Kesap Kkuf Ren Aurek

“OUTE aureki usun leesor, pun leesor epwe pwisin aureki. A naf ngeni eu ran an we ingau.” (Mattu 6:34) Ena fon seni Jises Kraist a alillisoch ngenikich meinisin mi manau lon ei fansoun mi atapwalapwal me aurek.

Iwe nge, mi tufich ach sisap aureki ach kewe osukosuk, filiach, wiisach, me ach kewe angang? Fite milion aramas ra letipechou, osukosuk me chouchou. Ina popun ekkewe business mi fori safei fan iten ei sokkun osukosuk ra pisekisekilo.

Ifa Ussun Sipwe Itepok me Ruuepek

A lamot ach sipwe akkota me ammonlata ngeni ach kewe angang, wiisach, filiach, me osukosukach​—inaamwo ika ra atapwalapwal are aapw. Ewe Paipel a peseikich ach sipwe “mottiu lom o ekieki usun liwinin” mwen sia poputani eu mettoch mi lapalap. (Luk 14:28-30) Ei mettoch a kapachelong ach ekiekifichi ussun ekkewe mettoch sipwe tongeni fori, ach atittina met epwe tongeni fis, me ekieki ussun liwinin ren ach fansoun, pochokkul me moni.

Inaamwo ika epwe och ach sipwe ekiekifichi met epwe tongeni fis, nge sise tufichin ekieki mettoch meinisin. Awewe chok, fan iten tumunun om famili, eli kopwe ekieki ussun met oupwe fori ika imwom a kar. Neman kopwe mooni me pacheta lon imwom ekkewe pisek mi esinna otuot are kunuuw ekkei. Neman oupwe akkota me praktis ifa ussun oupwe muttir towu seni ewe imw. Nge ineet mmonloch epwe wiliiti aurek mi lamot mwaal? Ena esin aurek epwe poputa ika kopwe ekkekieki ussun sokkopaten mettoch repwe tongeni fisita, nge chommong leir seni chok om anchang. Ekiekingau epwe tongeni akkufuk, me epwe alukuluku ngonuk pwe ka tumunugauei och mettoch are ese naf minne ka fori ren tumunun ewe famili. Ei sokkun weires ka pwisin efisata epwe kon chounuk pwe kesap tongeni onnut.

Moses Mwen Mesen Ferio

Jiowa Kot a ngeni noun we soufos Moses eu wiis mi weires. Akkom, Moses a wiisen uta mwen mesen ekkewe Chon Israel me ereniir pwe Jiowa a fen seikata i chon emmweniirewu seni Isip. Mwirin, Moses epwe uta mwen mesen Ferio me tingor pwe epwe angasalo ekkewe Chon Israel. Iwe saingoon, Moses epwe emmweni fite milion aramas ngeni ewe fonu poon tori ewe fonu mi masou ren aramas mi oputeer. (Ekistos 3:1-10) Ekkeei mettoch meinisin repwe ita aniuokkusu Moses, pwe an ekieki wiisan epwe efisi aurek watte lon letipan?

A ffat pwe Moses a osukosuk ren chommong mettoch. A eisini Jiowa: “Nge ika upwe churi ekewe aramasen Israel o urenir, ‘An ami kewe lewo we Kot a tinieito remi,’ nge ir repwe aisiniei, ‘Ifa itan?’ iwe, met upwe palueni ngeniir?” Jiowa a ngeni poluan. (Ekistos 3:13, 14) Moses a pwal pireir ussun met epwe fis ika Ferio esap luku i. Iwe, pwal eu, Jiowa a polueni ewe soufos. Eu saingoon an osukosuk​—Moses a apasa pwe i emon “esap sousile kapas.” Ifa ussun epwe pwak ei osukosuk? Jiowa a seikata Aaron pwe epwe fos fan iten Moses.​—Ekistos 4:1-5, 10-16.

Pokiten a fen polu an kewe kapas eis me an eani lukuluk won Kot, Moses a alleasochisi minne Jiowa a alluku ngeni. Moses ese aweiresi letipan ren poraus mi aniuokkus ika a chuuri Ferio nge, a “fori meinisin mine ewe Samol mi Lapalap a alluk ngeni.” (Ekistos 7:6) Ika a fen mut ngeni aurek an epwe akuffu i, ese mwaal ekkeei mettoch epwe fen apwangapwangalo ewe luku me pwora mi lamot ngeni an epwe apwonueta wiisan.

An Moses apwonuetaochu wiisan a pwarata ngenikich ussun met ewe aposel Paul a eita ngeni “mirit.” (2 Timoti 1:7; Taitos 2:2-6) Ika esor an Moses mirit, epwe fen mecheres ngeni an epwe meefi pwe wiisan a kon chou me eli esap mochen wiiseni.

Nemeni Om Ekiek

Met ka fori lupwen ka kuna sossotun om luku are osukosuk lon manauom? Ka kan umwesilo lupwen ka chok ekieki ussun ekkewe minen eppet me osukosuk epwe toruk? Are ka ekiek ren mirit ussun ekkeei mettoch? Ussun chok ekkoch repwe apasa, ‘Kesap pwerelong ren ewe piris tori ka tikeri.’ Eli esor popun kopwe pwerelong ren ena piris! Ina popun, met lamoten ach riaffou pokiten och mettoch eli esap fis? Ewe Paipel a apasa: “An eman aramas ourek lon lelukan a afisata lolilen.” (An Salomon Fos 12:25) Fan chommong, emon epwe etiwalo an epwe filata met epwe fori tori a kon mmang.

