Säräfö, Met Oupwe Föri Lon Manauemi?

EMÖN föpwül a erä: “Ua chök mochen met mi fokkun mürinnö lon manauei.” Ese mwääl ina met ka pwal mochen. Nge ifa usun kopwe angei ewe mettoch mi “fokkun mürinnö” fän iten manauom? Eli kopwe rongorong seni chienom kewe, noum kewe sense me ekkewe TV, reitio, simpung me met kkan pwe om eäni eü angang mi mürinnö me watte peioffun, ina kiien om sopwöch!

Iwe nge, ewe Paipel a öüröüra ekkewe säräfö pwe ar chechchei wöün fönüfan, a usun chök “turufi asepwäl.” (Än Salomon Afalafal 4:4) Ekkoch säräfö ra fen wöüöch me iteföülo, nge fän chommong ra lichippüng. Iei alon emön säräfö seni Britain mi akkomwa sukul tekia, a erä pwe a lamotongaw pisekisek, “a usun chök eü pwoor mi pöön, ka nennelong lon nge ese masou.” Ewer, fän ekkoch angangen moni a tongeni atoto wöüöch me iteföülo, nge ese tongeni älisuk lon om riri ngeni Kot. (Mattu 5:3) Pwal och, 1 Jon 2:17 a apasa pwe mettochun ‘fönüfan epwe morolo.’ Inaamwo ika ka sopwöch iei, nge epwe chök nom lon fansoun mwochomwoch.

Än Salomon Afalafal 12:1 a öüröüra ekkewe säräfö: ‘Oupwe chechemeni ewe mi Förikemi.’ Ewer, om äeä manauom le angang ngeni Jiowa Kot, ina ewe mi fokkun mürinnö seni meinisin. Nge akkomw kopwe föri och mettoch pwe epwe fich om kopwe angang ngeni Kot. Ifa usun kopwe föri ena? Met weween om kopwe äeä unusen manauom le angang ngeni Kot?

Kopwe Fich Ngeni Emön Chon Pwäratä Jiowa

Akkomw, kopwe ämääraatä om mochen angang ngeni Kot, nge ena mochen ese chök pükün fisitä, inaamwo ika semom me inom iir Chon Kraist. Epwe pwisin wor om riri ngeni Jiowa. Iei alon emön föpwül: “Ikkiotek a älisuk le pwisin riri ngeni Jiowa.”​—Kölfel 62:8; Jemes 4:8.

Ewe Paipel a menlapei pwal och mettoch kopwe föri. A erä pwe kopwe “pwarata minne letipen Kot, minne mi murinno o fich o unusoch.” (Rom 12:2, TF) Ka piin tipemwaramwar woon ekkoch pworaus ka fen käeö? Iwe, kopwe apwönüetä än Paipel kapasen pesepes me pwisin “pwarata” pwe ra pwüng ekkena pworaus! Kopwe pwisin kütta ekkewe pworaus. Älleani ewe Paipel me ekkewe puken äweween Paipel. Om käeö usun Kot ese chök wewe ngeni om amasoua tupwuom, nge a pwal lamot kopwe awora fansoun le ekilonei met ka älleani me fotukalong lon letipom. Ena mettoch epwe efisi määritään om tongei Kot.​—Kölfel 1:2, 3.

Kopwe sotun apworausa ngeni chienom kewe chon sukul usun met ka käkkäeö. Mwirin, ka tongeni fiti ewe angangen afalafal imw me imw. Fän ekkoch eli kopwe chuuri chienom chon sukul lupwen ka afalafal, iwe, neman kopwe meefi säw lon ena atun. Nge ewe Paipel a pesekich pwe sisap “säwäsini” ewe kapas allim. (Rom 1:16) Ka uwei ewe pworausen manau me äpilükülük, iwe, pwata kopwe säw ren?

Iwe, ika semom kewe me inom iir Chon Kraist, neman ka fen fiffitiir le akkafalafal. Ka chök fitiir nge kese foffos ngeni aramas, are ka chök anöünöü ngeniir ekkewe puk me chökükkün taropwe? Are, ka pwisin afalafal me nöünöü ewe Paipel le asukula ewe chon imw? Ika kese mwo, iwe, kütta älillis seni semom kewe me inom are emön mi äsimaü lon ewe mwichefel. Achocho pwe kopwe wiliiti emön chon afalafala ewe kapas allim esaamwo papatais!

