Ach Angangfengen Me An Jiowa Mwicheich Fan Tuppwol

“Ren emon mi tuppwol kopwe pwarata ffoffor mi tuppwol.”​—2 SAMUEL 22:26.

1, 2. Ikkefa ekkoch ffoffor mi pwarata tuppwol sia kan kukkuna lon ewe mwichefel?

LON eu pwinin emon elter a ammonlata eu afalafal fan iten eu an chon Kraist mwich. A mochen kaulo me asoso; nge a achocho ngeni, iwe, a kutta poraus me kapas awewe seni Paipel epwe tongeni achungu letipen aramas me apochokkula chon ewe mwichefel. Lon ewe pwinin mwich, eu pupulu ra molu, nge ir chon ena chok mwichefel, iwe, ra tipeni ar repwe nonnom leimw, nge fan mosonottam ra alisi nour kkewe pwe repwe mmonleta, iwe, ra lo fiti ewe mwich. Mwirin ssarin ewe mwich, ekkoch chon Kraist ra kapasfengen ussun an ewe elter afalafal. Emon sister a kuna sossot seni an mochen apasa pwe fan eu ewe elter a achou letipan, nge a mwasangasangen kapas ussun eu poraus atewe a uwawu. En mi weweiti ifa ussun ekkena poraus ra menlapei eu chok lapalap?

² Ina ewe lapalap tuppwol. Ewe elter a tuppwol le angang fan iten noun Kot kkewe aramas, ewe eu pupulu ra tuppwol le fiffiti mwich, me ewe sister a tuppwol le peni ekkewe elter. (Ipru 10:24, 25; 13:17; 1 Piter 5:2) Ewer, lon mettoch meinisin mi fiffis lon manauer, sia kuna pwe noun Kot kkewe aramas ra uppos le angangfengen me an Jiowa mwicheich fan tuppwol.

3. Pwata a mmen lamot ach sipwe tuppwol fansoun meinisin ngeni an Jiowa mwicheich won fonufan?

³ Lupwen Jiowa a nennetiu won ei fonufan mi ngau, a kuna pwe ese lien wor aramas mi tuppwol. (Mika 7:2) Ese mwaal letipan a kan chengel lupwen epwe kuna tuppwolun noun kkewe aramas! Ewer, om tuppwol a kan apwapwai i. Iwe nge, a kan asonga Setan, ewe popun chon rikilo, me a anneta pwe i emon chon kapas chofona. (Än Salomon Fos 27:11; Jon 8:44) Kopwe mwo ekieki pwe Setan epwe sotuni le atai om tuppwol ngeni Jiowa me an mwicheich won fonufan. Sipwe pi ifa ussun epwe ffori ena mettoch. Epwe ina ussun sipwe tufichin kuna ifa ussun sipwe tongeni amwochu ach tuppwol tori ewe sopwoloon.​—2 Korint 2:11.

Ach Annefota Apwangapwangen Aramas Epwe Tongeni Akisalo Tuppwol

4. (a) Pwata a mecheres ach sipwe ekiekin akkapii ir mi wiseni wisen chon emmwen? (b) Ifa ussun Kora a pwarata pwe ese tuppwol ngeni an Jiowa mwicheich?

⁴ Lupwen emon brother a wor wisan lon ewe mwichefel, eli epwe pwaochulo an kkewe apwangapwang. A ifa mecheresin ach akkapii ‘ewe piipi le mesen pwiich we, nge sia tunalo ewe watteen ira lon pwisin mesach’! (Mattu 7:1-5) Iwe nge, ach annefota apwangapwangen aramas epwe tongeni efisata ffofforun rikilo. Awewe chok, ekieki mwo sokkofesenin Kora me Tafit. A mmen watte wisen Kora, me neman a tuppwol fite, fite ier. A poputa le oput nemenien Moses me Aaron, nge ir mararin. Inaamwo ika Moses a tipetekison seni meinisin aramas, nge neman Kora a poputa le esiita i lon letipan. Eli a kuna an Moses kkewe apwangapwang. Iwe nge, ese pwung an Kora u ngeni an Jiowa mwicheich pokiten apwangapwangen Moses. Atewe a nninniilo seni ewe mwich.​—Numperis 12:3; 16:11, 31-33.

