“A War Ewe Fansoun!”
“A tori an we fansoun pwe epwe feilo seni ei fonufan ngeni ewe Sam.”—JON 13:1.
1. Atun a arapoto ewe Pasofer 33 C.E., ifa ewe mettoch ekkewe aramas lon Jerusalem ra kapas chommong ussun, iwe, pwata?
ATUN AN a papatais lon 29 C.E., Jises a poputa le feffetal won ewe al epwe emmwen ngeni an “fansoun” malo, manausefal, me lingelo. Iei, a tori ewe fansoun meseres 33 C.E. Fitu chok wiik ra lo seni fansoun ewe mwichen soukapwung mi lap an chon Jus, ewe Sanhedrin, ra mwichfengen fan iten ar repwe nielo Jises. Pokiten Jises a silei met ra ekiekin fori, eni me ren Nikitimos, emon chienan, chon ewe Sanhedrin, Jises a su seni Jerusalem, iwe, a tori ewe malamal le pekin ewe chanpupu Jortan. Pokiten a arapoto ewe Fetellapen Pasofer, chommong aramas ra sai ngeni Jerusalem, iwe, chon ewe telinimw ra kapas chommong ussun met Jises epwe fori. Ekkewe aramas ra eisfengennir: “Ifa ussun ekiekimi? Atewe esap feito ngeni ach ei fetellap?” Ekkewe samol-fel mi lap me ekkewe Farisi ra fori pwe ekkewe aramas repwe mwasangasangelo ren ar alluku pwe ika emon epwe kuna Jises, epwe esilei ngenir ia a nonnom ia.—Jon 11:47-57.
2. Menni fofforun Meri a efisata osukosuk, me ifa ussun poluen Jises a pwarata an silei ussun “an fansoun”?
2 Lon Nisan 8, wonu ran me mwen ewe Pasofer, Jises a liwiniiti ekkewe leeni arap ngeni Jerusalem. A tori Petani—wesetan sopun chienan kewe mi achengicheng Marta, Meri, me Lasares—ruu mail seni Jerusalem. Iei, a tori lekuniolun Animu, iwe, Jises a nonnom ikkewe ie fan iten ewe Ranin Fel. Lekuniolun ewe ran mwirin, lupwen Meri a epiti ngeni Jises ren ewe nard mi pwokkus, ekkewe chon kaeo rese tipeeu ngeni. Jises a apasa: “Oupwe mut ngeni neminan pwe epwe iseis tori ranin ai peias, pun chon woungau repwe nomofochofoch remi, nge ngang usap nomofochofoch remi.” (Jon 12:1-8; Mattu 26:6-13) Jises a silei pwe ‘a tori an we fansoun pwe epwe feilo seni ei fonufan ngeni ewe Sam.’ (Jon 13:1) Mwirin nimu ran, epwe “fangelo pwisin manauan pwe ussun chok penmanauen aramas chommong.” (Mark 10:45) Seni ena fansoun, an meefi atapwalapwal a nemeni mettoch meinisin minne a fori me aiti ngeni aramas. Met ren ewe leenien appiru mi murinno a awora ngenikich atun sipwe witiwiti muchuloon ei ototen mettoch! Nengeni mwo met a fis ngeni Jises lon ewe chok ran mwirin.
Ranin an Jises Tolong lon Jerusalem
3. (a) Ifa lapalapen an Jises tolong lon Jerusalem lon Ranin Fel, Nisan 9, iwe, met lap ngeni ekkewe aramas meinisin ra fori? (b) Ifa poluen Jises ngeni ekkewe Farisi mi mongungu ussun ewe pwin aramas?
3 Lon Ranin Fel, Nisan 9, Jises a tori Jerusalem. Atun a kkan ngeni ewe telinimw—ren pwonuetaan Sekaraia 9:9, a wawa emon ass—lap ngeni ekkewe aramas meinisin ra eneni ar kkewe mangaku won ewe al, iwe, pwal ekkoch ra poku palen ira me eneni ngeni ewe al. Iwe, ra pupuchor, “Mi feioch ewe king mi feito fan iten ewe Samol!” Ekkoch Farisi me lein ewe mwichen aramas ra mochen Jises epwe fonou noun kkewe chon kaeo. Iwe nge, Jises a polueni: “Upwe apasa ngenikemi, pwe are ekkeei aramas repwe fanafanelo, iwe, ekkewe fau repwe chok koko.”—Luk 19:38-40; Mattu 21:6-9.
