Ach Pisek Auchea Lon Sepi Ppwul Kkana

“Mei nom rech pisek auchea lon sepi ppwul kkana, pwe ewe manaman mi sokkolo watteen epwe popu seni Kot nge esap seni pwisin kich.”​—2 KORINT 4:7.

1. Ifa ussun ewe leenien appiru Jises a isetiu epwe ita apochokkulakich?

ATUN an Jises nonnom won fonufan, Jiowa a alapalapa manauan, iwe, a pwisin kuna are meefi apwangapwangen aramas. An tuppwol epwe apochokkulakich pwe sipwe ussun chok i! Iei makkeien emon aposel: “Pwungun pwe oua fen kokko ngeni ei aalen manau, pun Kraist a kuna riaffou fan asengesimi, iwe, a isetiu eu leenien appiru pwe oupwe ipweni ipwan.” (1 Piter 2:21) Ren an tipemecheres ngeni ena ffofforun alapalapa manauan, Jises a pworacho ngeni fonufan. A pwal apworai noun kkewe aposel pwe repwe pworacho ngeni fonufan. (Fofor 4:13, 31; 9:27, 28; 14:3; 19:8) Iwe, a ifa watteen ewe kapasen pesepes a awora le sopwoloon an saingoon afalafal ngenir! Iei alon: “Ua fen erenikemi ekkeei mettoch pwe oupwe kuna kinamwe seniei. Lon fonufan oua kukkuna riaffou, nge ousap fangeta! Ua fen pworacho ngeni fonufan.”​—Jon 16:33.

2. Ifa ewe saram mi nom rech, nge mi mwaalfesen me mesechunen chon fonufan?

² Pwal ussun chok, mwirin an Paul pwarata sokkofesenin ewe sokkun mesechun “ewe koten ei otot minen lom” a kan efisata me “saramen ewe poraus allim mi amwarar,” iei alon ussun ach angangen afalafal mi fokkun auchea: “Mei nom rech ei pisek auchea lon sepi ppwul kkana, pwe ewe manaman mi sokkolo watteen epwe popu seni Kot, nge esap seni pwisin kich. Chommong mettoch ra chounikich, nge sap minne sisap tongeni mwokut; sia tiperueru, nge sap minne esor aalen ngaselo; sia kuna riaffou, nge sise tamepichilo; sia kuna kawet, nge sise nninniilo.” (2 Korint 4:4, 7-9) Inaamwo ika kich “sepi ppwul” mi apwangapwang, nge Kot a fen alapalapakich ren an we ngun mi fel pwe sipwe tongeni unusen pworacho ngeni an Setan we fonufan.​—Rom 8:35-39; 1 Korint 15:57.

Ewe Ffofforun Alapalapa Israel Lom Lom

3. Ifa ussun Aisea a awewei an Kot alapalapa ewe muun Jus?

³ Jiowa ese chok alapalapa aramas nge pwal ekkoch muu unus. Ren chok awewe, lupwen Israel lom a tipemecheres ngeni an Jiowa ffofforun alapalap, a kuna feioch. Nge lo, lo, a eani eu aalen alleasolap. Ina minne, ewe Chon Alapalapa Israel a efisata “riaffou” ngeni. (Aisea 45:9) Lon ewe awaluen senturi B.C.E., Aisea a kapas ngeni Jiowa ussun tipisilapen Israel, nge iei alon: “O Jiowa, en Semem. Am ewe ppwul, me en ewe Chon Alapalapakem; iwe, am meinisin fforien poum. . . . Meinisin pisekim kkewe mi auchea a fen kiteterilo.” (Aisea 64:8-11) Israel a fen wililo ngeni eu sepi mi fichiiti chok an epwe kiteterilo.

