Mi Pwapwa Ir Kewe Mi Nennelo!

“Nengeni! Upwe war ussun emon chon sola. Mi pwapwa ewe emon mi nennelo me akamwochu ufan kewe a ufouf.”​—PWÄRÄTÄ 16:15.

1. Pokiten a arapoto ranin Jiowa, met sipwe ekiekin kuna?

RANIN Jiowa we mi lapalap a arapoto, iwe, ina eu fansoun maun! Lon och langepwi, ewe aposel Jon a kuna ekkan kairu mi liosueta “poraus mi popu seni ekkewe timon” ar ra feilo ngeni meinisin “king,” are sou nemenem, won fonufan. Repwe fet? Maa, repwe “amwichafengennir ngeni maun lon ewe ran mi lap, ranin ewe Kot mi lapalap”! Jon a pwal makkei pwe “Ra amwichafengennir lon ewe leeni itan Armaketon lon kapasen Ipru.”​—Pwarata 16:13-16.

2. Io ewe Kok seni Makok, me met epwe fis lupwen epwe maun ngeni noun Jiowa kewe aramas?

² Ekiselo chok, Jiowa epwe amokutu ekkewe muun fonufan pwe repwe ataielo Papilon mi Lapalap, nge iei ewe mwicheichen lamalam mi chofona a nom won unusen fonufan. (Pwarata 17:1-5, 15-17) Iwe mwirin, Kok seni Makok, nge iei i Setan ewe Tefil mi fen fofo orun ei fonufan, epwe amwicha ekkewe mi nom fan nemenian, iwe, repwe amuchu ar maun ngeni noun Jiowa kewe aramas mi kinamwe, nge epwe ussun ita nge esor och mettoch epwe tumunur. (Isikiel 38:1-12) Nge Kot epwe mokut fan iten an epwe selani noun kewe aramas. Iwe, epwe ina poputaan “ewe ran mi lapalap me aniuokus, ranin Jiowa.”​—Joel 2:31; Isikiel 38:18-20.

3. A ifa ussun om kopwe awewei ekkewe mettoch epwe fis me ren Isikiel 38:18-20?

³ Ewer, Jiowa epwe selani noun kewe aramas me atterielo mettoch meinisin lon an Setan we otot lupwen sipwe tori ewe lapalap won unusen fonufan mi iteni Har–​Magedon, are Armaketon. Nengeni mwo ewe oesini lon Isikiel 38:21-23, me anchangei ewe poraus. Jiowa epwe kan aea an manaman le efisata pupummongun konik seni ekkewe kuchu, foun ais mi kata, ekkei mi assitiu, me malapalap. Unusen fonufan epwe chok fitikokokkis lupwen noun Kok kewe repwe orukoruk, iwe, repwe fiufengen lefiler. Ekkewe chon u ngeni ewe Kot mi Lapalap mi chuen manau mwirin repwe nninnililo lupwen Jiowa epwe aea ekkewe manaman le selani noun kewe chon angang. Lupwen ewe “riaffou mi lapalap” epwe fen muchulo, esap chuen wor akkaekis mwo och mettoch seni an Setan we otot mi u ngeni Kot. (Mattu 24:21) Iwe nge, lon chok ewe atun ar nninniilo, ekkewe mi ngau repwe silei ewe emon mi akkota ar nninniilo. Iei alon ach we Kot, ewe mi akkufur: “Mwirin, repwe silei pwe ngang mi Jiowa.” Ekkena mettoch mi kkolo amwararer repwe fis lon ach ei fansoun, le atun an Jises nonnom.

Epwe War Ussun Emon Chon Sola

4. Epwe ifa lapalapen an Jises waroto fan iten an epwe ataielo ei otot mi ngau?

⁴ Iei alon ewe Samol Jises Kraist mwirin an lingelo: “Nengeni! Upwe war ussun emon chon sola.” An war ussun emon chon sola epwe amairu ngeni aramas, epwe ina eu fansoun resap ekieki an epwe war, atun chommong aramas repwe kan onnut. Lupwen Jises epwe war ussun emon chon sola pwe epwe ataielo ei otot mi ngau, epwe amanaua ekkewe mi enletin nennelo. Iei alon ngeni Jon: “Mi pwapwa ewe emon mi nennelo me a amwochu ufan kewe a ufouf, pwe ete selelo o aramas rete nengeni an sau.” (Pwarata 16:15) Ifa lamoten ekkena kapas? Me epwe ifa ussun sipwe tongeni nennelo lon pekin ngun?

