Moses A Filaatá le Fel Ngeni Jiowa

Jekop me an we famili ra silleló pwe iir chón Israel me lón Isip. Mwirin án Jekop me Josef ra máló, emén minefé Farao a poputá le nemenem. A niwokkus iká ekkewe chón Israel repwe péchékkúl seni ekkewe chón Isip. Ina popun Farao a néúni chón Israel slave. A oumwesiir ar repwe ffér plak me angang weires lón ekkewe atake. Nge lapólóón án chón Isip eriániir le angang weires, pwal ina lapólóón chómmóngun ekkewe chón Israel. Pokiten Farao ese sani ena, a allúkú pwe néún ekkewe chón Israel át mi kerán uputiw repwe niniiló. Ka tongeni anchangei úkúúkún án ekkewe chón Israel niwokkus?

A wor emén fin Israel itan Jokopet, mi wor emén néún át mi átéch. Ren an epwe túmúnú, a waalong lón eú pasikit me a opaaló lein ewe wówó únúkkún ewe chénúpupu Nil. Fefinen ewe ménúkol itan Miriam a útá ekis towaw pwe epwe kúna met epwe fis ngeni.

Néún Farao we nengngin a feitiw lón ewe chénúpupu pwe epwe tútú, me a kúna emén ménúkol a kechiw lón eú pasikit me a fókkun tongei. Miriam a eisini: ‘Ka mochen úpwe kútta emén fefin pwe epwe oupwu ngonuk ewe semirit?’ Atun néún Farao we nengngin a erá ewer, Miriam a panatosefál inan we, Jokopet. Néún Farao we nengngin a ereni: ‘Kele uwei ei ménúkol pwe kopwe oupwu ngeniei, iwe úpwe méénuk.’

Atun ewe semirit a wattetá, Jokopet a uwealó ren néún Farao we nengngin, ewe a eita ngeni Moses me a túttúmúnú ussun wesewesen néún. Moses a mááritá ussun chék emén néún king me a tongeni angei met chék a mochen. Nge Moses ese fókkun ménúki Jiowa. A silei pwe i wesewesen emén chón Israel, nge esap i chón Isip. Me a filaatá le angang ngeni Jiowa.

Atun a 40 ierin Moses, a filaatá le álisi néún kewe aramas. Atun a kúna án emén chón Isip awata emén slave chón Israel, Moses a awata ewe chón Isip iwe a máló. Moses a opaaló inisin fán ewe ppi. Nge atun Farao a silei ena, a ekiekin nieló Moses. Nge Moses a sú ngeni ewe fénúen Mitian. Jiowa a túmúnú Moses lón ena leeni.