5. Pwata Tafit a tongeni kuna sossot seni ewe ekiekin u ngeni Saul?

⁵ Iwe nge, Tafit a angang ngeni King Saul. Me lom, Saul emon king mi murinno, nge mwirin, a ngauolo. A lamot ngeni Tafit luku, likiitu, me tipatchem fan iten an esap nninniilo ren Saul. Iwe nge, lupwen Tafit a tufichin nnielo i, a apasa pwe ‘esap pwung me ren ekiekin Jiowa,’ pwe epwe u ngeni emon mi kepit me ren Jiowa.​—1 Samuel 26:11.

6. Inaamwo ika sipwe kuna apwangapwangen me mwaallin ekkewe elter, nge met sisap ffori?

⁶ Lupwen ekkoch chon emmwen leich repwe ussun ita mwaallilo, eani kapas mi pochokkul, are pwarata lifilifil, sipwe ngunungunur, me eli efisata ewe ngunun esiit lon ewe mwichefel? Sipwe ita ukutiu seni ach fiti an chon Kraist kkewe mwich ren ach sipwe pwarata pwe sia oput lapalaper? Aapwi, esap ina! Ussun Tafit, sisap mut ngeni apwangapwangen emon an epwe amwokutukich pwe sipwe u ngeni Jiowa me an mwicheich!​—Kol Fel 119:165.

7. Ikkefa ekkoch ffoffor mi ngau ra fisita lon ewe imwen fel lon Jerusalem, me met meefien Jises ussun?

⁷ Jises Kraist ewe Numperis eu leenien appiru fan iten an aramas pwarata tuppwol, nge oesini a awewei pwe i noun Jiowa we “chon tuppwol.” (Kol Fel 16:10) Ese mwaal ekkewe ffoffor mi ngau lon ewe imwen fel lon Jerusalem a sotuni an tuppwol. Jises a silei pwe angangen ewe samol fel lapalap me ekkewe asor ra liosueta an angangen afalafal me an malo ussun eu asor, me a silei lamoten an aramas kakkaeo seni ekkena mettoch. Ina minne, a pwung an meefi song lupwen a kuna pwe ewe imwen fel a fen wiliiti “eu leenien chon sola.” Fan ewe nemenem Kot a ngeni i, fan ruu a limeti ewe imwen fel.a​—Mattu 21:12, 13; Jon 2:15-17.

8. (a) Ifa ussun Jises a pwarata tuppwol ngeni ewe kokkot fan iten ewe imwen fel? (b) Ifa ussun sipwe tongeni pwarata pwe sia aucheani ach feffel ngeni Jiowa ren ach fiffiti an we mwicheich mi limoch?

⁸ Iwe nge, Jises a tuppwol le peni kokkotun ewe imwen fel. Seni le kukkunun, a fiti ekkewe fansoun apwapwa lon ewe imwen fel me fan chommong a kan asukula aramas ikewe ie. A pwal mwo nge monatiu takisesin ewe imwen fel, inaamwo ika esap ina wesewesen wisan. (Mattu 17:24-27) Jises a apunga ewe fefin mi woungau, nge mi ma puluwan, ren an walong lon ewe pworun asor “mettoch meinisin a tufichin manau seni.” Ekiselo mwirin, Jiowa a poutfocheilo ena imwen fel. Nge tori ena fansoun, Jises a tuppwol ngeni. (Mark 12:41-44; Mattu 23:38) Ikenai an Kot mwicheich won fonufan a fokkun lap seni ewe ototen chon Jus me an we imwen fel. Pwungun pwe sap minne a unusoch, ina popun, fan ekkoch a wor mettoch mi siwil. Nge, ese wor chommong mettoch mi mwaal lon, me sap minne Jiowa Kot epwe fforatiu siwilin. Sisap fokkun mut ngeni ekkewe mettoch rese unusoch me rech lon ewe mwicheich ar repwe amarasa letipach are amwokutukich pwe sipwe eani ewe ngunun esiit are ekiekingau. Iwe nge, sipwe appiru tuppwolun Jises Kraist.​—1 Piter 2:21.

