Ié Na Jop?

A wor emén mwán mi fel ngeni Jiowa lón ewe fénú Us. Itan Jop. A fókkun pisekisek me a watte an we famili. A kirekiréch me álisi aramas mi osupwang, ekkewe fefin mi má pwúlúwer, me ekkewe semirit ese wor semer me iner. Nge pokiten a féri met mi éch, iwe itá a wewe ngeni pwe esap wor an osukosuk?

Setan, ewe Tefil a kan kakkatol Jop, nge Jop ese silei ena. Jiowa a ereni Setan: ‘Ka kúna nei we chón angang Jop? Ese wor emén wóón fénúfan a ussun i. A aúseling ngeniei me féri minne mi múrinné.’ Setan a pélúweni: ‘Ewer, nge Jop a chék álleasochisuk pokiten ka túmúnú me efeiéchú. Ka liffang ngeni fénúan me néún man. Nge kopwe angei seni meinisin, iwe epwe úkútiw le fel ngonuk.’ Jiowa a ereni: ‘Ka tongeni féri met úchék ka mochen féri ngeni Jop. Nge kosap chék nieló.’ Pwata Jiowa a erá ena? A fókkun lúkúlúk pwe Jop epwe chék túppwél ngeni.

Setan a efisi chómmóng án Jop riáfféú. Akkomw, a tiinaaló ekkewe chón Sapa ar repwe solááni néún Jop kewe átemwánnin kou me aas. Mwirin ekkei a kenaaló néún Jop kewe siip. Me pwal eú kúmiin aramas, iir chón Kaltea ra solááni néún kewe kamel. Ekkewe chón angang mi túttúmúnú ekkena man ra niniiló. Nge minne a fis mwirin ena a kon ssenúk pwe meinisin néún Jop kewe ra máló atun ewe imw ra kametip lón a turutiw wóór. Jop a fókkun letipechou, nge ese úkútiw le fel ngeni Jiowa.

Setan a mochen alapaaló án Jop weires, ina popun a efisi án unusen inisin epwe kilingaw. A metekitek unusen inisin Jop. Ese silei pwata ekkena mettóch meinisin ra fis ngeni. Iwe nge, a chúen fel ngeni Jiowa. Kot a kúna met a fis, me a fókkun pwapwa ren Jop.

Setan a tiinaaló úlúmén mwán pwe repwe tipimwáál ngeni Jop. Ra ereni: ‘Eli ka tipis me sótun opaaló. Kot a apwúnguk.’ Jop a erá: ‘Úse mwo féri met mi mwáál.’ Nge mwirin a poputá le ekieki pwe Jiowa a efisi an kewe osukosuk, me a erá pwe Kot ese féri met mi pwúng.

Emén alúwél itan Elihu a akkaúseling ngeni ar pwóppwóróus. Mwirin a fósetá me erá: ‘Meinisin minne oua erá a mwáál. Jiowa a lap seni met sia tongeni weweiti. Ese tongeni féri met mi ngaw. A kúna mettóch meinisin me a álisi aramas ren ar kewe osukosuk.’

Mwirin Jiowa a fós ngeni Jop. A erá: ‘Ia ka nóm ia atun úa féri láng me fénúfan? Pwata ka erá pwe úse féri met mi pwúng? Ka kapas, nge kese silei pwata ekkewe mettóch a fis.’ Jop a erá: ‘Úa mwáál. Úa rong ussum, nge iei úa fókkun sileek. Ese wor met ese tufich ngonuk. Omusaaló tipisi ren met úa erá.’

Mwirilóón, Jiowa a apéchékkúlasefáli Jop me a ngeni lap seni met a fen wor ren me akkomw. Jop a manawattam me pwapwa. Jiowa a efeiéchú Jop pokiten an aúseling ngeni pwal mwo nge atun a áweires. Ka tongeni ussun Jop le sópweeló le fel ngeni Jiowa ese lifilifil met epwe fis?