Ekiselo, kopwe filatä le fangolo manauom ngeni Kot me pwon le angang ngeni. (Rom 12:1) Fangolo manau eü mettoch lefilach chök me Kot. Nge, Jiowa a pwal mochen pwe sipwe “pwarata ren auach.” (Rom 10:10, TF) Mwen kopwe papatais lon konik, kopwe pwär ngeni aramas om lükü. (Mattu 28:19, 20) Ewer, a kon lamot ewe mettoch papatais. Kosap tipemwaramwar ren om ekieki pwe kopwe ttur. Ika kopwe lükülük pwe Kot epwe apöchökkülok, iwe, epwe ngonuk “pochokkulen ewe manaman mi nonnom ren” pwe epwe älisuk le üppos.​—2 Korint 4:7, TF; 1 Piter 5:10.

Atun ka papatais, ka wiliiti emön Chon Pwäratä Jiowa. (Aisea 43:10) Ei mettoch epwe fokkun achchünguk le etittina ifa usun kopwe äeäöchü manauom. Fangolo manau ngeni Kot a wewe ngeni ‘pennuku manau.’ (Mattu 16:24) Eli kopwe pennüküolo mochenum ren om “kuttafichi lom an [Kot] mu.” (Mattu 6:33, TF) Ina minne, om fangolo manauom me papatais ra suuki ngonuk chommong alen om kopwe akkomwa än Kot kewe angang me äeä unusen om fansoun. Sipwe ppii ekkoch me lein ekkena angang.

Angangen Kot mi Suuk Ngonuk

● Angangen Pioneer. Emön Chon Kraist mi papatais me isetiw leenien äppirü mi mürinnö a tongeni fiti angangen pioneer ren an akkota pwe iteiten maram epwe nöüni 70 awa, are lap seni le afalafala ewe kapas allim. Om alapaalo om fansoun le afalafal epwe älisuk le lipwäköchülo lon ena angang me asukula aramas. Chommong pioneer ra küna pwapwa le älisi nöür kewe chon käeö le wiliiti Chon Pwäratä mi papatais. Itä mi pwal wor eü angang me lükün ach angang ngeni Kot, epwe atoto menemenöch me pwapwa wachemwuk?

Lap ngeni ekkewe pioneer ra aükükü ar angangen moni pwe repwe chök ataweei minne ra osupwang ren. Chommong ra mmolnetä mwen repwe pioneer ren ar käeö lon high school angangen täikü, fför mwesin, me tete. Me käeö seni ekkewe watte angangen antikräf, atake, me kuk. Ika ämi me semom kewe me inom oua meefi pwe mi lamot om kopwe pwal sopwelo om sukul mwirin high school, kopwe tumunu pwe ewe popun om sopwelo om sukul esap fän iten om kopwe kütta watteen moni, nge epwe fen atufichi om angangen afalafal, are ika ka fiti ewe angangen pioneer.

Iwe nge, emön pioneer ese akkomwa lon manauan angangen moni, nge a akkomwa an angangen afalafal me älisi aramas le küna manau! Pwata kese achocho le wiliti emön pioneer? Angangen pioneer a emmwen ngonuk pwal ekkoch angangen Kot, äwewe chök, ekkoch ra mwöküt ngeni ikewe mi osupwangen chon afalafal ie. Nge, ekkoch ra käeö eü mineföön fos me älillis lon ekkewe mwichefel mi eäni ena fos lon pwisin fönüer, are älillis lon ekkoch fönü. Pwüngün, angangen pioneer a atoto manau mi ur ren feiöch!

● Angangen Misineri. Seni 1943 a poputä ewe sukulen misineri fän iten ekkewe pioneer mi lipwäköch pwe repwe angei käit mi fokkun mürinnö. Wesin ar na sukul ra titiilo ngeni ekkoch fönü pwe repwe afalafal. Lap ngeni lon ekkeei fönü a weires nonnomun manauen aramas, ina pwata mi lamot ngeni ekkewe misineri ar repwe pöchökkül. Inaamwo ika a ina usun, nge ekkewe misineri ra menemenöch me pwapwaiti manauer.

