KINIKIN 1
“Üpwe Kütta Chokewe mi Pöütüla”
Ewe siip a osukosuk. A chék mwémmwéngé fetil lón ewe masies, iwe ese tepereni nge a towauoló seni ekkewe pwal ekkóch siip. Iei, ese chúen tongeni kúna ewe chón masen siip me ekkewe ekkóch siip. Epwele pwiniló. A mworukoló ngeni ewe lemool, ikewe ia manmwacho ra kan kútta óchar man ie nge ese wor emén epwe tongeni túmúnú. Iwe kilisou pún ewe siip a rongorong léúwen emén mi sissilei, ina i néún we chón mas. A ssáto ren ewe siip, a ekielóng lón numun úfan we, me uwei ngeni leenian.
FÁN chómmóng Jiowa a apasa pwe i a usun ena sókkun chón masen siip. Iei met a alúkúlúkú ngenikich lón an we Kapas: “Püsin ngang üpwe kütta nei sip kana o tümwünüür.”—Isikiel 34:11, 12.
“Üa Folenikemi Ämi Nei Aramas”
Ié kewe néún Jiowa siip? Iir ekkewe aramas mi tongei Jiowa me fel ngeni i. Ewe Paipel a apasa: “Ousipwe chapetiu o fel ngeni, ousipwe fotopwäsuk fän mesen ewe Samol mi Lapalap ewe chon förikich. Pun i ach Kot, nge kich nöün aramas i a tümwünü, kich nöün mwichen sip i a foleni.” (Kölfel 95:6, 7) Ekkewe wesewesen siip ra tattapweló mwirin néúr we chón mas, pwal ina chék usun ekkewe chón fel ngeni Jiowa ra pwapwa le fiffiti emmwenien néúr we Chón Mas. Nge néún Kot kewe chón angang iir mi unuséch? Aapw. Fán ekkóch néún Jiowa kewe siip ra “toropasfeil” are “mwalechela.” (Isikiel 34:12; Mateus 15:24; 1 Petrus 2:25) Ikaamwo emén a towauoló seni Jiowa, nge Jiowa ese likitaló i me ekieki pwe a fen unusen péútúló.
Ka chúen ekieki pwe Jiowa i noum Chón Mas? Ifa usun Jiowa a pwáraatá pwe i emén Chón Masen siip lón ei fansoun? Nengeni ekkeei úlúngát mettóch:
A amwéngéénikich lón pekin lúkú. Iei met Jiowa a apasa: “Üpwe amongöü ngeniir fetil mi mürina . . . Ikenan repwe kon won leni mi mürina fän kinamwe o kütta ener mongö mi annö.” (Isikiel 34:14) Fansoun meinisin Jiowa a kan akkawora ngenikich sókkópaten mwéngé lón pekin lúkú mi apéchékkúlakich. Ka tongeni chechchemeni eú afalafal, video prokram, are eú lesen a apéchékkúlok mi pélúweni óm tingoren álillis seni Kot? Ese fen ánneta ngonuk pwe Jiowa a tongeok?
A túmúnúkich me álisikich. Jiowa a pwonei: “Üpwe . . . aliwini chokewe mi malechela, üpwe filiti kinasen chokewe mi kinas o apöchöküla chokewe mi apwangapwang.” (Isikiel 34:16) Jiowa a apéchékkúla chókkewe ra fen apwangapwangoló me choutiw ren ar aúreki manawer. A filiti kinásen néún kewe siip, álisiir an epwe móló metekin letiper, eli pwal mwo nge ren pwisin pwiir kewe chón lúkú. Pwal och, Jiowa a eliwini ngeni i chókkewe mi fen mwálecheló, iir kewe neman ra chúen fiu ngeni pwisin ar kewe ekiek ese pwúng.
A meefi pwe wisan an epwe túmúnúkich. Jiowa a erá: “Üpwe amanaueer seni ekis meinisin ia ra toropasfeil ie . . . Üpwe kütta chokewe mi pöütüla.” (Isikiel 34:12, 16) Jiowa ese ekieki pwe emén mi mwálecheló a fen unusen péútúló. A silei ika emén siip a péútúló, iwe a ló kútta me a pwapwa lupwen a kúna i. (Mateus 18:12-14) Ewer, iei met Jiowa a erá usun ekkewe chón fel ngeni mi enlet: “Ämi nei sip kana, üa folenikemi ämi nei aramas.” (Isikiel 34:31) En emén lein ekkena siip.
Jiowa ese ekieki pwe emén siip mi mwálecheló a fen unusen péútúló. A pwapwa lupwen a kúnasefáli
“Aliwinisefäli Lingem Usun me Lom”
Pwata Jiowa a kúkkútók me ekketiwók óm kopwe liwiniti i? Pokiten i a mochen kopwe pwapwa. A pwonei pwe epwe efeiéchú néún kewe siip. (Isikiel 34:26) An na pwon ese péén. Ka fen pwisin kúna enletin an na kapas.
Chemeni ewe fansoun lupwen ka poputá le silei Jiowa. Áwewe chék, met meefiom lupwen ka kerán silei ewe enlet mi ámmeseik usun iten Kot we me minne a tipeni fán iten aramas? Ka chechchemeni apwapwaan óm nóm ren chienom kewe Chón Kraist mi tipeeúfengen atun mwichelap? Kese pwal wenewenen pwapwa mwirin óm afalafala ewe kapas allim ngeni emén mi pwapwaiti?
Ka pwal tongeni meefisefál ekkena esin pwapwa. Iei án néún Kot kewe chón angang lóóm iótek: “Äm Samol mi Lapalap, kopwe aliwinikem ngonuk pwe äm aipwe tongeni liwinituk. Kopwe aliwinisefäli lingem usun me lom.” (Kölün Kechü 5:21) Jiowa a pélúweni ena iótek me néún kana aramas ra liwiniti pwe repwe pwapwasefál le angang ngeni i. (Nehemia 8:17) Jiowa epwe pwal tongeni álisuk pwe kopwe liwiniti i.
Nge, ese mecheres án emén poputá le liwiniti Jiowa. Ppii ekkóch mettóch mi eppeti emén an epwe liwiniti Jiowa me ifa usun ka tongeni pwákiniir.