5. A wor met sokkun kokkot ren angang lon ewe imwen fel lupwen Jises a nom won fonufan?

⁵ Ururun pwe aramas resap pwiliti ufen emon chon mas ika epwe onnutulo atun an angang. Nge ena mettoch a fis lon ewe imwen fel lon Jerusalem lupwen Jises a nom won fonufan me ekkewe kumiin samol fel me chon Lifai ra angang lon ewe imwen fel lon Jerusalem. Lon ewe engol me aewin senturi B.C.E. King Tafit a akkota ekkewe fitepuku samol felin Israel me ekkewe fite ngerou chon Lifai mi alisir lon eu mwicheich mi wor 24 kumi lon. (1 Kronika 24:1-18) Iteiten kumi a wor lap seni engerou chon angang lon, me ra fen kaeo fan iten ar angang. Iteiten kumi a kan angang lon ewe imwen fel fan ruu iteiten ier me ttamen ar angang ukukun eu wiik. Iwe nge, lon ewe Fetellapen Imw Mangaku, meinisin ekkewe 24 kumi ra wisen angang. A pwal lamot an epwe wor alillis lon ewe fetellapen Pasofer.

6. Lupwen Jises a apasa, “Mi pwapwa ewe emon mi nennelo me akamwochu ufan kewe a ufouf,” eli a ekieki met?

⁶ Lupwen Jises a apasa, “Mi pwapwa ewe emon mi nennelo me akamwochu ufan kewe a ufouf,” eli a kapas ussun eu foffor mi weneiti angangen ekkewe chon mas lon ewe imwen fel. Iei alon ewe Jewish Mishnah: “Ekkewe samol fel ra wisen chon mas lon ulungat leeni lon ewe Imwen Fel: Chamber of Abtinas, Chamber of the Flame, me ewe Chamber of the Hearth; me ekkewe chon Lifai ra wisen chon mas lon ruwe me eu leeni: limu ren ekkewe asamelap lon ewe Temple Court, ruanu ren ekkewe ruanu pokuku lukun, me eu lon ewe Chamber of Offerings, me eu lon ewe Chamber of the Curtain, me eu lukunupen ewe Mercy Seat [lukun tittin ewe Leeni mi Unusen Fel]. Ewe emon meilap lon ewe Temple Mount a kan pippi ekkewe chon mas meinisin fan efoch toon, iwe, ika emon chon mas esap uta me apasa ngeni i, ‘En meilapen ewe Temple Mount, kinamwe epwe nom reom!’ me a pwalo pwe a onnut, epwe awata ngeni wokun we, me a wor an pwung le keni ufan.”​—The Mishnah, Middoth (“Measurements”), 1, wokisin 1-2, Herbert Danby a wisen afouni.

7. Pwata a lamot ngeni ekekwe samol fel me chon Lifai mi wisen mammas lon ewe imwen fel ar repwe nennelo?

⁷ Ekkewe chommong chon Lifai me samol fel lon ewe kumi mi wisen angang ra nennelo unusen pwin pwe repwe mammas, iwe, repwe pinei ekkewe mi limengau seni ar repwe tolong lon kiannin ewe imwen fel. Pokiten “meilapen ewe Temple Mount,” are “ewe kapitin lon ewe imwen fel,” a kan pippi ekkewe 24 leeni meinisin atun ekkewe fansoun mammas le pwin, ekkewe chon mas meinisin repwe nennelo lon en me leenian ika rese mochen ar repwe eolo.​—Fofor 4:1.