4. Pwata ekkewe chon Jerusalem ra kapas chommong atun Jises a tolong lon ewe telinimw?
4 Fitu chok wiik me mwan, chommong lein ekkewe aramas ra fen kuna an Jises amanauasefalli Lasares. Iei, ra aporausa ekkewe ekkoch ussun ena manaman. Ina minne, atun Jises a tolong lon Jerusalem, chon ewe telinimw ra kapasfengennir. Iwe, ra eis: “Menni atei?” Ekkewe aramas ra apasa: “Atei ewe soufos Jises seni Nasaretin Kalili!” Ren ar kuna met a fiffis, ekkewe Farisi ra apasa: “Chon fonufan ra chok feilo mwirin atewe.”—Mattu 21:10, 11; Jon 12:17-19.
5. Met a fis lupwen Jises a tolong lon ewe imwen fel?
5 Ussun eorenian lupwen a tori Jerusalem, Jises, ewe Sense mi Lapalap, a tolong lon ewe imwen fel pwe epwe afalafal. Ekkewe mi mesechun me pechema ra feilo ren ikkewe ie, iwe, a apochokkulerata. Lupwen ekkewe samol-fel lapalap me ekkewe soumak ra kuna ekkewe manaman a fori me rongorong pupuchorun ekkewe at me lon ewe imwenfel, “Osana ngeni Noun Tafil!” ra lingeringer. Ra apasa: “Kose mwo rong minne ra apasa?” Jises a polueni: “Ewer, nge ouse mwo alleani pwe ‘Seni auen semirit me monukol ka aunusaochu kapasen mwareiti’?” Iwe, atun Jises a sopweilo an afalafala aramas, a nengenifichi minne a fis lon ewe imwen fel.—Mattu 21:15, 16; Mark 11:11.
6. Ifa ussun fofforun Jises kkewe a sokkoseni lom, iwe, pwata?
6 Ifa me watten sokkofesennin an Jises kewe foffor iei seni an kkewe foffor wonu maram me mwan! Me lom, a tori Jerusalem fan iten Fetellapen ewe Imwen Fel, nge “ese pwapwalo, pwe le monomon chok.” (Jon 7:10) Iwe, a pwal pin tuttumunu pwe epwe su seni aramas mi kutta manauan. Nge iei, a chok pwapwalo an tolong lon ewe telinimw, ikkewe a fen katou ewe alluk ie pwe epwe ares! Esap pwal eorenien Jises me lom pwe epwe pwarata pwe i ewe Messaia. (Aisea 42:2; Mark 1:40-44) Ese mochen pwe aramas repwe kapas chommong are kapas mwaken ussun i. Iwe iei, ekkewe aramas ra pupuchoruta pwe i ewe King me Chon Amanau—ewe Messaia—iwe, a chok tunalo alon ekkewe nouwisen lamalam pwe epwe erenir ar repwe fanafanelo! Pwata a fis ewe siwil? Popun, pun “a tori ewe fansoun pwe ewe Noun-Aramas epwe kuna lingan,” ussun Jises a apasa lon ewe chok ran mwirin.—Jon 12:23.
Foffor mi Pwora—Mwirin, Ekkewe Afalafal mi Amanaua Aramas
7, 8. Ifa ussun fofforun Jises lon Nisan 10, 33 C. E., a ussun chok minne a fori lon ewe imwen fel lon Pasofer 30 C.E.?
7 Lupwen a wareiti ewe imwen fel lon Sarinfel, Jises a mwokutukut won minne a kuna leonowasen ewe ran me mwan. A poputa “le asurelo ekkewe mi amomolo o amomoto lon ewe fel. A pwal oturalo ekkewe chepel an chon siwili moni, o pwal ekkewe leenien mot an chon amomo lisom. Ese pwal mut ngeni emon pwe epwe uwei och lon ewe fel.” Ren an apwungu ekkewe chon foffor-mwaal, a apasa: “Ese mwo makketiu pwe ‘Imwei epwe iteni imwen iotek ren einang meinisin’? Nge ami oua fori ussun chok leenien chon sola.”—Mark 11:15-17.
8 An Jises kewe foffor ra ussun chok minne a fori ulungat ier lom lupwen a tori ewe imwen fel lon fansoun ewe Pasofer 30 C. E. Iwe nge, lon ei fansoun, a choulo an we kapasen apwung. A eita ngeni ekkewe chon amomo lon ewe imwen fel “chon sola.” (Luk 19:45, 46; Jon 2:13-16) A ina ussur pun ra awattei liwinin ekkewe man aramas repwe moni fan iten ekkewe asor. Ekkewe samol-fel lapalap, ekkewe soumak, pwal ekkewe meilap ra rongorong ussun minne Jises a fori, iwe, ra pwungupwungsefal pwe repwe nielo i. Iwe nge, rese mwo silei met repwe fori ngeni Jises, pun ekkewe aramas meinisin ra fokkun ingeiti an kkewe afalafal me ra akkauselingoch ngeni.—Mark 11:18; Luk 19:47, 48.