Pwisin Ach kkewe Apwangapwang

9, 10. (a) Ifa ussun an Setan otot mi ngau a kan sotuni ach kkewe apwangapwang pwe epwe lukikich ngeni ffoffor ese pwung? (b) Met sipwe ffori ika sipwe tipisilap?

⁹ Setan a pwal sotuni le atai ach tuppwol ren an sotuni ach kkewe apwangapwang. An otot mi ngau a kan ffoffori met apwangapwangach epwe lapalo ren, me a sotunikich pwe sipwe ffori mettoch mi mwaal me ren Jiowa. A eu minen aletipechou pwe iteiten ier fite ngerou ra ttur ren lisowu mwaal. Ekkoch ra alapalo ar ffofforun rikilo ren ar eani ruu sokkun lapalapen manau, weween, ra chuen ffofforingau, nge ra tipin eani manauen chon Kraist mi tuppwol. Iei makkeien emon fopwul ussun meefian fan iten ena mettoch lon ekkewe lesen mi iteni “Young People Ask . . .” mi katowu lon ewe Awake! chassi: “Ekkewe poraus ra weneiti lapalapen manauei. Le monomon, neminnewe a chiechioch ngeni ekkewe sarafo rese tongei Jiowa. Met mwiriloon? Neminnewe a makkei pwe “Manauei a unusen ngauolo, iwe, ua lisowu mwaal me kuna apwung ren. A talo ai riri ngeni Jiowa, iwe, semei, inei, me ekkewe elter rese chuen luku pwe mi wenechar manauei.”b

¹⁰ Ena fopwul a kuna alillis seni ekkewe elter me a angangsefal ngeni Jiowa fan tuppwol. Iwe nge, chommong ra wesewesen sopwongau, me ekkoch rese chuen liwiniti ewe mwichefel. A ifa murinnoon ach sipwe tuppwol me fiffiu ngeni sossot lon ei fonufan mi ngau! Sipwe akkauseling ngeni ekkewe ourour seni ewe Leenien Mas me Awake! fan iten chiechi ngeni chon lukun me ekkewe minen apwapwa mi ngau. Amwo sisap rikilo ren ach eani ffoffor ese pwung. Nge ika sipwe ffofforingau, sisap aopa met sia fen ffori. (Kol Fel 26:4) Nge, sipwe angei alillis. Ina aucheaan semach me inach me ekkewe elter.​—Jemes 5:14.

11. Pwata epwe mwaal ach sipwe ekieki pwe a kon ngau manauach, me menni poraus lon Paipel epwe tongeni alisikich pwe sipwe awenechara ach ekiek?

¹¹ Eli ach kkewe apwangapwang epwe eu minen efeiengau ngenikich lon pwal eu lapalap. Ekkoch mi eani och ffofforun rikilo ra fangeta, weween, rese chuen ekiekin apwapwai Jiowa. Chechchemeni pwe Tafit a tipisilap fan fite. Iwe nge, fansoun langattam mwirin an Tafit malo, meefien Jiowa pwe i emon noun chon angang mi tuppwol. (Ipru 11:32; 12:1) Met popun? Pun ese fangeta lon an ekiekin apwapwai Jiowa. Iei alon Än Salomon Fos 24:16: “Eli ewe emon mi pwung epwe turutiu fan fisu, iwe, epwe wesewesen utasefal.” Ika sipwe tipis kukkun fan fite pokiten a wor och apwangapwangach sia fiffiu ngeni, eli sipwe chuen pwung mwen mesen Jiowa ika sipwe “utasefal,” weween, sipwe aier seni letipach me likiitu lon ach angang ngeni fan tuppwol.​—Alollo ngeni 2 Korint 2:7.

Tuttumunu seni Ffofforun Rikilo mi Otuputup!