8. Ufen emon chon Kraist lon kapas awewe a liosueta met?

⁸ A lamot ngeni ekkewe chon Kraist mi kepit me chiener kewe chon angang ar repwe nennelo lon pekin ngun me akamwochu ufer kewe lon kapas awewe. Ekkena uf ra wewe ngeni ekkewe pisekin annet mi pwalo fan iten ach seikita ngeni ewe angangen afalafal lon an Jiowa we imwen fel lon pekin ngun. Pokiten sia ina ussun, a nom rech an Kot ngun mi fel, are manaman, pwe epwe alisikich ach sipwe apwonueta ach kewe angang me wisach kewe mi auchea pokiten kich chon esileifeili porausen ewe Muu. Ika sipwe onnutulo lon ach angang, angangen noun Kot kewe chon afalafal, sipwe tongeni sopwongau ren ach eolo ren Jises Kraist, ewe Kapitin lon ewe imwen fel mi lapalap lon pekin ngun. Ika sipwe onnutulo lon ena atun, iwe, lon kapas awewe, epwe pwiliti senikich ufach me epwe keni ufach. Iwe, epwe ifa ussun sipwe tongeni nennelo lon pekin ngun?

Ifa Ussun Sipwe Tongeni Nennelo

9. Pwata a fokkun lamot ach kakkaeo Paipel fan alillisin noun chon Kraist kewe puk?

⁹ Ach achocho le kaeofichi ewe Paipel fan alillisin noun chon Kraist kewe puk a kan akachungukich ach sipwe nennelo lon pekin ngun. Ena sokkun kaeo ewpe alipwakochukich fan iten ewe angangen afalafal, epwe alisikich lupwen sipwe kuna osukosuk, me epwe aiti ngenikich ewe al ngeni pwapwa esemuch. (Proverbs 8:34, 35; Jemes 1:5-8) Ach kakkaeo epwe ita titchik me sipwe feffeita lon. (Ipru 5:14–6:3) Ach mommongo mongo mi ochiti amaarin inis epwe alisikich pwe sipwe nennelo me tumunuoch. Epwe tongeni eppeti senikich ewe sokkun molulu mi fis pokiten nafangauen mongo mi murinno. Esor popun ach sipwe molulu are nafangau ren mongo lon pekin ngun, pun Kot a kan akawora chommong mongo lon pekin ngun ren an nounou ekkewe chon kepit, weween, “ewe chon angang mi tuppwol me tipatchem.” (Mattu 24:45-47) Ach akaea mongoon ngun ren ach pwisin kaeo are an ewe famili kaeofengen epwe alisikich pwe sipwe nennelo me “pochokkul lon ewe luku.”​—Taitos 1:13.

10. Ifa ussun an chon Kraist kewe mwich me mwichelap ra kan alisikich pwe sipwe nennelo lon pekin ngun?

¹⁰ An chon Kraist kewe mwich me mwichelap ra alisikich pwe sipwe nennelo lon pekin ngun. Ra kan apochokkulakich me ra suuki ngenikich ewe alen ach sipwe ‘apochokkula emon me emon leich lon tong o foffor murinno.’ Sipwe akkaewin mwichfengen iteiten fansoun ach sipwe “nengeni pwe ewe ran a arapoto.” A enlet pwe ena ran a akarap iei. Ina “ranin Jiowa,” lupwen epwe pwarata pwungun an nemenem. Ika pwe ena ran a wesewesen lamot ngenikich, me epwe ita ina ussun, iwe, sisap ‘ukutiu seni ach mwichfengen.’​—Ipru 10:24, 25; 2 Piter 3:10.

11. Pwata sia tongeni apasa pwe a lamot an chon Kraist angangen afalafal fan iten ach sipwe nennelo lon pekin ngun?

¹¹ Ach fiffiti ewe angangen afalafal ren unusen letipach a lamot ngeni ach sipwe nennelo lon pekin ngun. Sipwe mammasoch ika sipwe fiffiti iteitan an chon Kraist angangen afalafal fan tiniken. Ach angangen afalafal a kan suuki ngenikich chommong fansoun fan iten ach sipwe kapas ngeni aramas ussun ewe Kapasen Kot, an we Muu, me an kewe kokkot. A eu minen apwapwa ach sipwe afalafal imw me imw, liwiniti chon mochen rong, me kaeo Paipel ngeni aramas lon imwer ren ach nounou nouch kewe puk, awewe chok ren Knowledge That Leads to Everlasting Life. Ekkewe elter lon Efisus lom ra tongeni pwarata pwe Paul a asukuler “lon leenien chulap me pwal seni imw me imw.” (Fofor 20:20, 21) Pwungun pwe ekkoch Chon Pwarata Jiowa ra uri samau watte mi mwar eppetir lon ar angangen afalafal, nge ra kan pippi ifa ussun repwe tufichin kapas ngeni aramas ussun Jiowa me an nemenem, iwe, ra kuna chengel seni ar na angang.​—Kol Fel 145:10-14.

