“Emon Mi Alleani Epwe Miritiiti Weween”
“Lupwen kopwe kuna ewe mettoch mi aniuoput mi efisata kiteter . . . ukkuta lon ewe leeni mi pin, . . . iwe, ekkewe mi nonnom Jutia repwele suta won chukuchukuta.”—MATEUS 24:15, 16, New World Translation.
1. Met mwiriloon an Jises ourour lon Luk 19:43, 44?
ACH sissilei ussun eu fitikoko watte mwen a fisita epwe tongeni alisikich le su seni. (An Salomon Fos 22:3) Iwe, kopwe mwo ekieki ussun ekkewe Chon Kraist lon Jerusalem mwirin Rom a maunei ewe telinimw lon 66 C.E. Jises a fen ouroureer pwe sounfiu repwe pwelli ewe telinimw me ataielo. (Luk 19:43, 44) Lape ngeni ekkewe Chon Jus ra tunalo an Jises we ourour. Nge noun kewe chon kaeo ra auseling ngeni. Mwiriloon ar auseling, ra manau seni ewe kiteter lon 70 C.E.
2, 3. Met popun sia mochen weweiti an Jises oesini lon Mattu 24:15-21?
2 Lon eu oesini mei wor weween fan itach ikenai, Jises a awewe won eu esissin mi kapachelong lon porausen maun, lengita, chechchechin fonu, ma lapalap, me riaffoun ekkewe Chon Kraist mi esilefeili porausen Muun Kot. (Mattu 24:4-14; Luk 21:10-19) Jises a pwal awewe won eu poraus epwe alisiir le silei ineet ewe sopwoloon a arapoto—eu ‘mettoch mi aniuoput mi efisata kiteter mi ukkuta lon eu leeni mi pin,’ (Mattu 24:15) Sipwe atittinasefalli ekkena kapas mi lamot ren ach sipwe silei ifa ussun repwe tongeni kku manauach iei me lon mwach kkan.
3 Mwirin an awewei ewe esissin, Jises a apasa: “Are oupwe kuna ewe limengauen kiteter mi uta lon ewe leeni mi fel, usun ewe soufos Taniel a apasa (emon mi alleani epwe wewe ren); iwe, ekkewe mi nonnom Jutia repwe suta won chukuchukuta, nge are emon a nom won sesarin won, esap totiu pwe epwe angei och mettoch seni imwan. Are emon a pwal nom le malamal, esap liwinsefal pwe epwe angei ufan. Nge riaffou ngeni ekkewe mi pwopwo, pwal ngeni ekkewe mi aoupu monukol lon ekkewe ran. Nge oupwe iotek pwe esap fis ami susufeil lupwen affou are lon ami ranin fel. Pun lon ewe fansoun epwe fis riaffou lapalap, usun chok esaamo fis seni le poputan fonufan tori ikenai, o esap pwal usun chok mwirin.”—Mattu 24:15-21.
4. Pwata sia silei pwe Mattu 24:15 a fen pwonuta lon ewe aewin senturi?
4 Makkeien Mark me Luk ra apachalong pwal ekkoch poraus. Mattu a makkei “uta lon eu leeni mi fel,” nge Mark 13:14 a apasa “ikewe ese fich ngeni.” Luk 21:20 a pwal mak an Jises kewe kapas: “Are oupwe kuna ekkewe mwichen sounfiu ra pwellifeili Jerusalem, iwe, oupwe sinei pwe an we tatakkis a arapoto.” Ei poraus a alisata ach weweiti ewe aewin pwonuetaan ei oesini ren an Chon Rom maunei Jerusalem me ewe imwen fel—eu leeni mi pin ngeni Chon Jus nge ese chuen eu leeni mi pin me ren Jiowa—ewe a poputa lon 66 C.E. Kiteter unus a fis lupwen Chon Rom ra ataielo ewe telinimw me ewe imwen fel lon 70 C.E. Ifa ewe “mettoch mi aniuoput” lon ena fansoun? Me ifa weween an a ‘uta lon eu leeni mi fel’? Ach polueni ekkeei kapas eis epwe alisata ach weweochu pwonuetaan ewe oesini lon ei fansoun.
