Feffetal Me Kot​—Ewe Poputaan

“Oupwe arap ngeni Kot, iwe, epwe arap ngenikemi.”​—JAMES 4:8.

1, 2. Met popun kopwe era pwe om tufichin angang ngeni Jiowa a wewe ngeni eu wiis mi auchea?

EWE mwan a riaffou lon kalapus fite, fite ier. Iwe, kingen ewe fonu a korato. Muttir chok, ewe chon kalapus a poputa an angang fan iten ewe king mi pochokkul seni meinisin won fonufan. Ewe a piin kalapus a eani eu wiis tekia me a mmen watte an aramas asamolu. Josef​—ewe a fen fofo pechen ren mecha​—a feffetal me emon king!​—Keneses 41:14, 39-43; Kol Fel 105:17, 18.

² Ikenai, aramas ra tufichin angang ngeni emon mi lap seni ewe Farao lon Isip. Ewe mi Tekia Seni Meinisin lon lang me won fonufan a etiwakich le angang ngeni. Ach fori me ach tufichin chiechioch me Jiowa, ewe Kot mi lapalap seni meinisin, a wewe ngeni eu wiis mi fokkun auchea! Lon ewe Paipel, manaman, lingemwarar, pwal kinamwe, ling, me murinno, ikkeei ir ekkewe lapalap mi weneiti Jiowa. (Isikiel 1:26-28; Pwarata 4:1-3) An kewe foffor meinisin mi ur ren tong. (1 Jon 4:8) Ese kapas chofana. (Numperis 23:19) Me Jiowa esap aletipengaua noun kewe mi tuppwol. (Kol Fel 18:25) Ren ach atipeeufengenni manauach me an kewe alluk mi pwungoch, sipwe tongeni manaueni eu manau mi pwapwa me auchea iei, me sipwe pwal ekieki ewe manau esemuch lon mwach kkan. (Jon 17:3) Esor emon sou nemenem won fonufan a tufichin awora ena esin feioch me wiis auchea.

3. Ifa ussun Noa a ‘fetal me ewe Kot mi enlet’?

³ Loom, loom, Noa a filata pwe epwe manaueni manauan me ren letipen Kot. Ussun Noa, ewe Paipel a apasa: “Noa emon mwan mi pwungoch. A anneta pwungochun lein pilon kana. Noa a fetal me ewe Kot mi enlet.” (Keneses 6:9, New World Translation) Pwungun pwe, Noa ese wesewesen fetal me Jiowa, pun “ese mo wor emon mwan mi kuna Kot.” (Jon 1:18) Noa a fetal me Kot ren an fori alon minne Kot a apasa. Pokiten an fangelo manauan le fori letipen Jiowa, a pwapwaiti eu chiechioch me ewe Kot mi Tekia Seni Meinisin. Ussun Noa, fite milion ra ‘feffetal me Kot’ ren ar atipeeu manauer me an Jiowa we fon me asukul. Ifa ussun emon epwe poputa le fori?

Mi Lamot Sile mi Enlet

4. Ifa ussun Jiowa a asukula noun kewe aramas?

⁴ Ika sipwe fetal me Kot, sipwe loom silei i. Ewe soufos Aisea a oesini: “Iwe, epwe wesewesen fis le akkamuchuloon ekkewe ran pwe chukun imwen Jiowa we epwe lukucharetiu asen ungungen ekkewe chuuk, iwe, epwe kekita asen ekkewe chukuchukuta, me ekkewe einang meinisin repwe feita ngeni. Iwe, chommong aramas repwe wesewesen feilo me apasa: ‘Feito, ami kana aramas, sipwe feita ngeni chukun Jiowa we, ngeni imwen ewe Koten Jekop; iwe, i epwe asukulakich ussun an kewe aal, iwe, sipwe feffetal lon an kewe aal.’ Pun seni Saion epwe katowu alluk, me ewe kapasen Jiowa seni Jerusalem.” (Aisea 2:2, 3, NW) Ewer, sipwe lukuluk pwe Jiowa epwe asukula aramas meinisin mi mochen fetal won an kewe aal. Jiowa a fen awora an we Kapas, ewe Paipel, me a alisikich le weweiti. Eu minen alillis ina ewe “chon angang mi tuppwel o tipatchem.” (Mattu 24:45-47) Jiowa a nounou ‘ewe chon angang mi tuppwol’ ren an epwe awora asukul lon pekin ngun ren kaworen puken aweween Paipel, mwichen Chon Kraist, me ewe kokkotun kaeo Paipel ngeni aramas ese lifilifil. Kot a pwal alisi noun kewe aramas le weweiti an we Kapas ren an we ngun mi fel.​—1 Korint 2:10-16.