12, 13. Ikkefa ekkewe popun ach sipwe tumunukich pwe site kon mongommong are unummong?

¹² Ach tumunukich seni mongommong me unummong epwe alisikich pwe sipwe nennelo lon pekin ngun. Lupwen Jises a kapas ngeni ekkewe aposel ussun an nonnom, a iei ussun an pesei ngenir: “Oupwe pwisin tumunukemi pwe letipemi ete chourek pokiten mongommong, are unupuch, are aurekin ei manau, o ewe ran ete muttir torikemi ussun chok eu ssar. Pun epwe tori ir meinisin mi nonnom won unusen fonufan.” (Luk 21:7, 34, 35) Mongosun me unupuch ese tipeeu ngeni allukun Paipel. (Tuteronomi 21:18-21) Iei alon Proverbs 23:20, 21: “Kosap chiechi ngeni ekkewe mi unummong wain ika ekkewe mi ochommong futuk. Pun ekkewe chon unupuch me ekkewe chon mongommong repwe woungauolo, nge emon a chok mongo o onnut epwe ufouf uf mi kamwakam.”​—Proverbs 28:7.

¹³ Iwe nge, inaamwo ika an emon mongo me un ese tori ena ukukun, nge epwe tongeni efisata an emon aiessum, me epwe pwal mwo nge chipwang me tumunungau ngeni an fori letipen Kot. Pwungun pwe epwe wor aurek ussun ach famili, pochokkulen inisich, me met kewe. Iwe nge, sipwe pwapwa ika sipwe kukkutta akkom ewe Muu lon manauach me eani ewe lukuluk pwe Semach we lon lang epwe akawora met a lamot ngenikich. (Mattu 6:25-34) Ika sisap ina ussun, iwe, “ena ran” epwe torikich ussun “eu ssar,” me eli epwe ussun eu chunnumei mi ssareikich pokiten sise kuna are epwe ussun eu uu mi wor ammonun lon, me ekkewe iik ra ssalong lon, iwe, sapelo. Ena mettoch esap fis ika sipwe nennelo me unusen mirititi pwe sia manau lon “ewe fansoun sopwolon”.​—Taniel 12:4.

14. Pwata sipwe ikkiotek fan tiniken?

¹⁴ Iotek fan tiniken pwal eu alillis fan iten ach sipwe nennelo lon pekin ngun. Lon an we oesini mi lapalap, pwal iei an Jises pesepes: “Ami oupwe mammasa fansoun meinisin, o ikkiotek, pwe oupwe pochokkul, o oupwe ngaselo seni ekkewe mettoch meinisin mi epwe fis, o ami oupwe uta mwen mesen ewe Noun aramas.” (Luk 21:36) Ewer, sipwe iotek pwe sipwe peni Jiowa fansoun meinisin me kuna an chen lupwen Jises, ewe Noun aramas, epwe war fan iten an epwe ataielo ei otot mi ngau. A lamot ach sipwe ‘likiitu lon iotek pwal mammasa lon’, fan iten pwisin feiochuch me feiochun chienach kewe chon luku, ir kewe sia kan iotekir.’​—Kolose 4:2; Efisus 6:18-20.

