Jises A Amanawaatá Lasarus

A wor úlúmén chiechien Jises ra nóm Petani. Ikena iir Lasarus me fefinan kewe rúúemén, Meri me Marta. Lón eú rán, atun Jises a nóm pekilóón ewe Jortan, Meri me Marta ra tiinaaló eú pwóróus mi atapwalapwal: ‘Lasarus a fókkun semmwen. Kese mochen kopwe mwittir feito!’ Nge Jises ese mwittir feiló rer. A witiwit ruu rán, iwe mwirin a ereni néún kewe chón káé: ‘Sipwele feiló Petani. Lasarus a annut, iwe úpwe feiló féngúnatá.’ Ekkewe aposel ra ereni: ‘Iká Lasarus a chék annut, iwe epwe fen péchékkúlsefál.’ Iwe Jises a ereniir: ‘Lasarus a máló.’

Atun Jises a wareiti Petani, Lasarus a fen peiás úkúúkún rúáánú rán. Eú mwichen aramas ra feito pwe repwe oururu Marta me Meri. Atun Marta a rong pwe Jises a war, a mwittir feiló ren me ereni: “Samol iká ke nóm ikeei, mwongeei we esap máló.” Jises a ereni: ‘Mwongeom we epwe manawsefál. Marta, en mi lúkú ei?’ Marta a erá: ‘Úa lúkú pwe epwe manawetá lón ewe manawsefál.’ Iwe, Jises a ereni: “Ngang ewe manawsefál me ewe manaw.”

Mwirin Marta a feiló ren Meri me ereni: ‘Jises a nóm.’ Meri a sááló ren Jises, me ewe mwichen aramas ra tapweló mwirin. A chapetiw ren pechen Jises, nge ese tongeni wes le kechiw. A erá: ‘Samol, iká ke nóm, mwongeem we esap máló!’ Jises a kúna úkúúkún weiresin, me a poputá le kechiw. Atun ewe mwichen aramas ra kúna an kechiw, ra erá: ‘Nengeni úkúúkún watteen án Jises tongei Lasarus.’ Nge ekkóch ra ekieki: ‘Pwata ese amanawa chienan na?’ Met Jises epwele féri mwirin?

Jises a feiló ren ewe peiás, ikewe eféú féúmmóngun faw a éppwélú ewe leenien tolong. Jises a erá: ‘Oupwe ekaaló ewe faw.’ Marta a erá: ‘Nge a fen rúáánú rán! Inisin epwele pwopwoon.’ Nge ra chúen ekaaló ewe faw, iwe Jises a iótek: ‘Semei, kilisou ren óm aúseling ngeniei. Úa silei pwe ka kan aúseling ngeniei iteitan, nge úa léúwommóng le kapas pwe ekkeei aramas repwe silei pwe ka tiinieito.’ Mwirin a léúwommóng le kékké: “Lasarus, kopwe towu!” Och mettóch mi amwarar a fis: Lasarus a towu seni ewe peiás, nge a chúen finifin ngeni mangaku. Jises a erá: “Oupwe epichaaló pwe epwe tongeni fetál.”

Chómmóng ekkewe mi kúna ena ra lúkú Jises. Nge ekkóch ra feiló me ereni ekkewe Farisi. Seni chék ena atun, ekkewe Farisi ra mochen nieló Lasarus me Jises. Emén me lein ekkewe 12 aposel itan Jutas Iskariot a feiló ren ekkewe Farisi lemonomon me a eisiniir: ‘Fite moni oupwe ngeniei iká úa álisikemi le kútta Jises?’ Ra tipeeú le ngeni 30 féún moni silifer, iwe Jutas a poputá le kútta alen an epwe afangemá Jises ngeni ekkewe Farisi.