4. Menni poraus Jeremaia a pwomweni?

⁴ Ipuku ier mwirin, lupwen a arapoto ewe ranin apwung, Jiowa a ereni Jeremaia pwe epwe angei eu rume me fitalo ekkoch mwan mi chinnap seni Jerusalem ngeni ewe Lemolun Chuukun Hinnom, iwe, iei an emmwen ngeni: “Kopwe amokku ewe rume mwen mesen ekkewe mwan mi fituk. Iwe, kopwe erenir, ‘Iei alon Jiowa sapaot: “Epwe chok ina ussun upwe atai ekkeei aramas me ei telinimw, ussun an emon amokku sepien ewe chon ffor sepi, iwe, esap tongeni fforsefal mwirin.”’”​—Jeremaia 19:10, 11.

5. Ifa ukuukun watteen an Jiowa apwung won Israel?

⁵ Lon 607 B.C.E., Nepukatnessar a ataielo Jerusalem fitifengen me an we imwen fel, me a uweialo ekkewe chon Jus mi chuen manau pwe repwe fotek lon Papilon. Nge mwirin ar choisa ukuukun 70 ier, chon Jus mi aier ra tufichin liwin pwe repwe fforsefalli Jerusalem me an we imwen fel. (Jeremaia 25:11) Iwe nge, lupwen a tori ewe aewin senturi C.E., ewe muu a fen rikilo seni ewe Chon Ffor Sepi Ppwul mi Lapalap, iwe, lo, lo, a eani ewe tipis mi watte seni meinisin, tipisin an nnielo Noun Kot we. Lon 70 C.E., Kot a aea ewe Muun Rom pwe epwe wisen ataielo ototen ekkewe chon Jus, iwe, a aterielo Jerusalem me an we imwen fel. A ina ukutiuen an Jiowa alapalapa ewe muun Israel fan iten an epwe wiliiti och mettoch mi “fel me lingoch.”a

Ffofforun Alapalapa eu Muu lon Pekin Ngun

6, 7. (a) Ifa ussun Paul a awewei an Kot alapalapa ewe Israel lon pekin ngun? (b) A wor fitu ekkewe “sepien umoumoch,” me io kkewe ra kapachelong leir?

⁶ Chon Jus mi luku Jises ra wiliiti longolongun eu minefoon muu, ewe “Israelin Kot” lon pekin ngun. (Kalesia 6:16) Iwe, a pwung alon Paul ei: “Iwe met? Esap pwe ewe chon ffor sepi ppwul a nemeni ewe ppwul pwe epwe fforata seni och ppwul eu sepi fan iten eu popun mi auchea, me pwal eu fan iten eu popun mi pwutak? . . . Kot, inaamwo ika a tufichin pwarata an song me an manaman, a mmen mosonottam ngeni ekkewe sepien song mi fich ngeni ar repwe kataalo, pwe epwe pwarata woun lingan won ekkewe sepien umoumoch, minne kkewe a ammonlereta mesemwan fan iten ling.”​—Rom 9:21-23.

⁷ Mwirin an manausefal, Jises a pwarata pwe ekkena “sepien umoumoch” repwe tori 144,000. (Pwarata 7:4; 14:1) Pokiten ewe muun Israel ese awora meinisin ena ukuukun aramas, iwe, Jiowa a wasi an umoumoch pwe epwe tori chon ekkewe muu meinisin. (Rom 11:25, 26) Ewe minefoon mwichefelin Kraist a muttir lapalo. Mwirin 30 ier ewe poraus allim a fen “afalafalfeil ekis meinisin fan lang.” (Kolose 1:23) Iwe, a lamot an epwe wor och kokkotun emmwen fan iten ekkewe mwichefel mi nomofetal.