Ewe Fansoun Epwele Much

15. Met a kan fiffis pokiten ach akapwonueta wisach, wisen chon afalafal fan iten minne mi pwung?

¹⁵ Atun sia witiwiti ewe ran mi lapalap, ranin Jiowa, ese mwaal sia mochen angang ngeni i ukukun ach tufich. Ika sipwe iotek fan tiniken ussun ena mettoch, eli “eu asam lap ngeni angang mi lamot” epwe suuk ngenikich. (1 Korint 16:8, 9) Lon ewe fansoun Kot a fen filata, Jises epwe eani an kapwung me aimufeseni ekkewe “siip” mi pwung mi fichitir ar repwe kuna manau esemuch seni ekkewe “siike” mi ngau mi fichitir ar repwe malo fochofoch. (Jon 5:22) Sap minne sipwe wisen aimufeseni ekkewe siip seni ekkewe siike. Nge ach eani ewe angangen chon afalafal fan iten minne mi pwung iei a kan suuki ngeni aramas ewe alen ar repwe tufichin filata pwe repwe angang ngeni Kot lon unusen manauer, iwe mwirin, repwe eani ewe apilukulukun ar repwe imulo ngeni manau lupwen Jises epwe “war lon an ling”. Mmochen ewe lusun fansoun ren ei otot minenn lom a kan alapalo lamoten ach sipwe apwonueta ewe angang ren unusen letipach fansoun ach sipwe kukutta ir kewe mi “fichitir ar repwe eani ewe apilukulukun manau esemuch.”​—Mattu 25:31-46; Fofor 13:48.

16. Pwata sipwe tiniken lon wisach we, wisen chon esileifeili porausen ewe Muu?

¹⁶ Ewe fansoun a muchulo ren ewe fonufan lon ranin Noa, me epwele muchulo ren ei otot minen lom. Ina minne, sipwe tiniken lon wisach we, wisen chon afalafal fan iten ewe Muu. Ach angangen afalafal a kan ukkuwa, pun iteiten ier fitepuku ngerou ra papatais fan iten esissinnen ar fangolo manauer ngeni Kot. Ra pacheri an Jiowa mwicheich mi feioch, weween, “noun kewe aramas me ekkewe siipen an we malamal.” (Kol Fel 110:3) A ifa watten ach chengel le fiti ewe angangen afalafal fan iten ewe Muu, nge iei ewe angang mi atoto apilukuluk allim ngeni chommong mwen an epwe war “ewe ran mi lapalap mi aniuokkus, ranin Jiowa”!

17, 18. (a) Fansoun ach sipwe afalafal, met sipwe ita ekiekin kuna seni ekkoch? (b) Met epwe enletin wareiti ekkewe chon esiit?

¹⁷ Ussun chok Noa, a nom rech an Kot alillis me tumun. Ewer, neman ekkewe aramas, ekkewe chonlang mi awiliirelo lon nikinikin aramas, me ekkewe Nefilim ra takiri an Noa poraus, nge ena mettoch ese aukatiu an angang. Ikenai, ekkoch ra kan esiit lupwen sipwe afalafal ussun ekkewe chommong pisekin annet mi anneta pwe sia manau lon “ekkewe ranin le sopwolon.” (2 Timoti 3:1-5) Ena sokkun esiit pwonutaan an Paipel oesini ussun ewe fansoun an Kraist nonnom, pun iei makkeien Piter: “Lon ekkewe ranin le sopwolon chon esiit repwe feito ren ar esiit, repwe tapwelo mwirin pwisin ar mochen ingau, o repwe apasa: ‘Ia pwonen an epwe feito? Pun seni chok fansoun semach kewe ra mourulo, mettoch meinisin ra ussun we chok seni popun lom.’”​—2 Piter 1:16; 3:3, 4.

¹⁸ Eli chon esiit ikenai repwe ekieki: ‘Esor och mettoch mi siwil seni poputaan fonufan. Manauen aramas a chok sopwosopwolo pwe ra mommongo, ukun, pupulufengen, me forata ar famili. Inaamwo ika Jises a nonnom iei, nge esap apwonueta ewe apwung lon ei fansoun.’ A ifa watten mwaallir! Ika rese malo ren pwal och popun, ewe ran mi aniuokkus, ranin Jiowa, epwe wesewesen mweterir, ussun chok ewe Noter mi kata a asopwalo eu tappin aramas mi ngau lon fansoun Noa.​—Mattu 24:34.

Achocho Ren Unusen Tufichum pwe Kopwe Nennelo Chok!

