Lesen 6
Meta ewe Muun Kot?
Ia a nonnom ia ewe Muun Kot? (1) Io an we King? (2)
Mei wor pwal ekkoch mi eti i lon ewe wis King? Ika ewer, fitemon? (3)
Met a pwarata pwe sia nom lon ewe ranin le sopwoloon? (4)
Met an Kot we Muu epwe fori fan iten aramas lon fansoun mwach kkan? (5-7)
1. Lupwen Jises a nonnom won fonufan, a aiti ngeni noun kewe chon kaeo pwe repwe iotek fan iten an Kot we Muu. Ei fos muu a wewe ngeni eu nemenem fan emon king. An Kot we Muu, ina eu nemenem mi sokkolo aucheaan. A fotetiu lon lang me epwe nemeni ei fonufan. Epwe epinalo iten Kot we. Epwe apwonueta letipen Kot won fonufan ussun chok an a fis lon lang.—Mattu 6:9, 10.
2. Kot a pwonei pwe Jises epwe wiiseni ewe wis King lon an we Muu. (Luk 1:30-33) Atun Jises a nom won fonufan, a annetata pwe epwe emon Sou Nemenem mi kirokiroch, pwung, me unusoch. Lupwen a liwiniti lang, ese muttir wiiseni ewe wis King lon an Kot we Muu. (Ipru 10:12, 13) Lon 1914, Jiowa a ngeni Jises ewe nemenem a pwon ngeni. Seni ena fansoun, Jises a nemenem lon lang, iwe, i ewe King mi seikita me ren Jiowa.—Taniel 7:13, 14.
3. Jiowa a pwal filata ekkoch mwan me fefin mi tuppwol seni ewe fonufan pwe repwe feita lang. Repwe eti Jises le nemeni chon fonufan lon ekkewe wis king, sou kapwung, me samol fel. (Luk 22:28-30; Pwarata 5:9, 10) Jises a eita ngeni chienan kewe sou nemenem lon an we Muu eu “mwich kisikis.” Iteiter 144,000.—Luk 12:32; Pwarata 14:1-3.
4. Lupwen Jises a wiliiti emon King, a muttir oturatiu Setan me noun kewe chonlang mi ngau seni lon lang ngeni fonufan. Ina ewe popun a chok ngangngauelo lapalapen fonufan seni 1914. (Pwarata 12:9, 12) Ekkewe maun, lengita, malapalap, lapaloon atai alluk—ekkeei mettoch meinisin ir kinikinin ewe “esissin” mi pwarata pwe Jises a nemenem me ei otot a nom lon an kewe ranin le sopwoloon.—Mattu 24:3, 7, 8, 12; Luk 21:10, 11; 2 Timoti 3:1-5.
5. Arapakan chok, Jises epwe apwungu aramas, epwe aimufesenniir ussun chok emon chon masen siip a aimufesenni ekkewe siip seni ekkewe siike. Ekkewe “siip” epwe wewe ngeni ir kewe mi pwisin annetata ar tuppwol ngeni i. Repwe kuna manau esemuch won fonufan. Ekkewe “siike” epwe wewe ngeni ir kewe mi oput an Kot we Muu. (Mattu 25:31-34, 46) Arapakan chok, Jises epwe nnielo meinisin mi ussun chok siike. (2 Tesalonika 1:6-9) Ika en mi mochen om kopwe nom lein noun Jises kewe “siip,” epwe lamot om kopwe auseling ngeni porausen ewe Muu me akkapwonueta minne ka kaeo lon manauom.—Mattu 24:14.
6. Lon ei fansoun, ewe fonufan a kaimufesen lon chommong muu. Ir meinisin a wor pwisin en me an nemenem. Fan chommong ekkewe muu repwe fiufengen. Nge an Kot we Muu epwe siwili meinisin an aramas kewe muu. Epwe ewe chok muu mi nemeni unusen fonufan. (Taniel 2:44) Iwe, lon ena fansoun, esap chuen wor maun, atai alluk, me foffor mi mwanesol. Aramas meinisin repwe nonnomfengen fan kinamwe me tipeeu.—Mika 4:3, 4.
7. Atun an Jises Nemenem ukuukun Engerou Ier, aramas mi tuppwol repwe unusochulo, me unusen ewe fonufan epwe wiliiti eu paratis. Lupwen epwe tori muchuloon ekkewe engerou ier, Jises epwe fen fori mettoch meinisin Kot a awisa ngeni. Iwe mwirin, epwe eniwili ewe Muu ngeni Seman we. (1 Korint 15:24) Pwata kese ereni chienom kewe me attongom kewe ussun minne an Kot we Muu epwe fori?
[Sasing lón pekin taropwe 13]
Fan an Jises nemenem, esap chuen wor oput are apap