12. Ren ekkewe Farisi, ifa ussun ar eani ekiek mi kon ssenuk fan iten alluk a emmwen ngeniir ffofforun rikilo?

¹² Ffofforun rikilo a pwal pwalo lon lapalap mi otuputup. Eli epwe ussun ita nge ekkena ffoffor, ffofforun chon tuppwol! Awewe chok, neman ekkewe Farisi lon fansoun Jises ra ekieki pwe ir mi tuppwol seni meinisin.c Nge rese kuna sokkofesenin tuppwol me an aramas kamwochunnuk won ekkewe alluk aramas ra pwisin fforata, pun ir mi kon eipo me a kon pochokkul ar apwung. (Alollo ngeni Eklesiastis 7:16.) Ren lapalaper na ra pwarata pwe rese tuppwol ngeni ekkewe aramas repwe ita angang ngeni, ngeni ngunun ewe Alluk ra apasa pwe ra eani minen kait, me ngeni Jiowa. Iwe nge, Jises a tuppwol ngeni ngunun ewe Alluk, ewe mi longolong won tong. Ina popun, a aufichieta me apochokkula aramas, ussun minne ekkewe oesini fan iten ewe Messaia ra apasa.​—Aisea 42:3; 50:4; 61:1, 2.

13. (a) Ifa ussun ekkewe sam me in lon Kraist repwe tongeni rikilo seni aalen chon tuppwol? (b) Pwata sam me in repwe tumunu pwe ete kon pochokkul ar apwungu nour kkewe me ete kon ssenuk ar eani kapasen akkapii ngeniir fan iten ar repwe emiritiir?

¹³ Chon Kraist mi wor ar nemenem ra kan kuna watte feioch seni ewe leenien appiru Jises a isetiu fan iten ena mettoch. Awewe chok, ekkewe sam me in mi tuppwol ra silei pwe wiser ar repwe emiriti nour kkewe. (Än Salomon Fos 13:24) Iwe nge, ra kan tumunu pwe rete asonga nour kkewe ren ar eani apwung mi kon pochokkul, nge mi kawor fan song are ren kapasen esiit fansoun meinisin. Ekkewe nau mi meefi pwe resap fokkun tongeni apwapwai semer me iner, are ir mi meefi pwe a ussun ita semer me iner ra kan eani ekiek mi mwaal me kapasen esiit pokiten ar lamalam, repwe tongeni letipechoulo, iwe mwirin, repwe towauolo seni ewe luku mi enlet.​—Kolose 3:21.

14. Ifa ussun ekkewe chon mas lon Kraist repwe tongeni pwarata pwe ra tuppwol ngeni ewe mwichefel ra akkangang ngeni?

¹⁴ Pwal ussun chok, ekkewe elterin Kraist me ekkewe elter mi saifetal ra kan pippi ekkewe osukosuk me minen efeiengau mi tottori chon mwichefel. Pokiten ir chon mas mi tuppwol, ra kan awora fon ika pwe mi lamot, me ra akkom pi ekkewe poraus enlet meinisin mi weneiti ewe osukosuk me ra tumunu pwe ar fon epwe longolong won Paipel me ekkewe puk seni ewe Society. (Kol Fel 119:105; Än Salomon Fos 18:13) Ra pwal silei pwe ekkewe siip ra eani apilukuluk won ir ren mongo me kapasen apochokkul lon pekin ngun. Ina minne, ra achocho le appiru Jises Kraist, ewe Chon Masen Siip mi Murinno. Ra kan tuppwol le angang ngeni ekkewe siip iteiten wiik lon an chon Kraist kkewe mwich, iwe, rese kan aletipechour, nge ra kan aufichiireta me akkapochokkula ar luku.​—Mattu 20:28; Efisus 4:11, 12; Ipru 13:20, 21.