19. Epwe fet ach ekiek ussun ach angangen asukula aramas?

¹⁹ Ika sia fen fangolo manauach ngeni Jiowa, amwo sisap onnutulo pokiten ekiek mi mwaal. Iei eu fansoun ach sipwe nennelo me pwarata ach luku ekkewe oesini mi fel, me apwonueta wisach we, wisen ach sipwe “asukula chon ekkewe muu meinisin.” (Mattu 28:19, 20) Atun ei otot minen lom epwe feffetal ngeni an epwe sopwolo, esor och angang mi auchea seni ach angang ngeni Jiowa Kot fan emmwenien Jises Kraist me ach fiti ewe angang mi fiffis won unusen fonufan, nge iei ewe angangen afalafala “ei poraus allimen ewe muu” mwen an epwe war ewe sopwolon.​—Mattu 24:14; Mark 13:10.

20. Ifa ewe leenien appiru Kalep me Josua ra isetiu, me met ar foffor a affata ngenikich?

²⁰ Ekkoch me lein noun Jiowa kewe aramas ra fen angang ngeni i fansoun langattamn, eli ren unusen manauer. Nge inaamwo ika sia fen fiti ewe lamalam mi enlet lon chok ekkewe ier mi kanoto, amwo sipwe ussun ewe re Israel, Kalep, ewe mi “alleasochisi Jiowa ren unusen lelukan.” (Tuteronomi 1:34-35) Ir me Josua ra wesewesen mmolneta pwe repwe tolong lon ewe Fonuen Pwon mwirin an Israel ngaselo seni fotek lon Isip. Iwe nge, a kon lap ngeni ekkewe chon Israel mi watte ra nafangau ar lukuluk, iwe, ra nom 40 ier lon ewe fonupoon, iwe mwirin, ra malo ikewe ie. Kalep me Josua ra pwal etir le likiitu fan fansoun weires lon unusen ena fansoun, nge mwirin, ekkena ruuemon mwan ra tolong lon ewe fonu mi pwonetiu. (Numperis 14:30-34; Josua 14:6-15) Ika sipwe ‘alleasochisi Jiowa ren unusen lelukach’ me nennelo chok, sipwe kuna pwapwaan ach sipwe tolong lon ewe minefon fonufan Kot a pwonei.

21. Met sipwe kuna ika sipwe nennelo lon pekin ngun?

²¹ Ekkewe pisekin annet ra affata pwe sia manau lon ewe fansoun le sopwolon me a arapoto ewe ran mi lapalap, ranin Jiowa. Esap iei ewe fansoun ach sipwe aiessum are tumunungau ngeni ach fori letipen lang. Sipwe kuna feioch ren chok ach nennelo lon pekin ngun me pwal ren ach akamwochu ufach kewe mi anneta pwe kich noun Kraist chon afalafal me noun Jiowa chon angang. Amwo letipach epwe ppwosolo fan iten ach sipwe “nennelo, uppwos lon ewe luku, mwokutukut fan tipenmwan, me pochokkuleta.” (1 Korint 16:13) Pokiten kich noun Jiowa chon angang, amwo emon me emon leich epwe uweneweneta me pwora. Ika sipwe ina ussun, iwe mwirin, sipwe nom lein ekkewe mi mmolneta lupwen epwe war ewe ran mi lapalap, ranin Jiowa, nge akangang chok fan tuppwol lein ekkewe chon pwapwa mi nennelo chok.

Epwe Ifa Ussun Om Kopwe Polueni?

◻ Epwe ifa ussun om kopwe awewei ufach lon pekin ngun, me epwe ifa ussun sipwe tufichin akamwochu?

◻ Ikkefa ekkoch mettoch epwe alisikich pwe sipwe nennelo lon pekin ngun?

◻ Pwata sipwe ita ekiekin kuna chon esiit, me ita met sokkun ekiek sipwe eani ussur?

◻ Met sokkun ekiek sipwe ita eani ussun ach angangen asukula aramas lon ekkeei ranin le sopwolon?

[Ekis Pwóróus lón pekin taropwe 16]

A nom ren chon Kraist an Kot ngun mi fel pwe epwe alisir ar repwe nennelo lon pekin ngun me apwonueta wiser kewe

[Sasing lón pekin taropwe 15]

A ita ppwosolo letipom fan iten om kopwe nennelo lon pekin ngun me akamwochu ufom lon kapas awewe?