Kapriel A Pwá Ngeni Meri

A wor emén fépwúl aramasen Elisapet itan Meri, a kan nónnóm Kalili lón ewe telinimw Nasaret. Meri a kófót ngeni emén chón táikú itan Josef. Lupwen a wonu án Elisapet maram, ewe chónláng Kapriel a pwá ngeni Meri me ereni: ‘Rán allim Meri, en mi kúna chenum me ren Jiowa.’ Meri ese weweiti met weween alon Kapriel na. Iwe, Kapriel a ereni: ‘Kopwele pwopwo me néúnatiw emén át, nge kopwe eita ngeni Jises. I epwe King, me Mwúún epwe nóm tori feilfeiló.’

Meri a erá: ‘Ifa ussun úpwe néúnéú nge úse mwo méúr ren emén mwán?’ Kapriel a erá: ‘Ese wor met esap tufich ngeni Jiowa. Ewe ngún mi fel epwe feitiw wóóm, me kopwe néúni emén át. Aramasom we Elisapet a pwal pwopwo.’ Mwirin, Meri a erá: ‘Ngang néún Jiowa chón angang. Amwo epwe fis ngeniei minne ka apasa.’

Meri a ló chuuri Elisapet lón ewe leeni mi chómmóng chukun. Lupwen Elisapet a rong án Meri kapwong ngeni, ewe ménúkol lón lukan a mwékút. Iwe, Elisapet a ur ren ngún mi fel, me a apasa: ‘Meri, Jiowa a efeiéchuk. A eú feiéch án inen ái Samol nóm lón imwei ei.’ Meri a erá: ‘Úa mwareiti Jiowa seni unusen letipei.’ Meri a nóm ren Elisapet úkúúkún úlúngát maram, mwirin a liwiniti pwisin imwan we lón Nasaret.

Lupwen Josef a silei pwe Meri a pwopwo, a mochen áwesi ar kófót, pún a ekieki pwe Meri a pwopwo me wóón pwal emén mwán. Nge emén chónláng a pwá ngeni Josef lón an ttan me ereni: ‘Kosap niwokkus le pwúlúweni Meri. Ese wor och mettóch mi mwáál a féri.’ Iwe, Josef a angei Meri me uwealó ren imwan we.