5, 6. (a) Met popun epwe lamot mirit ren aramas mi alleani Taniel sopwun 9? (b) Ifa ussun a pwonueta an Jises oesini ussun “ewe mettoch mi aniuoput”?
5 Jises a pesei ekkewe chon allea le alleani ren mirit. Met ra alleani? Ese mwaal Taniel sopwun 9. Lon ena sopwun sia kuna eu oesini mi awewe won ewe fansoun Messaia epwe pwalo me a pwal oesini pwe epwe ‘nninniilo’ mwirin ulungat esopw ier. Iei alon ewe oesini: “Ewe mi afisata tatakis epwe anomu eu mettoch mi fokun anioput lon ewe Leni mi Fokun Tekia lon ewe Imwenfel, tori Kot epwe atolonga atewe lon ewe feiengau a fen apwungala won.”—Taniel 9:26, 27; nengeni pwal Taniel 11:31; 12:11.
6 Ekiekin Chon Jus pwe ei oesini a weneiti an Antiochus IV alimengauolo ewe imwen fel orun 200 ier me mwan. Iwe nge, Jises a affata pwe ese pwung ena ekiek lupwen a peseer le alleani ren mirit pokiten “ewe mettoch mi aniuoput” epwe chuen pwalo me uta lon “eu leeni mi fel.” A ffat pwe Jises a awewe won warotoon ekkewe sounfiuen Rom lon 66 C.E. ren ar kewe esissin mi ussun filaik. Ra fen aea ekkeei esissin seni me loom me ra ussun uluulun me aniuoput ngeni Chon Jus.a Ineet atun repwe ‘uta lon ewe leeni mi fel’? A fis ena lupwen ekkewe sounfiuen Rom, ra uwei ar kewe esissin, ra maunei Jerusalem me ewe imwen fel, eu leeni mi pin ngeni ekkewe Chon Jus. Ekkewe Chon Rom ra pwal mwo nge ttu pwang fan ttitin leenien ewe imwen fel ren ar repwe ataielo ewe ttit. Pwungun pwe met a fen aniuoput ren fansoun langattam a nom iei lon eu leeni mi fel!—Aisea 52:1; Mattu 4:5; 27:53; Fofor 6:13.
Eu “Mettoch Mi Aniuoput” lon Ei Fansoun
7. Menni lein an Jises kewe oesini a pwonueta lon ei fansoun?
7 Seni ewe Aewin Maunen Fonufan, sia fen kuna pwonuetaan an Jises esissin lon Mattu sopwun 24, nge a watte seni pwonuetaan me loom. Nge, chechchemeni mwo an kewe kapas: “Lupwen oupwe kuna ewe mettoch mi aniuoput mi efisata kiteter . . . ukkuta lon ewe leeni mi pin . . . ekkewe mi nonnom lon Jutia repwe ssuta won ekkewe chukuchukuta.” (Mattu 24:15, 16, NW) Epwe ita wor pwonutaan ei kinikinin ewe oesini lon ach ei fansoun.
8. Seni loom, ifa ussun Chon Pwarata Jiowa ra esinna “ewe mettoch mi aniuoput” lon ei fansoun?
8 Minne a mak lon ewe January 1, 1921 Watchtower, a pwarata ewe lukuluk a nom ren noun Jiowa kewe chon angang pwe ei oesini epwe pwonueta. A menlapei minne a fis lon ewe Middle East me a riri ngeni ewe oesini. Mwirin, lon ewe minen December 15, 1929, lon pekin taropwe 374, The Watchtower a affata: “Ewe League of Nations a kan okkulu ekiekin aramas seni Kot me Kraist, ina ewe popun a efisata kiteter, forien Setan, me eu mettoch mi aniuoput me ren Kot.” Iwe, lon 1919, “ewe mettoch mi aniuoput” a pwalo. Lo, lo, ewe United Nations a siwili ewe League. Seni me loom Chon Pwarata Jiowa ra fen apasa pwe an aramas kewe mwicheich fan iten fisitaan kinamwe a aniuoput ngeni Kot.
