Án Jefta Pwon

Ekkewe chón Israel ra pwal likitaaló Jiowa me poputásefál le fel ngeni ekkewe kot chofona. Atun ekkewe chón Amon ra maunei ekkewe chón Israel, ese wor met ekkena kot chofona ra tongeni féri pwe repwe álisiir. Ren fite ier, chón Israel ra riáfféú. Iwe, ra ereni Jiowa: ‘Áúa tipis ngonuk. Kese mochen selánikemi seni ekkewe chón oputakem.’ Ekkewe chón Israel ra ataieló ar kewe uluulun me ra poputásefál le fel ngeni Jiowa. Jiowa ese mochen epwe chúen kúna ar riáfféú.

Emén soufiu itan Jefta a kefilitá pwe epwe emmweni ekkewe aramas le maun ngeni ekkewe chón Amon. A ereni Jiowa: ‘Iká kopwe álisikem le winneni ewe maun, úa pwon ngonuk pwe atun úpwe liwiniti imwei, úpwe fang ngonuk ewe áeménún aramas mi akkomw towu seni imwei we pwe epwe souniei.’ Jiowa a aúseling ngeni án Jefta na iótek me a álisi le winneni ewe maun.

Atun Jefta a liwiniti imwan, ewe áeménún aramas e towu pwe epwe souni ina i néún we ákkáláeménún nengngin. A pwérúk me opuni an we kaktai. Itá met Jefta epwe féri? A chemeni an we pwon me a erá: ‘Mwa met, nei nengngin! Ka atatakkisi letipei. Úa eáni eú pwon ngeni Jiowa. Ren ái úpwe apwénúetá, a lamot úpwe tiinukoló pwe kopwe angang lón ewe imwenfel mangaku lón Silo.’ Nge néún we nengngin a ereni: ‘Semei, iká ka fen eáni eú pwon ngeni Jiowa, kopwe apwénúetá. Nge met chék úa tingor, kopwe mut ngeniei úpwe nónnóm ren chienei kewe fépwúl wóón ekkewe chuuk ren úkúúkún ruu maram. Mwirin úpwe feiló.’ Néún Jefta we nengngin a angang lón ewe imwenfel mangaku fán túppwél lón ánein manawan. Iteiten ier, chienan kewe ra kan feiló Silo pwe repwe chuuri.