin ra lamot. Emon fefin a alisi ekkoch mi letipechou ren an peser ar repwe feilfetal. Lupwen emon mi letipechou a ereni: “Use mochen feilfetal,” ewe fefin a tippepos le polueni: “Ewer, kopwe chok lo.” Ewe fefin a repotei: ‘Am aua fetal ukukun ruanu mail. Lupwen am aua liwinsefal, neminewe a monunu, nge a murinnolo an memef. Kesap tongeni luku ifa ukukun watten ewe alillis taiso a awora ika pwe kese sotuni.’
Iwe nge, fan ekkoch ese tufich an emon epwe unusen pworaiti letipechou, inaamwo ika a fen sotuni mettoch meinisin, pachelong an kut alillis seni ekkewe tokter me met kan mwo. Emon fefin a era, “Ua fen sotuni mettoch meinisin, nge ua chuen chok mefi letipeta.” A pwal usun chok lon ei fansoun, fan chommong ese tufich ekkewe mi mesechun, selingepung are pechema ar repwe chikareta. Iwe nge, epwe wor aurur me apilukuluk ren ar akkalleani an Kot we Kapas, ewe a awora apilukuluk allim mi enlet usun ngaselo seni an aramas kewe weires meinisin.—Rom 12:12; 15:4.
Atun Esap Chuen Wor Emon Epwe Letipechou
Lupwen Jises a oesini usun ekkewe mettoch mi aniuokus repwe fis won fonufan lon ekkewe ran le sopwolon, a pwal era: “Are ekkeei mettoch epwe fisita, oupwe neta o sacheta pun ami amanau a fen arapoto.” (Luk 21:28) Jises a kapas usun an aramas tolong lon an Kot we otot sefo mi pwung, ikewe ie “forien Kot kewe repwe fokkun ngaseseni fan nemenien limengau, o repwe eti noun Kot kewe lon ewe ngas mi ling.”—Rom 8:21.
A ifa me watten ewe ngaselo lupwen aramas repwe ngaselo seni ar kewe chou seni chok me lom, pwe repwe tongeni nennelo iteiten ran nge epwe ffatafatoch ar ekiek me repwe mwotores le fori ar angang! Esap chuen wor emon epwe piit ren choun letipan. Iei ewe pwon mi enlet ngeni aramas, pwe Kot “epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.”—Pwarata 21:3, 4.
Ika ese fen pwa, meinisin ekkewe wokisin lon ei taropwe ra popu seni ewe New World Translation of the Holy Scriptures.