9, 10. Ifa ussun eu luku loom a etipetipa ach ekiek ussun “ewe mettoch mi aniuoput” mi uta lon eu leeni mi pin?
9 Ewe lesen mwen ei a enniwili eu ekiek mi ffatelo ussun Mattu sopwun 24 me 25. Epwe pwal lamot ffateloon ewe poraus ussun ‘ewe mettoch mi aniuoput mi ukkuta lon ewe leeni mi pin’? Wuu. An Jises oesini a ririfengenni ewe “uta lon ewe leeni mi fel” ren poputaan ewe “riaffou mi lapalap.” Iwe, inaamwo ika “ewe mettoch mi aniuoput” a nonnom seni me loom, ewe riri lefilen an “uta lon ewe leeni mi fel” me ewe riaffou mi lapalap epwe ita kku ach ekieki mettoch. Ifa ussun?
10 Noun Kot kewe aramas ra ekieki me loom pwe ewe aewin kinikinin ewe riaffou mi lapalap a fen poputa lon 1914 me ewe saingoon kinikin epwe fis lon ewe maunen Armaketon. (Pwarata 16:14, 16; alollo ngeni The Watchtower, April 1, 1939, pekin taropwe 110.) Ina popun sia tongeni weweiti ewe popun ach luku me loom pwe ewe “mettoch mi aniuoput” a fen ita ukkuta lon eu leeni mi pin muttir chok mwirin ewe Aewin Maunen Fonufan.
11, 12. Lon 1969, ifa ussun a siwil ach ekiek ussun ewe riaffou mi lapalap?
11 Iwe nge, lon ekkewe ier a lo, sia fen siwili ach ekiek. Lon Aruaanu, July 10, 1969, lon ewe “Peace on Earth” International Assembly lon New York City, F. W. Franz, lon ena atun ewe vice presidentin ewe Watch Tower Bible and Tract Society, a fen eani eu afalafal mi murinno. Ren an enniwili ach ekiek loom ussun ena oesini, Brother Franz a apasa: “A fis loom ei awewe pwe ewe ‘riaffou mi lapalap’ a fen poputa lon 1914 C.E. me esap tori le muchuloon lon ena atun pokiten Kot a awesalo ewe Aewin Maunen Fonufan lon November, 1918. Seni ena fansoun, Kot a mut ngeni och fansoun fan iten angangen lusun ekkewe chon kepit mwen epwe mut ngeni ewe saingoon kinikinin ewe ‘riaffou mi lapalap’ le poputa lon ewe maunen Armaketon.”
12 Mwirin ena, a kawor eu minefoon awewe: “Ika epwe ekis wewe ngeni minne a fis lon ewe aewin senturi . . . ewe oruuen pwonutaan ewe ‘riaffou mi lapalap’ ese tongeni poputa lon 1914 C.E. Iwe, met a tori minne Jerusalem a liosueta, seni 1914 ngeni 1918, a wewe ngeni eu ‘poputaan riaffou’ . . . Ewe ‘riaffou mi lapalap’ esap fis sefal, esaamwo poputa pun a wewe ngeni taloon ekkewe lamalam chofona meinisin won unusen fonufan (kapachelong Kirisentom) me mwirin epwe fis ewe maunen Armaketon.” Weween pwe unusen ewe riaffou mi lapalap epwe chuen feito.