Mi watte ewe feiengau lon pekin ngun a pop seni an emon kuff ren aurek. Jises Kraist a apasa pwe ach aucheani “kapasen ewe mu” epwe tongeni pwoluelo ren otupuen pisek me “aurekin fonufan.” (Mattu 13:19, 22) Ussun chok folufol a tongeni pinei maarin me uwaochun eu foun, iwe, ach kuff ren aurek epwe tongeni pinei ach feffeita lon pekin ngun me ach uwaoch ngeni lingeloon Kot. Aurek mi chou emon a pwisin ekieki a fen pinei ekkoch seni ar fangelo manauer ngeni Jiowa. Ra ekieki, ‘Met ika use apwonueta ai pwon?’

Ewe aposel Paul a fen erenikich pwe lon ach maun lon pekin ngun, sia fen achocho le “fotekini sokkun ekiek meinisin pwe repwe alleasochisi Kraist.” (2 Korint 10:5) Ach chon oput, Setan ewe Tefil, epwe ita fokkun pwapwa an epwe aeamwaalli ach osukosuk pwe epwe aletipengauakich me apwangapwangakichelo lon pekin inis, memmeef, me ngun. A fokkun angoch le aea ach tipemwaramwar pwe epwe rauei ekkewe rese mammasa. Ina ewe popun Paul a pwal ouroura ekkewe Chon Kraist pwe resap “wasi leenien ewe tefil.” (Efisus 4:27) Ussun “ewe koten ei fonufan,” Setan a fen sopwoch le “achunalo letipen ekkewe chon lukulukumang.” (2 Korint 4:4) Amwo sisap mut ngeni an epwe nemeni ach ekiek!

Alillis mi Kawor

Lupwen emon semirit a osukosuk epwe tongeni chuuri seman mi tong me kutta emmwen me aurur. Pwal ussun we chok, sipwe tongeni feilo ngeni Semach lon lang, Jiowa, ren ach kewe osukosuk. Ren enletin, Jiowa a etiwakich ach sipwe likiti ngeni osach me ach aurek. (Kol Fel 55:22) Ussun chok emon semirit mi ngaselo seni an kewe osukosuk mwirin seman we a alukuluku, sisap chok iseta osach won Jiowa nge sipwe wesewesen likiti ngeni.​—Jemes 1:6.

Ifa ussun sipwe likiti ngeni Jiowa ach kewe aurek? Filipai 4:6, 7 a polueni: “Ousap aurek ren och mettoch, pwe ren mettoch meinisin oupwe chok esinei ngeni Kot ami mochen ren iotek o tingor o pwal eti kilisou. Iwe, an Kot we kinamwe, ewe mi somelo seni ach ekiek meinisin, epwe mamasa letipemi o ami ekiek lon Kraist Jises.” Ewer, ren an polueni ach kewe iotek me ach kewe tingor, Jiowa epwe tongeni akinamwekichelo pwe epwe tumunu ach ekiek seni aurek ese kon lamot.​—Jeremaia 17:7, 8; Mattu 6:25-34.

Iwe nge, ren ach atipeeufengenni manauach ren ach kewe iotek, sisap imulo seni aramas are ukutiu le pwaralo meefiach ngeniir. (An Salomon Fos 18:1) Nge, epwe och ach sipwe ekieki ussun ekkewe fon me emmwen seni ewe Paipel mi weneiti ach osukosuk, iwe, iei ussun sipwe tumunukich seni ach lukuluku pwisin ach sile. (An Salomon Fos 3:5, 6) Ekkewe kukkun me chinnap repwe tongeni kutta poraus mi murinno ussun seni ewe Paipel lon ekkewe puk forien ewe Watch Tower mi weneiti ifa ussun repwe filata och mettoch me pwakini ekkewe osukosuk. Pwal och, lon ewe mwichefelin Chon Kraist, sia feioch ren ekkewe elter mi mirit me lipwakoch me pwal ekkoch Chon Kraist mi asimau mi achocho le alisikich. (An Salomon Fos 11:14; 15:22) Fan chommong ekkewe mi asimau lon pekin ngun nge ir rese pachelong lon ach osukosuk repwe tongeni alisikich le nengenisefalli ach osukosuk, nge lon pwal och sokkun ekiek. Me inaamwo ika resap erenikich met sipwe fori, nge repwe tongeni awora kapasen pesepes me alillis ngenikich.

“Witiwit won Kot”

Meinisin repwe tipeeu pwe a naf ach weiresin pwakini osukosukach iteiten ran nge sisap pwal apachalong ach aureki ekkewe osukosuk sia anchangei chok. Ika sia pireir me weires ussun ach aureki mettoch sia ekieki pwe epwe fis, iwe sipwe fos ngeni Jiowa ren iotek me tingor. Kutta emmwen, tipatchem, me mirit seni an we Kapas me an we mwicheich. Sipwe kuna pwe ese lifilifil met epwe piita, alillis mi kawor ren ach sipwe pwakini.

Ren letipechou me weires, ewe soumak kol a kokkol: “Nguni, pwata ka letipengau, o pwata ka chok mokutukutfetal lon inisi? Kopwe apilukuluku Kot; pun upwe pwal liwiniti mwareiti i, ai alilis o ai Kot.” (Kol Fel 42:11) Amwo epwe pwal ina ussun meefiach.

Ewer, ammonlata ngeni met ka mirititi epwe fis, me likiti ngeni Jiowa ekkewe mettoch kese silei ussun. “Oupwe iseta won i mettoch meinisin, minne oua aurek ren, pun a fen tongeikemi.”​—1 Piter 5:7.

[Sasing lón pekin taropwe 20]

Ka Ussun Tafit, le likiti osom kewe me om aurek ngeni Jiowa?