Áweweei Pwóróusen ewe Mwúún Kot
Kinikin 1: Ifa usun sipwe apwénúetá wisach le esilefeili Mwúún Kot we? Neman sipwe efisi án aramas repwe sani le rongorong ren ach poputááni ewe pwóróusfengen ren ekkewe ekkóch pwóróus nge mwirin epwe ffatoló pwe met wesewesen sia mochen apwóróusa ngeniir ina ewe pwóróus usun Mwúún Kot we.
Ewe mettóch mi lamot epwe kapachelong lón ei angang, ina ach álleani are aloni alon ekkewe wokisin mi weneiti ewe Mwúún Kot. Ika ka fós usun ewe Mwúún Kot, túmúnú pwe chókkewe ka fós ngeniir repwe weweiti met weween. Neman kopwe ekis áweweei lap seni óm kopwe chék apasa pwe ina eú mwú. Eli a weires ngeni ekkóch ar repwe ekieki ena Mwúún Kot pwe rese tongeni kúna. Neman kopwe áeá ekkóch mettóch le áweweei. Áwewe chék, ewe ásepwál sise tongeni kúna nge a fókkun lamot ngeni manawach. Iwe ina usun, kich sise tongeni kúna ewe Emén mi fératá ewe ásepwál nge mi ffat pwe i a wor an manaman chapur. Ewe Paipel a apasa pwe i “ewe King mi nonom tori feilfeilachök.” (1 Tim. 1:17) Are ka tongeni eáni ei áwewe, lón ekkóch fénú mi watte, chómmóng aramas ese fán eú ar kúna néúr we sou nemenem are ewe leeni ikewe ie ra mwimmwich ie. Nge ra chék silei pwóróusan seni met ra towu lón news. Pwal ina chék usun, ewe Paipel a ffér lón 2,200 fósun fénúfan, iwe a áiti ngenikich pwóróusen Mwúún Kot we. A áiti ngenikich ié kewe ra wisen sou nemenem me met ena Mwú a féfféri iei. Tori iei Ewe Leenien Mas a chúen féri minne a mak lúkúnpéén ei puk, a erá “A Esilefeili Án Jiowa We Mwú.” Ese pwal wor eú puk a afféútiw lón sókkópaten fós epwe usun Ewe Leenien Mas.
Ren óm kopwe álisi aramas le weweiti ewe Mwúún Kot, neman kopwe apasa ekkóch mettóch ra sani pwe pwisin mwúúr we epwe awora, áwewe chék ren tufichin manawer, kinamwe, ngas seni atai allúk are lifilifil aramas, sukul me túmúnún péchékkúlen inis. Áiti ngeniir pwe ewe chék Mwúún Kot epwe unusen ataweei ekkena mettóch me meinisin án aramas mochen mi pwúng.—Kölf. 145:16.
Achocho le achchúngú letipen aramas ar repwe efich le onómu pwisin iir fán nemenien ewe Mwú nge Jesus Kraist a nennemenem lón usun emén King. Eiteita ekkewe manaman Jesus a féri atun a nóm wóón fénúfan pwe repwe weweiti met epwe féri lón láng. Apasa napanapan kewe mi múrinné a eáni. (Mat. 8:2, 3; 11:28-30) Áweweei pwe a asoresini manawan fán itach nge mwirin Kot a amanawatá lón eú manaw lón láng ese tongeni taló me kitetteriló. Nge iei Jesus a nennemenem seni láng usun emén King.—Föf. 2:29-35.
Kinikin 2: Affata pwe án Kot we Mwú a nennemenem seni láng. Kopwe mirititi pwe lap ngeni aramas rese kúna met ra ekieki epwe fis atun án Kot we Mwú a nemenem. Kopwe weweiti ekiekiir nge eisiniir ika ra silei met Jesus Kraist a apasa pwe esissillen an nemenem. Menlapei ekkóch kinikinin esissillen pwe án Kot we Mwú a nennemenem, áwewe chék ekkewe ra mak lón Mateus sópwun 24, Markus sópwun 13 are Lukas sópwun 21. Mwirin eisiniir ika pwata án Jesus wiseni ewe wis King a efisi ekkena sókkun osukosuk wóón fénúfan. Áiti ngeniir Pwärätä 12:7-10, 12.
Álleani Mateus 24:14 fán iten ekkewe pisekin pwáraatá aramas ra kúkkúna ren met ewe Mwúún Kot a féfféri iei me áweweei ewe kókkótun káéén Paipel mi fiffis iei wóón unusen fénúfan. (Ais. 54:13) Ereniir usun ekkewe sókkópaten sukul mi álilliséch ngeni Chón Pwáraatá Jiowa, meinisin ra lóngólóng wóón ewe Paipel nge ese kamé. Áweweei pwe me lúkún ach féri ewe angangen afalafal imw me imw, sia suuki ngeni emén me emén are ekkewe famili ar repwe káé ewe Paipel lón pwisin imwer nge ese kamé me a fiffis lón lap seni 230 fénú. Itá mi pwal wor eú mwúún aramas a tongeni awora ena sókkun prokramin sukul mi fókkun múrinné esap chék fán iten chón fénúer nge pwal aramas meinisin wóón unusen fénúfan? Etiwa aramas pwe repwe fiti mwich lón ewe Leenien Mwich, fiti ekkewe mwichelap án Chón Pwáraatá Jiowa pwe repwe kúna pisekin ánnet usun ena sókkun káit mi fókkun álilliséch ngeni manawen aramas.—Ais. 2:2-4; 32:1, 17; Joh. 13:35.