13. Pwata sia luku pwe “ewe mettoch mi aniuoput” epwe “ukkuta lon eu leeni mi pin” lon mwach kkan?
13 Ei poraus a weneiti ach miritiiti ineet “ewe mettoch mi aniuoput” a uta lon ewe leeni mi pin. Chechchemeni mwo met a fis lon ewe aewin senturi. Ekkewe Chon Rom ra maunei Jerusalem lon 66 C.E., nge ra muttir wes le maun me ar liwinlo a atufichi amanauen ekkewe Chon Kraist. (Mattu 24:22) Me ren ena poraus, sia eani ekiek pwe ewe riaffou mi lapalap epwe poputa lon ekis chok fansoun, nge epwe mwochomwochelo pokiten noun Kot kewe mi kefilita. Ekieki ussun ei poraus mi lamot: Ren met a fis akkom, ‘ewe mettoch mi aniuoput mi ukkuta lon ewe leeni mi pin’ a riri ngeni an Rom maunei Jerusalem fan ewe meilap itan Gallus lon 66 C.E. Met ena maun a liosueta lon ei fansoun—poputaan ewe riaffou mi lapalap—esaamwo poputa. Iwe, “ewe mettoch mi aniuoput mi efisata kiteter,” ewe a nonnom seni 1919, esaamwo uta lon ewe leeni mi pin.b Ifa ussun epwe fisita? Me ifa ussun epwe kku manauach?
Eu Maun Epwe Fis lon Mwach Kkan
14, 15. Ifa ussun Pwarata sopwun 17 a alisikich le weweiti met epwe fisita mwen Armaketon?
14 Ewe puken Pwarata a awewe won ewe maun epwe fis won lamalam chofona. Sopwun 17 a awewei an Kot kapwung won “Papilon mi lapalap, inen fin lisou”—ewe nemenemen lamalam chofona won unusen fonufan. Kirisentom eu kinikin mi lamot lon, me alon we, mei wor eu pwon lefiler me Kot. (Alollo ngeni Jeremaia 7:4.) Ren fansoun langattam, ekkewe lamalam chofona, kapachelong Kirisentom, ra fen chiechi ngeni “ekkewe kingen fonufan,” nge ei chiechi epwe wes ren kiteterin ekkena lamalam. (Pwarata 17:2, 5) Io epwe ataielo Papilon mi Lapalap?
15 Ewe puken Pwarata a awewe won “emon manmocho mi parapar” a nonnom ren och fansoun, morelo, me mwirin a liwinsefal. (Pwarata 17:3, 8) Ekkewe sou nemenemen fonufan ra alisi ei manmwocho. Ewe poraus lon ewe oesini a alisata ach esinna ewe manmwocho. A wewe ngeni eu mwicheich fan iten fisitaan kinamwe won fonufan a poputa lon 1919 ussun ewe League of Nations (eu “mettoch mi aniuoput”) nge iei a iteni ewe United Nations. Pwarata 17:16, 17 a affata pwe Kot epwe chuen minalong lon letipen ekkoch sou nemenem mei wor wiiser mi lamot lon ei “manmocho” ewe ekiek pwe repwe ataielo lamalam chofona won unusen fonufan. Ei maun won ekkewe lamalam chofona a wewe ngeni poputaan ewe riaffou mi lapalap.