15. Ifa ussun ekkoch lon ewe aewin senturi ra pwarata pwe ese pwung ewe sokkun tuppwol ra eani?

¹⁵ A pwal wor ewe sokkun aramas mi tuppwol ngeni mettoch ese pwung. Ewe sokkun tuppwol mi enlet lon Paipel esap mutata ach sipwe tuppwol ngeni och mettoch akkom mwen Jiowa Kot. Chommong chon Jus lon ewe aewin senturi ra kamwochunnuk won ewe Allukun Moses me ototen chon Jus. Iwe nge, a fen war an Jiowa fansoun pwe epwe aukatiu an feioch won ena muu mi rikilo, iwe, epwe efeiochu ewe muun Israel lon pekin ngun. Ekkoch chok ra tuppwol ngeni Jiowa me ra tipeeu ngeni ena siwil watte. Pwal mwo nge lein chon Kraist mi enlet, ekkoch mi peni ototen chon Jus ra anini fan iten ar repwe liwiniti ekkewe “mettoch mi apwangapwang me lamot mwaal” lon ewe Allukun Moses, ewe mi fen pwonuta lon Kraist.​—Kalesia 4:9; 5:6-12; Filipai 3:2, 3.

16. Noun Jiowa kkewe chon angang mi tuppwol ra kan fet lupwen mettoch epwe siwil?

¹⁶ Iwe nge, lon ei fansoun, noun Jiowa kkewe aramas ra fen anneta pwe ir mi kan tuppwol lon ekkewe fansoun a wor siwil watte. Lupwen saramen ewe enlet epwe ttittineta, a kan wor siwil. (Än Salomon Fos 4:18) Kanoto chok, “ewe chon angang mi tuppwol me tipatchem” a fen alisikich pwe epwe ffatolo weween ewe kapas “tappin aramas” mi mak lon Mattu 24:34 me ineet epwe fis ewe angangen aimufeseni “ekkewe siip” me “ekkewe siike” mi mak lon Mattu 25:31-46 me pwal met sokkun ekiek sipwe eani ussun ach angang ngeni muun fonufan. (Mattu 24:45) Esor tipemwaramwar pwe chon rikilo repwe fen pwapwa ika chommong Chon Pwarata Jiowa ra fen kamwochunnuk won ekkewe awewe mi fen katowu me mwan ussun ekkena mettoch, nge rese ekiekin feffeita. Nge ese fis ena. Met popun? Pun noun Jiowa kkewe aramas ra tuppwol.

17. Ifa ussun attongach kkewe repwe tongeni efisata sossotun ach tuppwol fan ekkoch?

¹⁷ Iwe nge, eli ewe sokkun tuppwol mi mwaal epwe tongeni kku manauach. Lupwen emon chienach mi achengicheng are pwal mwo nge emon chon ach famili epwe filata eu aal mi u ngeni allukun Paipel, eli sipwe meefi pwe sia tiperueru. Sia kan pukun meefi tuppwol ngeni chon ach famili. Nge esap fan eu ach sipwe akkomwa ach tuppwol ngeniir mwen ach tuppwol ngeni Jiowa! (Alollo ngeni 1 Samuel 23:16-18.) Sisap pwal alisi chon ffofforingau le aopa tipisilap are peniir le u ngeni ekkewe elter mi sotun ‘awenecharasefalliir fan ngunun mosonoson.’ (Kalesia 6:1) Ina eu ffofforun rikilo seni Jiowa, an mwicheich, me emon attongach. Epwe wewe ngeni pwe ach eppeti emon chon tipis seni an kuna ewe apwung mi lamot ngeni epwe ussun ita ach eppeti eu ffofforun tong seni Jiowa an epwe tori i. (Ipru 12:5-7) Pwal chechchemeni pwe “mi tuppwol an emon kinas ren emon mi tongei i.” (Än Salomon Fos 27:6) Eli fon mi wenechar me mi popu seni tong, iwe, a longolong won ewe Kapasen Kot epwe akinasa letipen emon attongach mi tipis, nge eli epwe tongeni selani manauan lon mwach kkan!

Tuppwol a kan Likiitu fan Riaffou

18, 19. (a) Met Ahap a mochen angei seni Napot, me pwata Napot ese tipeeu ngeni? (b) A ita lamot mwaal tuppwolun Napot? Awewei mwo.