5. Pwata ewe enlet lon Paipel a kon auchea?

⁵ Inaamwo ika sise watiu moni fan iten ewe enlet lon Paipel, mi fokkun watte aucheaan. Atun ach kaeo ewe Kapasen Kot, sia kaeo ussun Kot​—itan, lapalapan, letipan, me ussun an kewe foffor me aramas. Sia pwal kaeo poluen ekkoch kapas eis mi tongeni angasakichelo: Met popun sia nonnom ikei? Pwata Kot a mut ngeni an aramas riaffou? Met epwe fis lon mwach kkan? Met popun sia chinnapelo me malo? Mei wor manau mwirin malo? Sia pwal kaeo ussun letipen Kot fan itach, are, ifa ussun sipwe fetal ren ach sipwe unusen apwapwai i. Sia kaeo pwe an kewe alluk mi murinno ngenikich me repwe efeiochukich lupwen sia apwonuureta. Ika ese wor an Kot awewe, sise tongeni weweiti ekkeei mettoch.

6. Menni aal sipwe tongeni fetal won ika a nom rech ewe sile mi enlet seni ewe Paipel?

⁶ Ewe enlet seni Paipel a watte manamanan me a amwokutukich le siwili manauach. (Ipru 4:12) Mwen ach angei ewe sile seni Paipel, sia chok fetal “lon pungun ei fonufan.” (Efisus 2:2) Nge ewe sile mi enlet lon an Kot we Kapas a isetiu mwach eu aal mi sokkolo lapalapan pwe sipwe tufichin “manaueni ewe sokkun manau mi fich ngeni ach Samol, ewe sokkun manau i epwe unusen pwapwa ren.” (Kolose 1:10) A ifa me watteen ach chengel le poputa ach fetalfengen me Jiowa, ewe a lingemwarar seni meinisin lon lang me fonufan!​—Luk 11:28.

Ruu Mettoch mi Lamot—Fangelo Manau me Papatais

7. Atun ach kakkaeo ewe Kapasen Kot, menni poraus mi enlet ussun an aramas nemenem a pwalo?

⁷ Lupwen a lapelo ach weweochuti ewe Paipel, sia poputa le atittina fofforun chon fonufan me pwisin ach foffor me ren ewe saram lon pekin ngun seni an Kot we Kapas. Eu enlet mi lamot a pwalo. Ewe soufos Jeremaia a makketiu ena poraus mi enlet loom, loom: “Ai Samol mi Lapalap, ua silei pwe aramas resap pusin nemeni manauer, resap pwal tongeni akota mine repwe fori [emmweni pwisin ipwer, NW].” (Jeremaia 10:23) Aramas​—kich meinisin​—sia osupwangen an Kot emmwen.

8. (a) Met a amwokutu aramas le fangelo manauer ngeni Kot? (b) Ifa weween an Chon Kraist fangelo manauer?

⁸ Weweochun ei poraus mi lamot epwe amwokutukich le kutta emmwen seni Jiowa. Tongen Kot a amwokutukich le fangelo manauach ngeni. Ren ach sipwe fangelo manauach ngeni Kot sipwe kori lon iotek me pwon pwe sipwe aea manauach le angang ngeni me fetal won an kewe aal ren tuppwol. Iei ussun, sia appiru an Jises fangelo manauan ngeni Jiowa me apposa letipan le angang ngeni pwonutaan letipen Kot.​—Ipru 10:7.

9. Met popun emon epwe fangelo manauan ngeni Jiowa?

⁹ Jiowa Kot ese eriani are ammosoku emon le fangelo manauan ngeni i. (Alollo ngeni 2 Korint 9:7.) Pwal och, Kot ese ekieki pwe emon epwe fangelo manauan pokiten chok och memmeef mi tongeni muttir morelo a nom lon letipan. Mwen an papatais, emon epwe fen wiliiti emon chon kaeo, weween pwe a fen tinikken lon an kaeo ren an epwe angei sile. (Mattu 28:19, 20) Paul a tingorei ekkewe mi fen papatais pwe repwe ‘fangelo inisir ussun chok asor mi manau, asor mi pin, asor Kot epwe pwapwa ren, eu angang mi pin a for me ren ar tufichin ekiek.’ (Rom 12:1, NW) Ussun we chok, ren ach pwisin anganga ach tufichin ekiek, sia fangelo manauach ngeni Jiowa Kot. Mwirin ach kaeo ussun minne a kapachelong lon ach fangelo manauach ngeni Kot me ach ekkekiekifichi wiisach, sia pukun fangelo manauach ngeni Kot ren chengel.​—Kol Fel 110:3.

