Ifa Ussun Kot a Emmweni Makken Paipel?

UWOUFETALIN PORAUS a kon amwarar ikenai lap seni fansoun lom meinisin. Fitu ier lom, ita ion a ekieki pwe epwe wor eu fansoun lupwen poraus epwe tongeni muttir feilfetal ekis meinisin ren tengwa, fax, me computer?

Nge a kon amwarar seni meinisin ewe sokkun uwoufetalin poraus aramas resap tongeni silei, weween, poraus seni lang. Jiowa a emmweni 40 som aramas pwe repwe wisen makkei an Kapas, ewe Paipel mi Fel. Aramas ra kan aea fitu sokkun minen uwoufetalin poraus, iwe, pwal ussun chok, Jiowa a aea fitu mettoch pwe epwe emmweni makken Paipel.

Pwisin alon. Kot a affata poraus mi titchik mi kapachelong lon Paipel.a Awewe chok, ekieki mwo masouen ewe Alluk fan iten eu pwon. Jiowa a ereni Moses, “Makkeitiu ekkeei kapas ren pwisin en, pun ren ekkeei kapas ua apwungalo eu pwon ren ami me Israel.” (Ekistos 34:27) Ekkena “kapas” “chonlang ra wisen uwei,” Moses a makkeiiretiu me iei ra nom lon ekkeei puken Paipel, Ekistos, Lifitikos, Numperis, me Tuteronomi.​—Fofor 7:53.

Pwal chommong soufos, awewe chok ren Aisea, Jeremaia, Isikiel, Amos, Nahum, me Mika, ra angei poraus seni Kot ren chonlang. Fan ekkoch ekkena mwan ra poputa ar angang ren ar apasa, “Iei alon Jiowa.” (Aisea 37:6; Jeremaia 2:2; Isikiel 11:5; Amos 1:3; Mika 2:3; Nahum 1:12) Mwirin, ra makkeitiu alon Kot.

Langepwi, Ttan, me Mesetton. Eu langepwi, iei eu poraus mi ieto le mokuren emon lupwen a nelo, nge a kan fis ren och manaman. Awewe chok, Piter, Jemes, me Jon, “lupwen ra unusen nelo,” ra kuna langepwiin wiliiloon Jises. (Luk 9:28-36; 2 Piter 1:16-21) Fan ekkoch poraus a toto lon eu ttan, are kunaen emon le pwin, iwe, a ffotolong lon ekiekin lupwen a onnut. A ina ussun an Taniel mak ussun “kunaan lon mokuran won an pet,” are, ussun ewe chon affou Ronald A. Knox a affouni, “lupwen ua kokkon me akatola lon ai ttan.”—Taniel 4:10.

Emon mi mesetton fan manamanen Jiowa a nelo, nge ussun ita a ekilapei och mettoch. (Alollo ngeni Fofor 10:9-16.) Lon Paipel ewe kapasen Kriik “mesetton” (ek’stasis) a wewe ngeni ‘likitalo are akasiwil.’ A ussun ita a sokkolo ekiekin emon. Ina minne, emon mi mesetton esap meefi met a fiffis unukkun nge epwe unusen annefota kunaan. Neman ewe aposel Paul a mesetton lupwen a “kekilo ngeni paratis me a rong kapas ese pwung an emon aramas epwe apasa.”—2 Korint 12:2-4.

Ekkewe sou makkei Paipel mi angei poraus ren langepwi are ttan are mesetton ra sokko seni ir mi makkei alon Kot, pun fan chommong mi mumuta ngenir ar repwe makkei lon pwisin ar kapas minne kunaer. Ei kapas a tori Apakuk: “Makkei kunaom, me affatatiu won sileit fau, pwe ewe emon mi osommong le allea epwe angoch lon.”​—Apakuk 2:2.

A ita weween pwe ekkena kinikin lon Paipel ese lien ussun ekkewe poraus Kot a pwisin apasatiu? Aapw. Ren an ngun mi fel, Jiowa a ffotukalong lon ekiekin ekkewe sou mak an kewe poraus, iwe, ra makkei ekiekin Kot nge esap aramas. Ikaamwo Jiowa a mut ngeni ekkewe sou mak pwe repwe filata ekkewe kapas repwe nounou, nge a emmweni ekiekir me letiper pwe esap tiuelo och poraus mi lamot, iwe, wesin ar mak, epwe pwung an aramas apasa pwe ina kapasen Kot.​—1 Tesalonika 2:13.

