Jeremaia Ese Úkútiw le Kakkapas Usun Jiowa

Fán ekkóch, aramas ra takirikich are song ngenikich atun sia fós ngeniir usun Jiowa. Ena mettóch a efisi ach mochen úkútiw le kakkapas usun Kot. Ka fen piin meefi ena?— Ewe Paipel a erenikich usun emén alúwél mi tongei Jiowa, nge arapakkan itá epwele úkútiw le kakkapas usun. Itan Jeremaia. Sipwele pwal káé ekkóch pwóróus usun.

Atun Jeremaia a chék alúwél, Jiowa a ereni an epwe éúréúra aramas pwe repwe úkútiw seni ar féri minne mi ngaw. Ena mettóch a weires ngeni Jeremaia me a pwal niwokkus. A ereni Jiowa: ‘Use silei met upwe apasa. Ngang chék emén kúkkún.’ Nge Jiowa a apasa: ‘Kosap niwokkus. Upwe álisuk.’

Iwe, Jeremaia a poputá le éúréúra aramas pwe ika rese siwili manawer, iwe repwe kúna kapwúng. Óm ekiek nge ekkewe aramas ra féri minne Jeremaia a apasa?— Aapw. Ra takiri are fókkun song ngeni. Ekkóch ra pwal mwo nge mochen nieló! Óm ekiek nge ifa meefien Jeremaia?— A niwokkus me apasa: ‘Usap chúen fós usun Jiowa.’ Nge itá a fangetá?— Aapw, ese. A fókkun tongei Jiowa pwe ese tongeni úkútiw le kakkapas usun. Me pokiten Jeremaia ese fangetá, iwe Jiowa a túmúnú.

Áwewe chék fán eú, ekkóch mwán mi ngaw ra oturalong Jeremaia lón eú pwang mi alóllóól mi ur ren pwakak. Ese wor anan me únúman. Ekkena mwán ra likitaló Jeremaia pwe epwe máló ikena ie. Nge ren álillisin Jiowa, a ngaseló!

Met ka tongeni káé seni pwóróusen Jeremaia?— Inaamwo ika fán ekkóch a niwokkus, nge ese úkútiw le kakkapas usun Jiowa. Atun ka fós usun Jiowa, neman aramas repwe takiruk are song ngonuk. Neman kopwe sáw me pwal mwo nge niwokkus. Nge kosap fókkun úkútiw le kakkapas usun Jiowa. Epwe álisuk iteitan, usun chék an álisi Jeremaia.