10. Ifa ussun fangelo manau a weneiti papatais?

¹⁰ Mi chuen wor minne sipwe fetal ngeni mwirin ach fos ngeni Kot lon iotek ren ach sipwe affata ngeni ach apposa letipach le fetal won an kewe aal. Sipwe pwarata ach fangelo manauach mwen aramas ren ach papatais lon konik. A wewe ngeni eu pwarataan ach pwon pwe sipwe fori alon letipen Kot we. Le poputaan an Jises we angangen afalafal, Jon a papataisi Jises, iwe, a isetiu ewe leenien appiru fan itach. (Mattu 3:13-17) Mwirin, Jises a awiisa ngeni noun kewe wiiser, wiisen foralo chon kaeo me papataisiir. Ina popun, fangelo manau me papatais ir ruu mettoch mi lamot ika emon a mochen fetalfengen me Kot.

11, 12. (a) Ifa ussun sipwe tongeni alollofengenni papatais me eu apupulu? (b) Ifa ussun a chok wewe ach riri ngeni Jiowa me ewe riri lefilen chon pupulu?

¹¹ An emon wiliiti noun Jises chon kaeo mi fen fangelo manauan me papatais a ekis ussun pupulu. Lon chommong fonu, epwe wor mettoch epwe fis mwen ewe ranin apupulu. Emon mwan me emon fefin repwe kunafengenniir, silefengenniir, me tongefengenniir. Mwirin, ra kofot. Ewe apupulu epwe pwarata ngeni aramas minne ra fen filata lefiler​—pwe repwe pupulu me nonnomfengen. Ewe apupulu epwe pwari ar chiechi mi sokkolo lapalapan. Ena ran a wewe ngeni poputaan ar pupulu. Ussun we chok, papatais a wewe ngeni ewe poputaan eu manau mi fangelo ngeni an emon feffetal me ren an chiechi me Jiowa.

¹² Ekieki ussun pwal eu mettoch. Mwirin ewe ranin apupulu, ewe tong lefilen ewe mwan me fefin epwe ita lapelo me asimauelo. Ren ar repwe chiechiochfengen, ekkewe ruuemon repwe achocho le apochokkula ekkewe riri lefiler. Inaamwo ika Kot esap puluwach nge, mwirin ach papatais sipwe fokkun amwochu ach chiechioch me Jiowa. A kuna me afanni ach achocho le fori letipan me epwe arap ngenikich. “Oupwe arap ngeni Kot,” Jemes a makketiu, “iwe, epwe arap ngenikemi.”​—Jemes 4:8.

Fetal lon Ipwen Jises Kewe

13. Lon ach feffetal me Kot, sipwe appiru io?

¹³ Ren ach sipwe fetal me Jiowa, sipwe tapwelo mwirin ewe leenien appiru Jises Kraist a isetiu. Ewe aposel Piter a makkei: “Pun iei popun a fen korikemi, pwe Kraist a pwal kuna riaffou fan asengesimi, o a isetiu eu leenien appiru mwemi, pwe ami oupwe tapwelo mwirin lon ipwan.” (1 Piter 2:21) Jises mi unusoch nge kich sise unusoch, ina popun sise tongeni unusen appiru Jises. Nge Jiowa a mochen pwe sipwe achocho ngeni me ren ach tufich. Sipwe ekieki ussun limu mettoch lon manauen Jises me lon an angangen afalafal ekkewe Chon Kraist mi fen fangelo manauer repwe achocho le appiru.