8. Io kkewe ra kapachelong lon ewe mwichen sou pwungupwung le poputaan, me ifa ussun ena mwich a siwil?

⁸ Jises a fen ammonlata 12 aposel pwe repwe wiliiti ewe akkaewin mwichen sou pwungupwung, iwe, a asukuler fitifengen me pwal fitemon fan iten ewe angangen afalafal. (Luk 8:1; 9:1, 2; 10:1, 2) Lon Pentecos 33 C.E., a poputa ewe mwichefelin Kraist, iwe mwirin, an we mwichen sou pwungupwung a lapalo pwe epwe kapachelong “ekkewe aposel me mwan mi asimau lon Jerusalem.” Ren och fansoun mi ttam, a ussun ita nge Jemes, pwiin Jises we, a wisen sou emmwen lon, inaamwo ika esap i emon aposel. (Fofor 12:17; 15:2, 6, 13; 21:18) Me ren ewe sou uruwo Eusebius, aramas ra akkaewin ekiekin eriaffou ekkewe aposel, iwe, ra toropasfeil lon ekkewe fonu lukun. Ina minne, a siwil chon ewe mwichen sou pwungupwung.

9. Ifa ewe mettoch mi aletipechou Jises a oesini an epwe fis?

⁹ Arap ngeni muchuloon ewe aewin senturi, ‘ewe chon oput, ewe Tefil,’ a poputa le ‘amorafeili petewel ingau’ lein ir mi ussun wit, nge ir chon alemwiri “ewe muun lang.” Jises a fen oesini pwe epwe mumuta ena mettoch mi ngau tori ewe fansoun ras le “muchuloon ewe otot minen lom.” Iwe, lon ena atun, ‘ekkewe chon pwung repwe tittin ussun saramen ewe akkar lon muun Semer we.’ (Mattu 13:24, 25, 37-43) Ineet epwe fis ena?

An Kot Alapalapa ewe Israelin Kot Ikenai

10, 11. (a) Ifa ussun a poputa ewe angangen alapalapa ewe Israelin Kot lon ei fansoun? (b) Ikkefa ekkewe afalafal mi sokkofesen Christendom me ekkewe Bible Student mi tinikken ra eani?

¹⁰ Lon 1870, Charles Taze Russell a fforata eu mwichen chon kaeo Paipel lon Pittsburgh, Pennsylvania, U.S.A. Lon 1879 a poputa le peressei ewe chassi mi iteni Ewe Leenien Mas ikenai. Ekkena Bible Student ra muttir weweiti pwe Christendom a luku ekkewe afalafal seni ekkewe lamalamen lukun, nge rese mak lon Paipel, awewe chok ren ngunun aramas epwe manaufoch, ekkeiin ell, purkatorio, ulumon kot lon emon, me papataisin monukol.

¹¹ Iwe nge, a lamot seni ena pwe ekkena chon tongei ewe enlet seni Paipel ra alukucharasefalli ekkewe populapen afalafal lon Paipel, awewe chok ren ewe angangen amanau mi longolong won an Jises asorun penmanau me ewe manausefal ngeni manau esemuch lon eu paratis mi ur ren kinamwe won fonufan fan an Kot we Muu. Lap seni meinisin, ra menlapei pwe epwe letelo pwuungun an Jiowa Kot iteni ewe Epinkepiisom. Ekkewe Bible Student ra luku pwe Iotekin ewe Samol epwele pwonuta: “Semem lon lang, itom epwe fel. Muum epwe feito. Letipom epwe pwonuta won pwal fonufan, ussun lon lang.” (Mattu 6:9, 10) An Kot ngun mi fel a akkalapalaper pwe repwe wiliiti eu mwichen chon Kraist mi tongei kinamwe, iwe, repwe choufetal won unusen fonufan.

12. Ifa ussun ekkewe Bible Student ra weweiti lamoten eu ier?

¹² Lupwen ekkewe Bible Student ra kaeofichi Taniel sopwun 4 me pwal fitu oesini me lukun, ra luku pwe epwele poputa an Messaia Jises nemenem lon ewe wis King. Ra weweiti pwe lon 1914 epwe much “ewe fansoun mi kauk fan iten ekkewe muu.” (Luk 21:24; Isikiel 21:26, 27) Ekkewe Bible Student ra muttir alapalo ar angang ren ar fforata mwichen kaeo Paipel (mwirin ra iteni mwichefel) lon ewe United States. Lupwen a tori 1900, ar angangen achoufetalei porausen Paipel a tori Europe me Australasia. A lamot an epwe wor kokkotoch.

