Ester A Seláni Aramasan Kewe

Ester i emén fin Jus, a kan nónnóm Persia lón Susa. Fite ier me mwan, Nepukatnesar a uwealó aramasen neminna seni lón Jerusalem. Tettelin mwongean we itan Mortokai a wisen túmúnú. Mortokai a angang ngeni ewe kingen Persia itan Asuworos.

King Asuworos a kútta emén mineféén kiwin. Iwe, néún kewe chón angang ra emmwenaato ren ekkewe fépwúl mi fókkun liéch lón ewe fénú, kapachelong Ester. Ewe king a filaatá Ester me lein ekkewe fépwúl meinisin an epwe kiwin. Mortokai a ereni Ester an esap pwáári pwe i emén fin Jus.

Emén mwán mi lamalamtekia itan Haman, i meilapen ekkewe néúwis meinisin. A mochen án meinisin repwe chapetiw ngeni. Nge Mortokai ese mochen chapetiw ngeni, ina popun Haman a fókkun song me mochen nieló. Lupwen Haman a silei pwe Mortokai i emén chón Jus, a akkóta eú kókkót an epwe nieló meinisin chón Jus lón ewe fénú. A ereni ewe king: ‘Ekkewe chón Jus ra mmen efeiengaw, a lamot kopwe nireló.’ Asuworos a ereni: ‘Kopwe féri met a lamot kopwe féri ngeniir,’ me a mut ngeni an epwe féri eú allúk. Haman a féri eú allúk mi allúkú ngeni ekkewe aramas ar repwe nieló chón Jus meinisin lón engol me aúlúngátin ránin ewe maram itan Atar. Jiowa a kúna met a fiffis.

Ester ese silei ussun ena allúk. Ina popun Mortokai a tiinaaló ren eché kapiin me ereni: ‘Feiló ren ewe king me fós ngeni.’ Ester a erá: ‘Iká emén epwe ló ren ewe king nge ese fen kékké me ren, i epwe ninniiló. Ewe king ese fen kékkériei úkúúkún 30 rán! Nge úpwe chék feiló ren. Iká epwe eitingeniei wokun we, iwe úpwe manaw. Nge iká ese, iwe úpwe máló.’

Ester a tolong lón imwen ewe king we. Lupwen ewe king a kúna, a eitingeni wokun we. Iwe a tolong ren, me a eisini: ‘Ester, met ka mochen?’ A erá: ‘Úa mochen etiwakemi me Haman ngeni eú kametip.’ Lón ena kametip, Ester a pwal etiwer ngeni ewe oruuen kametip. Lón ena oruuen kametip, ewe king a pwal eisini: ‘Met ka mochen?’ A erá: ‘A wor emén a mochen nieiló me aramasei kewe. Kese mochen kopwe amanawakem.’ Ewe king a erá: ‘Ié na a mochen nikoló?’ Ester a erá: ‘Ei mwán mi ngaw Haman.’ Asuworos a fókkun song ina minne a allúkú pwe repwe mwittir nieló Haman.

Nge ese wor emén epwe tongeni amóeló án Haman we allúk, pwal mwo nge ewe king ese tongeni. Iwe ewe king a ewisa ngeni Mortokai an epwe nemenem wóón ekkewe néúwis me ngeni an pwúúng le féri eú mineféén allúk. Mortokai a féri eú allúk mi mut ngeni ekkewe chón Jus ar repwe éppélúwa chón koputer kewe mi mochen nireló. Lón engol me aúlúngátin ránin ewe maram itan Atar, ekkewe chón Jus ra okkufu chón koputer kewe. Iwe, seni ena atun ra kan féri apwapwaan ena fansoun iteiten ier.