14. Met a kapachelong lon ach silei ewe Kapasen Kot?

¹⁴ A nom ren Jises sile mi enlet me unus ussun an Kot we Kapas. Fan chommong atun an angangen afalafal, Jises a aloni alon ekkewe wokisin lon ewe Tesin Ipru. (Luk 4:4, 8) Pwungun pwe, ekkewe nouwisin lamalam lon ranin we ra pwal aloni alon ewe Paipel. (Mattu 22:23, 24) Sokkofesenin, Jises a weweiti weween ekkewe Wokisin, me a apwonuureta lon manauan. Ese chok silei eu me eu lein ekkewe alluk nge a pwal weweiti ewe popun ra for. Atun ach appiru Jises, kich pwal, sipwe achocho le weweiti ewe Kapasen Kot, me kutta weweochuun me ngunun. Ren ach fori ina ussun, sipwe wiliiti chon angang Kot a pwapwa ren mi ‘forifichi lon ach anganga ewe kapas mi enlet.’​—2 Timoti 2:15.

15. Ifa ussun Jises a isetiu eu pisekin nengeni ren an foffos ussun Kot?

¹⁵ Kraist Jises a fos ngeni aramas ussun Seman lon lang. Jises ese amwochu an sile ussun an Kot we Kapas. Pwal mwo nge chon koputaan ra eiten ngeni “Sense,” pokiten an foffos ekis meinisin ussun Jiowa me letipan kewe. (Mattu 12:38) Jises a afalafala aramas lon imwen fel, lon sinakok, lon telinimw, me lukun telinimw. (Mark 1:39; Luk 8:1; Jon 18:20) Jises a asukula aramas ren umoumoch me kirokiroch, me a tongei ekkewe aramas a alisi. (Mattu 4:23) Chokkewe mi akkappiru Jises ra pwal kutta sokkopaten leeni me lapalap ren ar repwe asukula aramas ussun Jiowa Kot me an kewe pwon mi amwarar.

16. Ifa pochokkulen ewe riri lefilen Jises me ekkewe mi fel ngeni Jiowa?

¹⁶ Jises a meefi ewe riri mi pochokkul me ekkewe mi fel ngeni Jiowa. Atun Jises a fos ngeni eu pwin aramas, inan me pwiin kewe mi lukulukummang ra mochen fos ngeni. Iei alon ewe Paipel: “Iwe, emon a apasa ngeni i, ‘Nengeni, inom me pwiom kewe ra u lukun, pun ra mochen kapas reom.’ Nge a polueni atewe mi kapas ngeni i, ‘Io inei, pwal io kena pwii?’ Iwe, a chok eitielo poun won noun kewe chon kaeo, o a apasa, ‘Nengeni inei me pwii kena! Pun are emon a fori letipen Semei mi nom lang, i epwe pwii me fefinei, me inei.’” (Mattu 12:47-50) Sap minne Jises ese chuen tongei an famili pun minne a fis mwirin a anneta pwe a fokkun tongeer. (Jon 19:25-27) Nge, ei poraus a menlapei watteen ewe tong Jises a meefi fan iten chienan kewe chon luku. Ussun we chok ikenai, chokkewe mi fetal me Kot repwe kutta chiechier lein noun Jiowa kewe chon angang me amaaraata ar tongeer.​—1 Piter 4:8.

17. Met meefien Jises ussun an foffori letipen Seman lon lang, me ifa ussun ena poraus epwe kku kich?

¹⁷ Ren an foffori letipen Kot, Jises a pwarata an tongei Seman lon lang. Jises a alleasochisi Jiowa lon mettoch meinisin. A apasa: “Iei anei, pwe upwe fori letipen ewe emon mi tinieito, o upwe pwal efisata an angang.” (Jon 4:34) Kraist a pwal apasa: “Fansoun meinisin ua chok fori minne [Kot] epwe pwapwa ren.” (Jon 8:29) A kon watte an Jises tongei Seman lon lang pwe a “pwisin atekisonatiu o a chok alleasochik tori malo.” (Filipai 2:8) Iwe, Jiowa a efeiochu Jises, me a atekiata i ngeni eu nemenem me ling mi kisikis fan Jiowa chok. (Filipai 2:9-11) Ussun Jises, sia pwaralo ach tongei Kot ren ach alleasochisi an kewe alluk me ren ach foffori letipan.​—1 Jon 5:3.