Pwarien Lang. A wor oesini lon Paipel, weween, uruwo mi pwalo me mi mak mwen an pwonuta, iwe, ena tufich ese nom ren aramas. Awewe chok, ewe oesini ussun utaan me turutiuen “ewe kingen Kriis,” Aleksanter mi Lapalap, a mak 200 ier mwen pwonutaan! (Taniel 8:1-8, 20-22) Ewe Paipel a pwal pwari met ese pwa ngeni mesen aramas. Awewe chok ren forutaan lang me fonufan. (Genesis 1:1-27; 2:7, 8) A pwal wor porausfengen mi fis lon lang, ussun met a mak lon ewe puken Hiop.​—Hiop 1:6-12; 2:1-6.

Ika Kot ese pwisin pwari ekkena poraus ngeni ekkewe sou mak, iwe, a pwarir ngeni pwal ekkoch, iwe mwirin, ra kapachelong lon uruwo mi makketiu are mi feilfetal ren auen aramas, iwe, ra tori eu me eu tappin aramas tori ar kapachelong lon Paipel. Mi alukuluk pwe Jiowa a awora ekkena poraus meinisin, me a emmweni ekkewe sou mak pwe esap wor poraus mi mwaal, kapasen tunummong, are tutunlap lon makkeier kewe. Iei makkeien Piter ussun oesini: “Mwan kana ra fos seni Kot lupwen ra kekilo ren ngun mi fel.”b​—2 Piter 1:21.

Mi Lamot Angang Weires

Ikaamwo ekkewe soumakken Paipel ra “kekilo ren ngun mi fel,” nge mi lamot ar repwe ekiekifichi ar angang. Awewe chok, Solomon a “ekilapei me kuttafichi, pwe epwe akkotaochu chommong mwiitun. A achocho le kuttafichi kapas mi murinno me an epwe makkei kapas mi enlet.”​—Eklesiastis 12:9, 10.

Ekkoch soumakken Paipel ra kaeofich fan iten minne ra makkei. Awewe chok, iei makkeien Luk ussun makkeian we Poraus Allim: “Ua fen kuttafichi poraus mi enlet ussun mettoch meinisin seni le poputaan, pwe epwe tetteloch ai makkeiiretiu.” Pwungun pwe an Kot ngun mi fel a efeiochu achochoon Luk, iwe, ese mwaal a amokutu i pwe epwe kutta porausen uruwo mi enlet me epwe fos ngeni chon pwarata mi wenechar, awewe chok ren ekkewe chon kaeo me eli inen Jises, Meri. Iwe mwirin, an Kot ngun mi fel a emmweni Luk pwe epwe makkei ekkewe poraus, nge epwe enlet makkeian.​—Luk 1:1-4.

Makkeien Jon a sokko seni makkeien Luk Poraus Allim, pwe a makkei met a pwisin kuna, nge a mak 65 ier mwirin maloon Jises. Ese mwaal an Jiowa ngun mi fel a alisi Jon pwe esap monuki met a kuna. Ena mettoch a tipeeu ngeni an Jises pwon ngeni noun chon kaeo: “Ewe chon aururu, ewe ngun mi fel, ewe Sam epwe tinato fan itei, epwe aiti ngenikemi mettoch meinisin, o epwe pwal achema ngenikemi mettoch meinisin minne ua fen apasa ngenikemi.”​—Jon 14:26.

Fan ekkoch ekkewe soumakken Paipel ra makkeilong poraus seni ekkewe sou uruwo mi makkei met aramas ra kuna, nge sap minne ir meinisin ra mak fan emmwenien ngun mi fel. A ina ussun an Jeremaia makkei Aewin me Oruuen King. (2 King 1:18) Esra a affata pwe a ioni poraus seni ina epwe 14 mettoch, nge rese popu seni ngunun Kot, iwe, ra kapachelong lon Aewin me Oruuen Kronika, pachelong “porausen fofforun ranin King Tafit,” me “ewe puken ekkewe Kingen Juta me Israel.” (1 Kronika 27:24; 2 Kronika 16:11) Moses a pwal angei poraus seni “puken ekkewe Maunen Jiowa,” nge neman ina eu puk mi wenechar ussun ekkewe maun noun Kot kewe aramas ra eani.​—Numperis 21:14, 15.

Ngun mi fel a emmweni ekkena angang, a amokutu ekkewe sou makken Paipel pwe repwe fili poraus mi wenechar, iwe, ra kapachelong lon ewe Paipel mi fel.

Fon mi Alillisoch​−Seni Io?

