Ifa án Ekkewe Mwán mi Ásimaw Angang fán Iten ewe Mwichefel?

Lón ám we mwicheich ese wor néúwis mi peiof. Nge, mi wor ekkewe chón túmún ra fichiiti me kefilitá ar repwe “chon masen ewe mwichefelin Kot,” usun chék lón ewe fansoun a kerán poputá ewe mwichefelin Chón Kraist. (Föför 20:28) Ekkeei mwán, iir mi ásimaw lón pekin lúkú, ra emmweni me túmúnú ewe mwichefel ‘ren unusen letiper . . . nge esap me lüküntiper . . . sap fänäsengesin ar chök mochen angei liwin, nge seni wesewesen ar mochen föri ewe angang.’ (1 Petrus 5:1-3) Ikkefa ekkewe angang ra féri fán ásengesim?

Ra áfánnikem me túmúnúkem. Ekkewe mwán mi ásimaw ra emmweni me álisi chón ewe mwichefel le amwéchú ar riri ngeni Kot. Pokiten ekkewe mwán mi ásimaw ra silei pwe Kot a ewisa ngeniir ei wis mi lamot, iwe rese nemeni néún kewe aramas, nge ra fen álisiir ar repwe péchékkúl me pwapwa. (2 Korint 1:24, TF) Usun chék emén chón masen siip mi túmúnú emén me emén néún kewe siip, ekkewe mwán mi ásimaw ra achocho ar repwe sileéchú emén me emén chón ewe mwichefel.​—Än Salomon Fos 27:23.

Ra asukulakem ifa usun aupwe féri letipen Kot. Iteiten wiik, ekkewe mwán mi ásimaw ra emmweni án ewe mwichefel kewe mwich pwe repwe apéchékkúla ar lúkú. (Föför 15:32) Ekkeei mwán mi tuppwél ra pwal emmweni ewe angangen afalafal, ra fitikem le afalafal me asukulakem lón meinisin kinikinin ewe angangen afalafal.

Ra awora ngeni emén me emén leim kapasen apéchékkúl. Ren án ekkewe mwán mi ásimaw lón ám mwichefel repwe álisi emén me emén leim lón ám riri ngeni Kot, ra tongeni chuurikem lón imwem are lón ewe Leenien Mwich pwe repwe awora álillis me auruur seni ewe Paipel.​—James 5:14, 15.

Me lúkún án ekkewe mwán mi ásimaw angang lón ewe mwichefel, lap ngeniir a pwal wor ar angangen atufichi me túmúnú wiser lón ar famili. Mi fich ach sipwe súféliti ekkeei mwán mi ásimaw mi angang weires.​—1 Tesalonika 5:12, 13.

• Ifa án ekkewe mwán mi ásimaw angang lón ewe mwichefel?

• Ifa usun ekkewe mwán mi ásimaw ra pwáraatá ar áfánni emén me emén chón ewe mwichefel?