16. Met sokkun mettoch mi weneiti lamalam a fiffis?
16 Pokiten ewe riaffou mi lapalap esaamwo poputa, ewe “ukkuta lon ewe leeni mi pin” esaamwo pwal poputa? Wuu. Ewe “mettoch mi aniuoput” a fen pwalo me le poputaan ei senturi me a fen nonnom fite ier, epwe kutta leenian “lon eu leeni mi pin” lon mwach kkan. Ussun chok noun Jises kewe chon kaeo lon ewe aewin senturi ra kutta ifa ussun epwe fis ewe “ukkuta lon ewe leeni mi pin,” a pwal ina ussun ekkewe Chon Kraist ikenai. Pwungun pwe sipwe chuen witiwit tori ewe oesini a pwonueta ren ach sipwe unusen weweiti ifa ussun an epwe fisita. Iwe nge, mei lamot pwe lon ekkoch fonu a fen pwalo koputen lamalam. Ekkoch muu, fengen me Chon Kraist mi fen rikilo seni fel mi enlet, ra efisata oput ngeni lamalam meinisin nge ewe oput a watte ngeni ewe lamalamen Kraist mi enlet. (Kol Fel 94:20, 21; 1 Timoti 6:20, 21) Pwal mwo nge iei, ekkewe muu ra “maun ngeni ewe Lam,” me ussun a mak lon Pwarata 17:14 ei maun epwe lapelo. Resap tongeni wesewesen turufi ewe Lamen Kot—Jises Kraist mi lingelo me tekia—repwe tongeni u ngeni noun Kot kewe chon fel mi enlet, lape ngeni “ekkewe mi fel.” (Taniel 7:25; alollo ngeni Rom 8:27; Kolose 1:2; Pwarata 12:17.) Ewe pwon seni lang a ffat pwe ewe Lam me chokkewe mi nonnom ren repwe win.—Pwarata 19:11-21.
17. Neman, epwe ifa ussun “ewe mettoch mi aniuoput” epwe uta lon ewe leeni mi pin?
17 Sia silei ussun ewe kiteter epwe tori lamalam chofona. Papilon mi Lapalap a “torongki ren chaan ekkewe aramas mi fel” me a nikinikin finesamol, nge taloon we epwe fokkun fisita. An we etipetip mi ngau won ekkewe kingen fonufan epwe siwil atun ar chiechioch a wiliiti koput mi mwanesol seni ekkewe ‘engol mechan me ewe manmocho.’ (Pwarata 17:6, 16; 18:7, 8) Lupwen ewe “manmocho mi parapar” a maunei ewe fin lisowu mi liosueta lamalam chofona, “ewe mettoch mi aniuoput” epwe ukkuta lon an Kirisentom leeni mi pin nge epwe nom ie ren och popun mi efeiengau.c Iwe, ewe kiteter epwe poputa won Kirisentom mi lukulukummang, ewe a pwomweni chok pwe a fel.
“Su Seni”—Ifa Ussun?
18, 19. Ikkefa ekkewe popun pwe an emon “suta won chukuchukuta” esap wewe ngeni an siwili lamalam?
18 Mwirin an oesini ussun ‘ewe mettoch mi aniuoput mi ukkuta lon ewe leeni mi pin,’ Jises a ouroura ekkewe aramas mi mirit pwe repwe wiisen mwokut. Weween pwe lon ena fansoun—atun “ewe mettoch mi aniuoput” a “ukkuta lon ewe leeni mi pin”—chommong aramas repwe ssu seni lamalam chofona me kutta ewe lamalam mi enlet? Aapw. Ekieki mwo ewe aewin fansoun ei oesini a pwonueta. Jises a apasa: “Ekkewe mi nonnom Jutia repwe suta won chukuchukuta. O are emon a nom won sesarin won, esap totiu, are tolong lon imwan, pwe epwe angei och seni. Are emon a pwal nom le malamal, esap liwinsefal pwe epwe angei ufan. Nge riaffou ngeni ekkewe fefin mi pwopwo, pwal ekkewe mi oupu monukol, lon ekkewe ran. Nge oupwe chok iotek pwe esap fis lon fansoun affou.”—Mark 13:14-18.