13. Met ekkewe Bible Student ra ffori fan iten ar angang epwe tipeeu ngeni pwungun alluk, me met sokkun angang mi fokkun auchea ewe akkaemonun presidentin ewe Society a ffori?

¹³ Ren an epwe tipeeu ngeni pwungun alluk angangen ekkewe Bible Student, a ffor ewe Zion’s Watch Tower Tract Society lon 1884 lon ewe United States, me ewe ofesilap a nom lon Pittsburgh, Pennsylvania. Ekkewe chon emmwen lon ra eani ewe wis Mwichen Sou Pwungupwung, iwe, ra emmweni ewe angangen afalafala porausen an Kot Muu won unusen fonufan. Ewe akkaemonun president lon ewe Society, Charles T. Russell, a makkei wonu puk fan iten ewe Studies in the Scriptures me a sai ngeni chommong fonu fan iten afeffeitaan ewe angangen afalafal. Atewe a pwal liffangolo ewe watteen moni a fen iseis seni an angang mesemwan fan iten angangen ewe Muu won unusen fonufan. Lon 1916, atun ewe Maun mi Lapalap a fiffis lon Europe, Brother Russell a malo atun an sai fan iten ewe angangen afalafal. A fen aea unusen manauan me pisekin kkewe fan iten afeffeitaan ewe angangen pwarata ussun an Kot Muu.

14. Ifa ussun J. F. Rutherford a ‘fiti ewe maun mi murinno’? (2 Timoti 4:7)

¹⁴ Joseph F. Rutherford, emon sou kapwung me lom lon Missouri, a wisen president mwirin. Pokiten an pwora le apochokkula ekkewe poraus enlet lon Paipel, ekkewe sou afalafal lon Christendom ra tipeeufengen me ekkewe nouwisen muun pwe repwe “efisata fitikoko ren ar aea alluk.” Lon June 21, 1918, Brother Rutherford me pwal fumon sou emmwen me lein ekkewe Bible Student ra kalapus, iwe, repwe ita kalapus 10 are 20 ier. Ekkewe Bible Student rese tipeeu ngeni. (Kol Fel 94:20; Filipai 1:7) Ra amweta ar kapwung, iwe, ra towu seni kalapus lon March 26, 1919, iwe mwirin, a kapwungulo pwe ese fokkun pwung ewe tipimwaal ra kalapus ren, weween, ar ita u ngeni ewe muu.b Minne a fis ngenir a alapalaper pwe repwe wiliiti chon kamwochunnuk won minne mi enlet. Ren an Jiowa alillis, ra aea mettoch meinisin pwe repwe win lon ewe maun lon pekin ngun fan iten ar repwe esilefeili ewe poraus allim, inaamwo ika Papilon mi Lapalap a u ngenir. Ena maun a chuen sopwosopwoto tori ei ier 1999.​—Alollo ngeni Mattu, sopwun 23; Jon 8:38-47.

15. Pwata ewe ier 1931 a lamot lon uruwo?

¹⁵ Lefilen 1920 me 1939, ewe Israelin Kot mi kepit a wiliwililo fan ewe emmwen seni ewe Chon Ffor Sepi Ppwul mi Lapalap. Saramen oesini seni Paipel a ttineta, iwe, a atekiatai Jiowa me a menlapei porausen an Jises Muun Messaia. Lon 1931 ekkewe Bible Student ra pwapwa ren ar angei ewe minefoon it, Chon Pwarata Jiowa.​—Aisea 43:10-12; Mattu 6:9, 10; 24:14.