¹⁸ Fan ekkoch an Setan fiu ngeni ach tuppwol epwe ussun ita sia wesewesen sapfengen me i. Ekieki mwo porausen Napot. Lupwen King Ahap a sotuni eriani i pwe epwe amomo ngeni an we atakeen krep, atewe a apasa pwe “Me ren meefien Jiowa, usap fokkun tongeni ekiekin ngonuk alemwiriei me ren semelapei kkewe.” (1 King 21:3) Sap minne Napot a tipeforea, nge a chok tuppwol. Ewe Allukun Moses a apasa pwe esap wor emon chon Israel an epwe amomofocheielo eu fonu a alemwiri. (Lifitikos 25:23-28) Napot a silei pwe ena king mi sorongau epwe tongeni nnielo i, pun Ahap a fen mut ngeni puluwan we, Jesepel, pwe epwe nnielo chommong noun Jiowa kkewe soufos! Iwe nge, Napot a uppos.​—1 King 18:4.

¹⁹ Fan ekkoch tuppwol epwe atoto feiengau. Ren alillisin ekkoch “mwan mi lamotongau,” Jesepel a tipimwaal ngeni Napot ren eu tipis atewe ese ffori. Ina minne, ir me noun kkewe mwan ra nninniilo. (1 King 21:7-16; 2 King 9:26) A ita wewe ngeni pwe esor lamoten an Napot pwarata tuppwol? Aapw! Napot emon lein ekkewe chommong mwan me fefin mi tuppwol, iwe, ir mi ‘manau’ lon ekiekin Jiowa iei, nge ra okkonnut fan lukulukoch lon peias tori an epwe war ewe fansoun manausefal.​—Luk 20:38; Fofor 24:15.

20. Ifa ussun apilukulukoch epwe tongeni alisikich fan iten ach sipwe amwochu ach tuppwol?

²⁰ Ina ewe chok pwon mi efisata lukulukoch lon letipen noun Jiowa kkewe aramas mi tuppwol ikenai. Sia silei pwe eli ach tuppwol epwe atoto ngenikich watte feiengau lon ei fonufan. A pout seni Jises Kraist manauan pokiten an pwarata tuppwol, me a ereni noun kkewe chon kaeo pwe epwe pwal ina ussur. (Jon 15:20) A likiitu pokiten ewe apilukuluk a nom ren, iwe, pwal ussun chok, sia likiitu pokiten ewe apilukuluk mi nom rech. (Ipru 12:2) Ina minne, sipwe tongeni pwarata tuppwol fan sokkun riaffou meinisin.

21. Met sokkun minen alukuluk Jiowa a kan awora ngeni noun kkewe aramas mi tuppwol?

²¹ A enlet pwe ekkoch chok leich ra kuna ena sokkun riaffou fan iten ach tuppwol. Nge eli noun Kot kkewe aramas repwe kuna lapaloon ena sokkun riaffou mwen an epwe war ewe sopwoloon. Ifa ussun sipwe tufichin amwochu ach tuppwol? Ren ach pwappwarata tuppwol iei. Jiowa a fen awisa ngenikich eu angang mi lapalap, angangen afalafala me asukula ngeni aramas porausen Muun we. (1 Korint 15:58) Ika sise mut ngeni apwangapwangen aramas an epwe atai ach tuppwol ngeni an Jiowa mwicheich me ika sipwe tumunukich seni ach eani ewe sokkun tuppwol ese pwung, iwe, sipwe mmonleta ika epwe lapalo sossotun ach tuppwol. Nge ese lifilifil met epwe fis, sipwe tongeni luku fansoun meinisin pwe Jiowa epwe tuppwol fansoun meinisin ngeni noun kkewe chon angang mi tuppwol. (2 Samuel 22:26) Ewer, epwe tuttumunu noun kkewe aramas mi tuppwol!​—Kol Fel 97:10.

[Footnote]

Ifa Ussun Kopwe Polueni?

◻ Ifa ussun sipwe tongeni tumunukich pwe site mut ngeni apwangapwangen aramas ar repwe arikikichelo seni ewe aalen pwung?

◻ Ifa ussun pwisin apwangapwangach kkewe epwe tongeni emmwenikichelong lon ffoffor ese pwung?

◻ Ifa ussun sipwe tongeni tumunukich pwe site eani ewe sokkun tuppwol ese pwung?

◻ Met epwe alisikich pwe sipwe amwochu ach tuppwol lon pwal mwo nge fansoun aramas repwe eriaffoukich?