19 Jises ese fen apasa pwe chokkewe lon Jerusalem repwe towu seni, ussun ita repwe su seni iolapen an Chon Jus lamalam. An kapasen ourour ese pwal wewe ngeni ar siwili lamalam—su seni eu lamalam chofona me fiti eu mi enlet. Eu ourour pwe repwe ssu seni eu lamalam esap wor lamotan ngeni noun Jises kewe chon kaeo; ra fen wiliiti Chon Kraist mi enlet. Ewe maun lon 66 C.E. ese fen amwokutu ekkewe mi fiti ewe lamalamen Jus ar repwe tunalo ena lamalam me etiwa ewe lamalamen Kraist. Sense Heinrich Graetz a apasa pwe chokkewe mi cheei ekkewe Chon Rom ra liwiniiti ewe telinimw: “Ekkewe Zealot ra puppuchorewu ar kolun maun, ra liwinlo Jerusalem (October 8), letiper a ur ren apilukulukun eu ngaselo seni nemenemen Rom. . . . Esap pwe Kot a umoumoch le alisiir ussun an a alisi ar kewe lewo? Esor niuokkus ussun mwach kkan lon letipen ekkewe Zealot.”
20. Ifa ussun ekkewe chon kaeo loom ra mwokut ren an Jises kapasen ourour?
20 Ifa ussun ewe mwichen aramas mi kefil ra mwokutukut me ren an Jises fon? Ra ssu seni Jutia me suta ngeni ekkewe chukuchukuta le pekin ewe Jorotan. Iei ussun ra pwarata pwe esap ir kinikinin an Chon Jus otot, lon pekin muu are lamalam. Ra likitalo fonuer me imwer, rese fen ioni ekkewe pisek lon. Ra eani lukuluk won an Jiowa tumun me alillis, me ar fel ngeni a akkom mwen meinisin ekkewe mettoch mi lamot lon manauer.—Mark 10:29, 30; Luk 9:57-62.
21. Met sisap ekiekin kuna lupwen “ewe mettoch mi aniuoput” a mwokutukut?
21 Ekieki mwo iei pwonutaan ewe oesini mi lamot seni ewe a fis me loom. Ren fite ier sia fen pesei aramas le ssu seni lamalam chofona me fiti fel mi enlet. (Pwarata 18:4, 5) Fite milion ra fen fori ena. An Jises oesini ese affata pwe atun a poputa ewe riaffou mi lapalap, chommong aramas repwe kul ngeni fel mi limoch; pwungun pwe esor eu mwichen Chon Jus watte mi wiliiti Chon Kraist lon 66 C.E. Iwe nge, epwe nom ren Chon Kraist mi enlet eu minen amwokut mi pochokkul le apwonueta alon an Jises kapasen ourour me ssu.
22. Met epwe tongeni kapachelong lon ach fori alon an Jises fon le suta won chukuchukuta?
22 Sise tongeni unusen weweiti porausen ewe riaffou mi lapalap iei, nge sipwe tongeni weweiti pwe lupwen Jises a fos ussun ssu, esap wewe ngeni ach feilo ngeni pwal eu leeni. Noun Kot kewe aramas ra nom won unusen fonufan. Sia tongeni silei pwe, atun a lamot ach ssu, Chon Kraist repwe sopweilo le pwarata pwe ir mi sokko seni ekkewe mwicheichen lamalam chofona. Me pwal lamot an Jises ourour pwe aramas resap liwinlo imwer ren ar repwe kutta ufer are pisekir. (Mattu 24:17, 18) Neman epwe wor sossot lon mwach kkan ren ukuukun ach aucheani pisek; ina ewe mettoch mi lamot ngenikich, are ewe amanau lon mwach kkan fan iten meinisin mi pekini pekin Kot? Ewer, ach ssu mi tongeni weneiti riaffou me nafangauen mettoch. Ita sipwe mmonleta le fori minne mi lamot, ussun chok pwiich kewe loom lupwen ra ssu seni Jutia ngeni Perea, le pekin ewe Jorotan.
23, 24. (a) Ia chok sipwe kuna tumun? (b) Ita ifa ussun an Jises kapasen ourour ussun ‘ewe mettoch mi aniuoput me ukkuta lon eu leeni mi pin’ epwe kku manauach?