16 me ewe pwor lon pekin taropwe 13. Inet a unus nampaan ekkewe 144,000, me met a anneta ena mettoch?

¹⁶ Mwirin 1930 a ussun ita a fen unus nampaan “ekkewe mi kokko me kefilita me tuppwol,” weween, ekkewe 144,000. (Pwarata 17:14; pi ewe pwor lon pekin taropwe 13.) Sise silei fitemon chon kepit ra ionfengen lon ewe aewin senturi me pwal me lein ekkewe “petewel mi ngau” lon ekkewe fitepuku ierin rochopwak lupwen a watte an Christendom rikilo seni Kot. Nge lon 1935 a wor 52,465 chon afalafal won unusen fonufan, nge kapachelaper meinisin a tori 56,153, iwe, ra pwarata pwe ra eani ewe apilukulukun manau lon lang ren ar aea ewe pilawa me wain lon ewe Achechchem. Met sokkun apilukuluk epwe nom ren chokkewe repwe ionfengen mwirin?

“Nengeni! eu Mwich mi Lapalap”

17. Ifa ewe mettoch mi lamot lon uruwo a fis lon 1935?

¹⁷ Lon eu mwichelap mi fis lefilen May 30 me June 3, 1935, lon Washington, D.C., U.S.A., Brother Rutherford a eani eu afalafal mi sokkolo lamotan, nge itelapan, “Ewe Mwich mi Lapalap.”c Ena mwich, “nge esor emon a tongeni alleani iteiter,” epwe pwa lupwen epwele muchulo mechenin ekkewe 144,000 chon ewe Israel lon pekin ngun. Chokkana repwe pwal pwarata pwe ra luku manamanen ewe moon kepich mi nom ren “chchaan ewe Lam,” Jises, me ra eani angang mi fel lon an Jiowa imwen fel, weween, an kokkot fan iten an aramas fel ngeni i. Chon ena mwich repwe “towu seni ewe riaffou mi lapalap,” iwe, repwe alemwiri ewe Paratis won fonufan, ikewe “esap chuen wor malo” ie. Fitu ier mwen ena mwichelap, a fen wor porausen chon ena mwich, iwe, ra iteni Jonatap.​—Pwarata 7:9-17; 21:4; Jeremaia 35:10.

18. Ifa ussun a mmen lamot ewe ier 1938?

¹⁸ Ewe ier 1938 a mmen lamot fan iten an epwe ffatolo weween ekkewe ruu sokkun mwichen aramas. Lon Ewe Leenien Mas, minen March 15 me April 1, 1938, a wor eu lesen mi wor ruu kinikin lon, nge a iteni “An Mwichen Siip,” iwe, a affata wisen ekkewe lusun chon kepit me chiener kkewe, chon ewe mwich mi lapalap. Iwe, lon ewe minen June 1 me June 15, a wor lesen fan iten “Kokkotoch,” iwe, a longolong won Aisea 60:17. A esilei ngeni meinisin mwichefel pwe repwe tingorei ewe Mwichen Chon Pwungupwung an epwe seikata chon emmwen lon eu me eu mwichefel, iwe mwirin, eu kokkot epwe fisita ren, efisien Kot, me epwe nom fan an emmwen. Iwe, ina ewe mettoch ekkewe mwichefel ra ffori.

19 me ewe footnote. Menni poraus a anneta pwe ewe kokko fan iten ekkewe “pwal fitemon siip” a fen sopwosopwolo ren lap seni 60 ier?