● Sukulen Paipel fän iten ekkewe Mwän mi Lipich. Ena sukul fän iten ekkewe elter me ministerial servant mi lipich me lipwäköch. Epwe fis lon ükükün walu wiik, nge repwe käeö wiser kewe lon mwichefel, kokkotun ewe mwicheich me afalafal lein aramas. Ekkoch ra titiilo ngeni ekkoch fönü, nge ekkoch ra älillis lon pwisin fönüer.

● Angang lon Bethel. Emön epwe angang lon eü keangen ofesilapen Chon Pwäratä Jiowa nge esor peioffun. Ekkoch chon Bethel ra angang lon leenien fför puk. Ekkoch ra älisatä angangen Bethel, ren ar tumunu ewe leeni me pisekin lon, are tumunu chon angang lon. Meinisin ekkena angang, iir angang mi piin fän iten Jiowa. Pwal och, ekkewe ra angang lon Bethel ra pwapwa pwe ra silei pwe ese lifilifil met ra eäni angang, nge a efeiöchü pwiir kewe woon unusen fönüfan.

Fän ekkoch pwiich kewe mi lipwäköch lon eü tufich ra ketiw le angang lon Bethel. Nge lap ngeniir, ra käeö ar angang lupwen ra nom lon Bethel. Chokkana rese angang pwe repwe achommongaalo pisekiir. Nge ra menemenöch ren met a kawor ngeniir ren möngö, ruumwer me ekis älillis fän iten tufichiir. Iei alon emön säräfö mi angang lon Bethel: “A fokkun öch! Inaamwo ika ese mecheres ai eörenaalo kkotun, nge a atoto rei chommong feiöch.”

● Älillis lon Kaütään Leenien Mwich are Keangen Ofes. Ekkewe mi fiti ei angang ra säi ngeni ekkoch fönü pwe repwe älillis lon angangen kaütään leenien mwich are keangen ofes. Iei eü angang mi pin usun chök ewe angangen kaü imwen fel lon fansoun King Salomon we. (1 King 8:13-18) Kokkotun tumunuun ekkena chon angang a usun chök kokkotun chokkewe mi angang lon Bethel. A ifa me watteen feiöchün pwiich kewe mi eäni ei sokkun angang fän iten lingeloon Jiowa!

Angang Ngeni Jiowa Lon Unusen Manauom

A kon mürinnö seni meinisin om äeä manauom le angang ngeni Jiowa. Pwata kese achocho le äeä unusen om fansoun le angang ngeni Kot? Kopwe fos ngeni semom kewe me inom, ekkewe elter lon om mwichefel me ekkewe elter mi säifetäl usun ekkeei angang sia fos usur. Atun ekkewe ruu ränin mwichelap, kopwe fiti ewe mwich a kan fis fän iten chokkewe mi mochen angang lon Bethel, misineri, are fiti ewe sukulen Paipel fän iten ekkewe mwän mi lipich.

Ewer, esap meinisin repwe tongeni äeä unusen ar fansoun le angang ngeni Kot. Fän ekkoch apwangapwangen inis, osupwangen moni, me wis lon famili epwe tongeni aükükü met emön a tongeni föri. Nge meinisin mi fen fangolo manauer ngeni Jiowa Kot repwe apwönüetä ei allük seni Paipel: “Kopwe tongei om Samol Kot ren unusen letipom, o ren unusen [manauom], o ren unusen ekiekum.” (Mattu 22:37, TF) Jiowa a kütta sonuk om kopwe angang ngeni ren ükükün om tufich. Iwe, ese pwal lifilifil nonnomun manauom, nge kopwe akkomwa om angang ngeni Jiowa. Isetiw eü angang kopwe föri fän iten Kot me achocho le tikeri. Ewer, le säräfoom “kopwe chechemeni ewe mi föruk.” Iwe, kopwe feiöch tori feilfeilo ika kopwe apwönüetä ekkeei kapas!

Ika ese affatetiw menni Paipel ekkewe wokisin ra pop seni, sia nöünöü ewe Paipel itan Paipel are Testamentin Lom me Testament Söfö. Ekkewe mesen mak TF mwirin eü wokisin ra wewe ngeni pwe a pop seni ewe Paipel itan Testament Mi Fö Pwal Köl Fel.