18. Ifa ussun Jises a isetiu eu leenien appiru ren ewe mettoch iotek?

¹⁸ Jises emon mi ikkiotek. Jises a iotek lupwen a papatais. (Luk 3:21) Mwen a filata ekkewe 12 aposel, a iotek unusen ewe pwin. (Luk 6:12, 13) Jises a aiti ngeni noun kewe chon kaeo ifa ussun repwe iotek. (Luk 11:1-4) Lon ewe pwinin mwen an malo, a iotek fan iten noun kewe chon kaeo me a iotek rer. (Jon 17:1-26) Iotek eu kinikinin manauen Jises mi lamot. Epwe ita ussun we chok lon manauach pun kich sia tapwelo mwirin. A ifa me watteen ewe liffang, ach tufichin fos lon iotek ren ewe Sou Nemenemen lang me fonufan! Pwal och, Jiowa a polueni iotek, pun Jon a makkei: “Iei ewe apilukuluk allim mi nonnom rech lon i: are sia tingor och mettoch usun letipan, iwe, epwe auselingakich. O are sia meefi pwe epwe auselingakich ren ekkewe mettoch meinisin minne sia tingor, iwe, sia pwal meefi pwe sia fen angei ekkewe mettoch sia tingor seni i.”​—1 Jon 5:14, 15.

19. (a) Ikkefa lapalapen Jises kewe sipwe akkappiru? (b) Ifa ussun sipwe tongeni kuna feioch seni ach kaeo ussun manauen Jises me an we angangen afalafal?

¹⁹ Mei wor chommong mettoch sipwe kaeo seni ach atittinafichi manauen Jises me an angangen afalafal! Ekkekieki lapalapan kewe: tong, umoumoch, kirokiroch, pochokkul, an itepok me ruu epek, tipemecheres, tipetekison, pwora, me kisaseu. Sile ussun Jises a apochokkula ach chiechioch me Jiowa pun Jises a weichiki Seman lon lang. A kon watte ar chiechiochfengen pwe Jises a tufichin apasa: “Ewe mi kunaei a fen kuna ewe Sam.”​—Jon 14:9.

Lukuluk lon An Kot Amanauok

20. Ifa ussun sipwe pochokkulelo lon ach feffetal me Jiowa?

²⁰ Lupwen semirit ra keran silei fetal, ar fetal ese lukuchar. Ifa ussun ar fetal epwe lukucharelo? Ren asossot me likiitu. Iwe, ekkewe mi feffetal me Jiowa repwe achocho le alukuchara ar fetal. Ena mettoch epwe pwal wewe ngeni watteen fansoun asossot me likiitu. Paul a menlapei ewe lamoten likiitu lon ach feffetal me Kot lupwen a makkei: “Iwe, sopolon, ami pwii kena, am aia tingor pwal fonoukemi lon ewe Samol Jises, usun chok oua fen kaeo senikem usun lapalapen manauemi o usun ami oupwe apwapwai Kot, usun oua fen fori, nge oupwe pwal achocho ngeni.”​—1 Tesalonika 4:1.

21. Atun ach feffetal me Jiowa, ikkefa ekkewe feioch sipwe tongeni pwapwaiti?

²¹ Lupwen sia unusen achocho le angang ngeni Kot, epwe alisata ach feffetal ren. (Aisea 40:29-31) Esap wor och mettoch lon ei fonufan mi lollo ngeni ekkewe feioch epwe tori aramas mi feffetal won an kewe aal. I ewe emon mi ‘aitingenikich ifa ussun sipwe pwisin efeiochukich, ewe Emon mi efisi ach fetal won ewe aal mi pwung. Ika sipwe auselinga an kewe alluk ach kinamwe epwe wewe ngeni eu chanpupu, me ach pwung epwe wewe ngeni ekkewe noon saat.’ (Aisea 48:17, 18, NW) Ren ach nguuri ewe kapasen etiwetiw le fetalfengen me Kot me ach fori lon tuppwol, sipwe pwapwaiti ach kinamwefengen me Kot tori feilfeilo chok.

Ifa Ussun Kopwe Polueni?

◻ Met popun ach fetal me Kot a wewe ngeni eu wiis mi auchea?

◻ Met popun kaeo, fangelo manauach, me papatais ra wewe ngeni ewe poputaan ach feffetal me Jiowa?

◻ Ifa ussun ekkoch mi tongeni fetal lon ipwen Jises kewe?

◻ Ifa ussun sia silei pwe Jiowa epwe amanauakich atun sia fetal ren i?

[Sasing lón pekin taropwe 5]

Kaeo, fangelo manau, papatais, ra wewe ngeni ewe poputaan ach feffetal me Kot