¹⁹ Iei alon ewe repot lon ewe 1939 Yearbook of Jehovah’s Witnesses: “Noun Kraist Jises kkewe chon kaeo mi kepit mi nom won fonufan iei ra chokukkun, me resap chommongolo. Lon Paipel ra iteni ‘ewe lusun’ lein noun Saion kkewe, weween, an Kot mwicheich. (Pwarata 12:17) Iei ewe Samol a kan ionfengenni noun ‘pwal fitemon siip,’ nge repwe chon ewe ‘mwich mi lapalap.’ (Jon 10:16) Chokkewe mi ionfengen iei, ir chienen ekkewe lusun. Seni iei feffeilo, chokkewe mi wewe ngeni ekkewe ‘pwal fitemon siip’ repwe chommongolo tori an epwe ionfengen chon ewe ‘mwich mi lapalap.’” Kot a alapalapa ekkewe lusun chon kepit pwe repwe akkota ewe angangen ionfengenni chon ewe mwich mi lapalap. Iwe, Kot epwe pwal alapalapa chokkana.d

20. Met sokkun siwil lon kokkotun ewe mwicheich a fen fis seni 1942?

²⁰ Lon 1942, fan January, lupwen ewe Oruuen Maunen Fonufan a muchuta, Joseph Rutherford a malo, iwe, Nathan Knorr a wisen president mwirin. Ena aulumonun presidentin ewe Society a itoch pokiten an poputani ewe theocratic sukul lon ekkewe mwichefel me ewe Gilead sukul fan iten misineri. Lon 1944, lon ewe mwich ewe Society a kan eani iteiten ier, atewe a esileilo pwe an ewe Society charter epwe siwil pwe ir mi kefilita fan iten ar repwe choni ewe Society repwe kefil me ren ukuukun pochokkuler lon pekin ngun, nge esap me ren minne repwe liffang ngeni ewe Society. Lon ekkewe 30 ier mwirin, nampaan chon afalafal a lapalo seni 156,299 ngeni 2,179,256 won unusen fonufan. Lefilen 1971 me 1975 a lamot an epwe wor siwil lon kokkotun ewe mwicheich. Emon mwan mi wisen president esap chuen tongeni emmweniochu angangen ewe Muu won unusen fonufan. Chochoon ewe Mwichen Sou Pwungupwung a lapalo ngeni 18, nge mi kan sissiwil ewe sou emmwen (chairman) lon, iwe, arap ngeni esopw leir mi fen muchulo manauer me won ei fonufan.

21. Chon ewe mwich kisikis ra tufichin muuni ewe Muu pokiten met?

²¹ Lusun chon ewe mwich kisikis ra fen wililo ren ar kuna sossot fite, fite ier. A pwora letiper pun ra fen angei ‘an ewe ngun mi fel pwarata ussur.’ Iei alon Jises ngenir: “Ami oua fen fitipach ngeniei lon ai kkewe sossot; me ua ffori eu atipeeu lefilach, ussun chok Semei a fen ffori eu atipeeu lefilem fan iten eu muu, pwe oupwe mommongo me ukkun ren ai chepel lon muui, me mommot won leenien nemenem pwe oupwe wisen eani apwung won ekkewe engol me ruu einangen Israel.”​—Rom 8:16, 17; Luk 12:32; 22:28-30.

22, 23. Ifa ussun Kot a kan akkalapalapa ewe mwich kisikis me ekkewe pwal fitemon siip?

²² Pokiten a kukkunulo chochoon ekkewe lusun chon kepit won fonufan, ekkewe mwan mi asimau lon ewe mwich mi lapalap ra fen wisen emmweni lon pekin ngun arapakan meinisin mwichefel won unusen fonufan. Iwe, lupwen ekkewe Chon Pwarata mi chinnap, nge ir chon kepit mi mwirifochofoch, repwe rosolo me won fonufan, ekkewe sa·rimʹ, weween, samol, me lein ekkewe pwal fitemon siip repwe fen lipwakochulo fan iten ar repwe wisen sou emmwen ren ar nom lon ewe mwichen samol me won fonufan.​—Isikiel 44:3; Aisea 32:1.

