Emén Soufiu me Emén Kúkkún Nengngin

A wor emén kúkkún nengnginin Israel lón ewe fénú Siria, mi towaw seni leenian. Ekkewe soufiun Siria ra angei ena nengngin seni an we famili, iwe a wiliiti emén chón angang ngeni pwúlúwen emén meilapen soufiu itan Naeman. Ena kúkkún nengngin a fel ngeni Jiowa, inaamwo iká ekkewe aramas a nóm leir rese.

A úri Naeman eú watteen kilingaw, me a chék memmetek ren. Ewe kúkkún nengngin a fókkun mochen álisi. A ereni pwúlúwen Naeman we: ‘A wor emén úa sissilei a tongeni echikara pwúlúwom we. A wor emén néún Jiowa soufós itan Elisa lón Israel, a tongeni echikara.’

Pwúlúwen Naeman we a ereni Naeman met ewe kúkkún nengngin a erá. A tipemecheres le sótuni met chék epwe tongeni chikar ren, ina popun a feiló ren imwen Elisa we lón Israel. Naeman a ekieki pwe atun Elisa epwe chuuri, epwe etiwaéchú ussun emén mi aúchea. Nge Elisa ese pwisin etto fós ngeni, nge a fen tiinaaló néún we chón angang an epwe ereni ei pwóróus: ‘Kopwe feiló tútú fán fisu lón ewe Chénúpupu Jortan. Mwirin kopwe chikar.’

Naeman a fókkun letipengaw. A erá: ‘Tittipei ei soufós epwe echikaraei ren an kéri iten an we Kot me féri lón eú napanap mi amwarar. Nge a fen ereniei ái úpwe feiló ren ei chénúpupu lón Israel. Ra kon fen éch ekkewe chénúpupu lón Siria. Pwata úse fen chék feiló ikena?’ Naeman a song, me a ló seni imwen Elisa we.

Néún Naeman kewe chón angang ra álisi an epwe ffat an ekiek. Ra ereni: ‘Esap pwe ka mochen féri met úchék pwe kopwe tongeni chikar? Met ena soufós e erenuk ese weires. Pwata kese chék féri?’ Naeman a aúseling ngeniir. A feiló ren ewe Chénúpupu Jortan me a tutiw lón fán fisu. Mwirin ewe efisuan, Naeman a tuutá nge a unusen chikar. A fókkun meefi kilisou ren an chikar, iwe a liwiniti Elisa pwe epwe pwáári an kilisou ngeni. Naeman a erá: ‘Iei úa silei pwe Jiowa i ewe Kot mi enlet.’ Óm ekiek epwe ifa meefien ewe kúkkún nengnginin Israel atun Naeman a liwin nge a chikar?