Néún Jiowa we Chónláng A Túmúnú Esekaia

Ewe mwúún Asiria a nemeni ekkewe engol einangen mwúún Israel. Iwe iei, ewe kingen Asiria itan Sanherip a mochen nemeni ekkewe ruu einangen mwúún Juta. Ekis me ekis, a poputá le liapeni ekkewe telinimwen Juta. Nge ewe telinimw a fókkun mochen, ina Jerusalem. Nge Sanherip ese silei pwe Jiowa a túmúnú Jerusalem.

Ewe kingen Juta itan Esekaia, are Hiskia, a ngeni Sanherip chómmóng moni pwe epwe likitaaló Jerusalem. Inaamwo iká Sanherip a angei ewe moni, nge a chúen tiinaaló an we mwichen soufiu mi péchékkúl pwe repwe maunei Jerusalem. Ekkewe aramas lón ena telinimw ra niwokkus pokiten ekkewe chón Asiria ra kkan ngeniir. Mwirin Esekaia a ereniir: ‘Ousap niwokkus. Ekkewe chón Asira ra péchékkúl, nge Jiowa epwe fen apéchékkúlakich lap seniir.’

Sanherip a tiinaaló néún we chón uwei pwóróus, ewe Rabshakeh ngeni Jerusalem pwe epwe ámángawa ekkewe aramas. Ewe Rabshakeh a útá lúkún ewe telinimw me kékkétá: ‘Jiowa ese tongeni álisikemi. Ousap mut ngeni Esekaia epwe otupukemi. Ese wor emén kot a tongeni túmúnúkemi senikem.’

Esekaia a eisini Jiowa met epwe féri. Jiowa a pélúweni: ‘Kosap niwokkus ren met ewe Rabshakeh a erá. Sanherip esap liapeni Jerusalem.’ Mwirin, Esekaia a angei ekkóch taropwe seni Sanherip. Masouen ekkena taropwe a erá: ‘Kele chék fangetá. Jiowa ese tongeni selánuk.’ Esekaia a iótek: ‘Jiowa, kese mochen selánikem pwe meinisin repwe silei pwe en ewe emén chék Kot mi enlet.’ Jiowa a ereni: ‘Ewe kingen Asiria esap tolong lón Jerusalem. Ngang úpwe túmúnú ái we telinimw.’

Sanherip a wesen ekieki pwe epwele nemeni Jerusalem. Nge lón ena chék pwinin, Jiowa a tiinaaló emén chónláng ikewe ekkewe soufiu ra nóm ie. Ewe chónláng a nieló 185,000 soufiu! Ra máló néún King Sanherip kewe soufiu mi fókkun péchékkúl. Ese chúen wor met epwe tongeni féri lúkún chék an liwiniti leenian pún a kkuf. Jiowa a túmúnú Esekaia me Jerusalem, ussun met a fen pwonei. Iká ka nóm lón Jerusalem, kopwe lúkúlúk wóón Jiowa?