²³ Ewe mwich kisikis me ekkewe pwal fitemon siip ra chuen wiliwililo ngeni sepi fan iten eu popun mi auchea. (Jon 10:14-16) Ese lifilifil ika ach apilukuluk a weneiti ewe “lang sefo” are “eu fonufan sefo,” nge amwo sipwe etiwa an Jiowa kokko ren unusen letipach: “Oupwe mwanek, ami kkana aramas, me chengel tori feilfeilo chok ren minne upwe fforata. Pun ngang mi fforata Jerusalem pwe epwe eu minen chengel me noun kkewe aramas pwe repwe eu minen mwanek.” (Aisea 65:17, 18) Amwo kich aramas mi apwangapwang sipwe apwonueta ach angang fan tipetekison, me sipwe wililo ren “ewe manaman mi sokkolo watteen, weween, ewe manaman mi nom ren an Kot ngun mi fel!​—2 Korint 4:7; Jon 16:13.

[Footnote]

En mi Chechchemeni?

◻ Ren an tipemecheres ngeni an Seman we alapalapa manauan, ifa ussun Jises a wiliiti ewe Leenien Appiru ngenikich?

◻ Lon Israel lom, a wor met sokkun angangen alapalap?

◻ Ifa ussun Kot a akkalapalapa “ewe Israelin Kot” tori ikenai?

◻ Fan iten menni popun Kot a fen alapalapa ekkewe “pwal fitemon siip?

[Pwóór lón pekin taropwe 12]

An Kot Akkalapalapa Christendom

Iei alon eu poraus lon ewe Associated Press seni Athens, Greece, ussun ewe emon mi seikita ngeni meilapen ewe Greek Orthodox Church, nge kanoto chok: “Ita uruurun pwe atewe epwe emon chon esilefeili kinamwe. Nge a ussun ita pwe meilapen ewe Greek Orthodox Church emon meilapen sounfiu mi mmonleta fan iten maun.

“‘Ika pwe mi lamot, am mi mmonleta pwe aupwe nni manau me pennuku manauem. Am, lon am lamalam, aua iotek fan iten kinamwe . . . Nge am aua kan efeiochu ekkewe pisekin maun mi fel lupwen a wor lamotan,’ nge ina alon Archbishop Christodoulos lon ewe ran mi fel itan Assumption of the Virgin, nge ina pwal ewe ranin asamolu ekkewe sounfiun Greece.”

[Pwóór lón pekin taropwe 13]

“Esap Kapachelong Pwal Fitemon!”

Lon ewe sochungio fan iten ewe sukulen Gilead lon 1970, Frederick Franz, nge i vice-presidentin ewe Society lon ena atun, a ereni ekkewe chon sukul pwe ir, chon ewe mwichen pwal fitemon siip mi eani ewe apilukulukun manau won fonufan, repwe tongeni papataisi emon mi meefi pwe a kapchelong lein ekkewe lusun mi kepit. Epwe tongeni fis ena? Iwe, a awewei pwe Jon Papatais emon lein ekkewe pwal fitemon siip, me a papataisi Jises me ekkoch me lein ekkewe aposel. Iwe, a eis ika a chuen suuk ewe kokko fan iten an epwe ionfengen ekkewe lusun chon kepit. A apasa, “Aap, esap kapachelong pwal fitemon! Ena kokko a muchulo me lom lefilen 1931 me 1935! Esap kapachelong pwal fitemon. Iwe, ir met, ekkewe minefo mi pacherikich, nge ir mi aea ekkewe minen lios lon ewe Achechchem? Ika pwe ir chon ewe lusun mi kepit, ir siwilin ekkoch! Sap minne a kapachelong pwal fitemon lein ekkewe chon kepit, nge ir siwilin chokkewe mi fen tturulo.”

[Sasing lón pekin taropwe 9]

A ifa me watteen ach aucheani ach angangen afalafal!

[Sasing lón pekin taropwe 10]

Israel lom a wiliiti eu sepi mi fichiiti chok an epwe kataalo