Án Jiowa we Mwichen Soufiu mi Pulopulen Ekkei

Ewe kingen Siria, itan Penhatat a chék soun maunei Israel. Nge ewe soufós Elisa a éúréúra ewe kingen Israel iteitan, ina popun a tongeni sú. Iwe, Penhatat a mochen turufi Elisa. A silei pwe Elisa a nóm lón ewe telinimw Totan, me a tiinaaló ewe mwichen soufiun Siria pwe repwe elliapa.

Ekkewe chón Siria ra wareiti Totan atun a pwin. Sorotáán ewe rán, néún Elisa we chón angang a towu lúkún me a kúna pwe eú watteen mwichen soufiu ra pwellifeili ewe telinimw. A fókkun niwokkus me a kékkétá: ‘Elisa, met sipwele féri?’ Elisa a ereni: ‘Chókkewe mi nóm rech ra kon chómmóng seni chókkewe mi nóm rer.’ Lón ena chék atun, Jiowa a ékúna ngeni néún Elisa we chón angang ekkewe oris me wokenin maun mi pulopulen ekkei wóón ekkewe chuuk mi pwelli ewe telinimw.

Atun ekkewe soufiun Siria ra sótun elliapa Elisa, Elisa a iótek me erá: ‘Jiowa, kese mochen ochuneer.’ Iwe, inaamwo iká ekkewe soufiu ra chúen tongeni kúner, nge rese silei ia ra nóm ie. Elisa a ereni ekkewe soufiu: ‘Esap iei ewe telinimw. Oupwe tapwoto mwiri, úpwe emmwenikemiiló ngeni ewe mwán oua kútta.’ Ra tapw mwirin Elisa tori Sameria, ikewe ewe kingen Israel a nóm ie.

A fen serlupwan án ekkewe chón Siria mirititi ikewe ra nóm ie. Iwe ewe kingen Israel a eisini Elisa: ‘Ka mochen úpwe nireló?’ Itá Elisa a liwiningaw ngeni ekkena aramas iir mi sótun nieló? Aapw. Elisa a erá: ‘Kosap nireló. Kopwe amwéngééniir, me tiiniireló.’ Iwe, ewe king a féri eú watteen kametip fán iter me mwirin a tiiniireló.