Eú Imwenfel fán Iten Jiowa

Mwirin án Salomon wiliiti kingen Israel, Jiowa a eisini: ‘Met ka mochen úpwe fang ngonuk?’ Salomon a erá: ‘Ngang emén chék kúkkún, iwe úse silei met úpwe féri. Kese mochen kopwe fang ngeniei tipáchem pwe úpwe tongeni túmúnú noum kewe aramas.’ Jiowa a erá: ‘Pokiten ka tingor óm kopwe tipáchem, iwe kopwe wiliiti emén mi tipáchem lap seni meinisin wóón fénúfan. Úpwe pwal fang ngonuk chómmóng wéúm. Me iká ka álleasochisiei, iwe kopwe manawattam.’

Salomon a poputá le aúetá ewe imwenfel. A áeá kolt, silifer, irá, me faw aúchea. Fitengéréú mwán me fefin iir mi sipeéch ra angang wóón ewe imwenfel. Mwirin fisu ier, ra féri efinúnún ewe imwenfel ngeni Jiowa. A wor eú róngen asor, me a wor ekkewe asor wóón. Salomon a fotopwásuk mwen ewe róngen asor me a iótek: ‘Jiowa, ei imwenfel fán itom ese kon watte me lingéch, ese akkarap ngeni lingom, nge kese mochen etiwa ám fel me aúseling ngeni ám kewe iótek.’ Met án Jiowa ekiek ussun ewe imwenfel me án Salomon we iótek? Atun chék Salomon a wes le iótek, ekkei seni láng a feitiw me kenaaló ewe asor wóón ewe róngen asor. Jiowa a etiwa ewe imwenfel. Atun ekkewe chón Israel ra kúna ena, ra fókkun pwapwa.

King Salomon a silleló ren an tipáchem lón unusen Israel, pwal mwo nge lón ekkewe leeni mi towaw. Aramas ra kan kútta álillis seni Salomon ren ar kewe osukosuk. Pwal mwo nge ewe kiwinen Sepa a feito pwe epwe sótuni ren an eisini kapas eis mi áweires. Atun a rongorong an pélúweni ekkena kapas eis, a erá: ‘Úse lúkú met aramas ra ereniei ussum, nge iei úa kerán lúkú pwe a kon luló óm tipáchem seni met ra fen erá. Óm we Kot, Jiowa, a fókkun efeiéchuk.’ Ewe mwúún Israel a kinamwe, me ekkewe aramas ra fókkun pwapwa. Nge a solap pún ekiseló mwirin, a poputá chómmóng osukosuk.