Ra Ú Ngeni Jiowa

Mwirin och fansoun atun ekkewe chón Israel ra nónnóm lón ewe fénúpéén, Kora, Tatan, Apiram, me 250 aramas ra ú ngeni Moses. Ra ereniir: ‘Áúa chipwang reom! Pwata ka wisen emmwen me Aaron a wisen souasor mi lapalap? Jiowa a nónnóm rech meinisin, esap chék en me Aaron.’ Jiowa ese pwapwa ren ena. Me ren, ina eú angangen ú ngeni!

Moses a ereni Kora me chókkewe mi wisen álisi: ‘Oupwe feito ren ewe imwenfel mangaku lesor, me oupwe uwei ámi sepien asoren étúét me appach mi pwokkus. Jiowa epwe pwáári ngenikich ié a fen filaatá.’

Sorotáán ewe rán, Kora me ekkewe 250 mwán ra feiló chuuri Moses ren ewe imwenfel mangaku. Me ikena, ra keni asoren appach mi pwokkus ussun itá nge iir souasor. Jiowa a ereni Moses me Aaron: ‘Oupwe áimukemiiló seni Kora me néún kewe mwán.’

Inaamwo iká Kora a feiló ren Moses ren ewe imwenfel mangaku, nge Tatan, Apiram me ar kewe famili rese mochen feiló. Jiowa a ereni ekkewe chón Israel ar repwe sú seni imwen chón Kora, Tatan, me Apiram kewe tento. Mwittir chék, ekkewe chón Israel ra mwékút seniir. Tatan, Apiram, me ar kewe famili ra útá lúkún imwer kewe tento. Mwittir chék, ewe pwúl a imufesen me ra turulong lón! Ren ewe imwenfel mangaku, eú ekkei a feitiw seni láng me keniieló Kora me néún kewe 250 mwán.

Mwirin Jiowa a ereni Moses: ‘Kopwe angei efóch wok seni ekkewe souemmwen seni eú me eú einang me makkeei iter wóón. Nge wóón wokun ewe einangen Lifai kopwe makkeei iten Aaron. Kopwe waarolong lón ewe imwenfel mangaku, nge wokun ewe emén uwa filaatá epwe pwúk péénirá wóón.’

Sorotáán ewe rán, Moses a uwawu meinisin ekkewe wok me pwáári ngeni ekkewe souemmwen. Wokun Aaron we a pwúk péénirá wóón, me a wor féún almont mi maw wóón. Lón ena napanap, a ffat pwe Jiowa a filaatá Aaron an epwe wisen souasor mi lapalap.