A wor lon Paipel chommong fon mi alillisoch, nge mi popu seni kunaen aramas mi mirit. Awewe chok, iei makkeien Solomon: “Iwe, a murinno seni meinisin pwe emon aramas epwe mongo o un, epwe pwal pwapwa lon an angang weires. Nge ua kuna pwe pwal ei a chok feito seni lepoun Kot.” (Eklesiastis 2:24) Paul a makkei pwe an fon ussun pupulu a fis “me ren pwisin ekiekin,” nge a pwal apasa: “Ua wenewenen ekieki pwe a nom rei ngunun Kot.” (1 Korint 7:25, 39, 40) Ngunun Kot a wesewesen nom ren Paul pun ussun Piter a apasa, minne Paul a makkei a fis “me ren ewe mirit a angei.” (2 Piter 3:15, 16) Iwe, a uwawu ekiekin fan emmwenien ngunun Kot.

Lupwen ekkewe sou makken Paipel ra uwawu pwisin ekiekir, minne ra makkei a longolong won met ra kaeo me apwonueta seni ekkewe puken Paipel mi nom rer. Sipwe tongeni luku pwe makkeier a tipeeu ngeni ekiekin Kot. Minne ra makkei a kapachelong lon ewe Kapasen Kot.

Pwungun pwe a wor lon Paipel alon ekkoch mi mwaal ekiekir. (Alollofengenni Hiop 15:15 me 42:7.) A pwal mak poraus mi affata riaffoun noun Kot chon angang, nge sap minne a ffat unusen ewe poraus.c Lupwen ekkena sou mak ra uwawu meefier, ngunun Kot a emmwenir pwe epwe wenechar makkeier, iwe, ena mettoch a esissina me pwari ekiek mi mwaal. Pwal och, lon ekkena poraus meinisin, ekkewe wokisin unukkun ra affata ngeni chon allea mi mirit ika mi pwung ekiekin ewe sou mak.

Iwe, sipwe tongeni luku pwe unusen Paipel eu poraus seni Kot. Enlet, Jiowa a akkota pwe masouan meinisin epwe tipeeu ngeni letipan me epwe awora emmwen fan iten ir mi mochen angang ngeni i.​—Rom 15:4.

Pwata Aramas ra Wisen Makkei?

An Jiowa tipatchem mi lapalap a pwalo ren an nounou aramas pwe repwe wisen makkei Paipel. Ekieki mwo ei mettoch: Ika Kot a awisa ngeni chonlang ewe angang, epwe ussun we chok aucheaan Paipel? Pwungun pwe sipwe mmeseik ren ach alleani ussun lapalapen me fofforun Kot me ren ekiekin emon chonlang. Nge ika ese fokkun wor poraus are alillis seni aramas, eli epwe weires ach sipwe weweiti porausen Paipel.

Awewe chok: Ewe Paipel epwe tongeni apasa chok pwe King Tafit a lisowu mwaal me tipisin nni manau, iwe mwirin, a aier. Iwe nge, a ifa murinnon an a mak alon Tafit lupwen a pwarawu riaffoun letipan ren fofforun me an siongau ngeni Jiowa ren omusomus! A makkei pwe “Ai tipis a chok nonnom mwen mesei fansoun meinisin. Eu letip mi ta me tekisosson, O Kot, kosap oput.” (Kol Fel 51:3, 17) Ina minne, a nom ren Paipel poraus mi omuumu, mi sokkopat, me mi amwarar pokiten aramas ra wisen makkei.

Ewer, a nampa eu lapalapen an Jiowa awora ngenikich an Kapas. Ikaamwo a nounou aramas mi apwangapwang, nge ra nom fan manamanen ngun mi fel pwe esap wor mwaallin makkeier kewe. Ina minne, a sokkolo aucheaan Paipel. A lukuchar an fon, me a wenechar an kewe oesini ussun ewe Paratis epwe fis won fonufan lon mwach kkan.​—Kol Fel 119:105; 2 Piter 3:13.

Pwata kosap akkota om kopwe alleani Kapasen Kot iteiten ran? Iei makkeien Piter: “Ussun chok monukol mi a keran uputiu, oupwe fokkun mochen ewe chonun oup mi enlet o mi fich ngeni ngunumi, pwe oupwe mammaarita ren ngeni manau.” (1 Piter 2:2) Pokiten a mak fan emmwenien Kot, kopwe kuna pwe unusen Paipel a “lamot ngeni afalafal, ngeni fonou, ngeni amurinnolo, o pwal ngeni angangochun ewe manau mi pwung, pwe noun Kot aramas repwe unusoch o pwal lipwakoch ngeni sokkun foffor murinno meinisin.”​—2 Timoti 3:16, 17.

[Footnote]

[Sasing lón pekin taropwe 4]

In various ways, God inspired men to write the Bible