23 Sipwe apposa letipach le eani lukukuk won Jiowa ussun ach leenien op me lon an we mwicheich mi ussun eu Chuuk. (2 Samuel 22:2, 3; Kol Fel 18:2; Taniel 2:35, 44) Ina ewe leeni ia sipwe kuna tumun ie! Sisap appiru aramas mi sulong lon “ekkewe pokungo” me opelo “fan ekkewe achau fan chuk”—an aramas kewe mwicheich mi chuen nonnom ren fansoun mwochomwoch mwirin kiteterin Papilon mi Lapalap. (Pwarata 6:15; 18:9-11) Pwungun pwe, manau epwe tongeni weiresilo—ussun chok an a fis lon 66 C.E. fan iten ekkewe fefin mi pwopwo ra ssu seni Jutia are fan iten emon mi sai lon ewe affou atun a pungutiu ran. Nge sipwe tongeni lukulukoch pwe Jiowa epwe atufichi manauach. Amwo iei sipwe apochokkula ach lukuluk won Jiowa me Noun we, ewe a nemenem ussun Kingen Muun Kot.
24 Esor och popun pwe sipwe chechchech ren niuokkus pokiten met epwe fis. Jises ese mochen pwe noun kewe chon kaeo loom repwe niuokkus, me ese pwal mochen pwe kich sipwe niuokkus, iei are lon ekkewe ran mi feffeito. A aporausakich porausen mwach pwe sipwe tufichin ammonlata letipach me ekiekich. Iwe, esap ekkewe Chon Kraist mi alleasochisoch repwe kuna kapwung lupwen a tori fansoun taloon lamalam chofona me ekkewe mettoch lon ei otot mi ngau. Mi lamot ar mirit me ar auselinga ewe kapasen ourour ussun ewe ‘mettoch mi aniuoput mi ukkuta lon eu leeni mi pin.’ Repwe wiisen mwokut won longolongun ar luku mi lukuchar. Amwo sisap monuki minne Jises a pwonei: “Are emon epwe likiitu tori sopolon, iwe, epwe manau.”—Mark 13:13.
[Footnote]
a “Ra mammasa an Rom kewe filaik lon ekkewe imwen fel lon Rom ussun chok pisekin lamalam; ren ukuukun ar epinalo ekkewe filaik a wewe chok me ukuukun ar lukuluk won tekian Rom seni ekkewe ekkoch muu . . . Ngeni ekkewe sounfiu, ewe filaik a wewe ngeni ewe mettoch mi pin seni meinisin won fonufan. Sounfiuen Rom repwe akkapwon won ar we filaik.”—The Encyclopædia Britannica, 11in Edition.
b Chechchemeni mwo pwe inaamwo ika pwonutaan an Jises kewe kapas lon 66-70 C.E. epwe tongeni alisata ach weweiti ifa ussun an kewe kapas repwe pwonuta atun ewe riaffou mi lapalap nge, ekkewe ruu pwonutaan ewe oesini resap unusen wewefengen pun mi sokkolo ekkewe fansoun me met a fiffis atun ar ra pwonueta.
c Nengeni The Watchtower, December 15, 1975, pekin taropwe 741-4.
En Mi Chechchemeni?
◻ Ifa ussun a pwalo “ewe mettoch mi aniuoput mi efisata kiteter” lon ewe aewin senturi?
◻ Pwata sia ekieki pwe “ewe mettoch mi aniuoput” iei epwe uta lon eu leeni mi pin lon mwach kkan?
◻ Ewe puken Pwarata a oesini ussun menni maun ewe “mettoch mi aniuoput” epwe poputa?
◻ Neman lon mwach kkan epwe chuen lamot ach “suta,” nge ifa ussun?
[Sasing lón pekin taropwe 22]
Papilon mi Lapalap a eita ngeni “inen ekkewe fin lisouw”
[Sasing lón pekin taropwe 24]
Eu manmwocho mi parapar epwe emmweni ewe maun ngeni lamalam chofona