9. Ifa ewe lesen Jises a aiti ngeni aramas, iwe, ifa ewe kapasen etiwatiw a ngeni ekkewe chon auseling lon ewe imwen fel?
9 Atun Jises a sopweilo an afalafal lon ewe imwen fel, a apasa: “A tori ewe fansoun pwe ewe Noun-Aramas epwe kuna lingan.” Ewer, a silei pwe mei wor fitu chok lusun ranin manauan won fonufan. Mwirin an eani awewe won ifa ussun efou foun wit epwe malo fan iten an epwe uwa chommong—a wewe ngeni pwisin an we malo pwe epwe wiliti minne epwe awora ngeni ekkewe ekkoch manau esemuch—Jises a eani eu kapasen etiwatiu ngeni ekkewe chon auseling, iwe, a apasa: “Are emon epwe angang ngeniei, epwe tapweto mwiri, o ikewe ua nonnom ie, nei chon angang epwe pwal nonnom ie. Are emon epwe angang ngeniei, iwe, ewe Sam epwe asamolu i.”—Jon 12:23-26.
10. Met meefien Jises ussun ewe riaffoun malo epwap tori?
10 Ren an ekieki ussun an malo fan riaffou ruanu chok ran mwirin, Jises a sopweilo le apasa: “Iwe, iei nguni a chok mairu, o meeta upwe apasa? ‘Semei, kopwe angasaei seni ei fansoun.” Nge Jises ese tongeni ngaselo seni minne epwe fis ngeni. Iwe, a apasa: “Aap, pun iei popun ai feito ngeni ei fansoun.” Ewer, Jises a tipeeu ngeni unusen an Kot we kokkot. A fokkun mochen pwe letipen Kot epwe nemeni an kkewe foffor tori an we asorun malo. (Jon 12:27) A ifa me watten murinnoon ewe leenien appiru a isetiu mwach—an unusen anomu pwisin i fan letipen Kot!
11. Ikkefa ekkewe afalafal Jises a eani ngeni ewe pwin aramas mi koran rongorong eu mongungu seni lang?
11 Pokiten a watte an lolilen ren ifa ussun an malo epwe kku iten Seman we, Jises a iotek: “Semei, kopwe chok alinga itom.” Ewe mwichen aramas mi nonnom lon ewe imwen fel ra fokkun mairu lupwen eu mongungu a feitiu seni lang, iwe, a apasa: “Ua fen alinga, o upwe pwal alingasefalli.” Ewe Sense mi Lapalap a aea ei fansoun pwe epwe esilei ngeni ekkewe aramas ewe popun ra rongorong ewe mongungu, met epwe fis pokiten an malo, me pwata epwe lamot ar repwe anganga ar luku. (Jon 12:28-36) Ekkewe ruu ran ra lo ra ur ren chommong mettoch Jises a fori. Nge eu ran mi fokkun lamot a chuen nom mwan.
Ewe Ran Fan Iten Kapasen Apwung
12. Lon Oruu, Nisan 11, ifa ussun ekkewe nouwisen lamalam ra sotuni Jises, iwe, ifa murinnon?
12 Lon Oruu, Nisan 11, Jises a liwinsefal ngeni ewe imwen fel pwe epwe afalafal. Eu pwin aramas mi oput i ra nonnom ikkewe ie. Ren ar kapas ussun fofforun Jises lon ewe ran me mwan, ewe samol-fel lapalap me ekkewe chinnap ra eisini: “Ren menni sokkun nemenem ka fori ekkeei mettoch? O pwal io a ngonuk ei sokkun nemenem?” Ewe Sense mi lapalap a osukosuker ren poluan, iwe, a ngenir ulungat kapas monomon—ruu ussun eu atake me eu ussun eu kametipen apupulu—mi pwarata ifa ukukuun ngauen ekkewe chon u ngeni. Iwe, pokiten ar lingeringer ren minne ra rong, ekkewe nouwisen lamalam ra mochen supuri. Nge ra niuokkusiti ekkewe aramas, pun ra chok luku pwe Jises emon soufos. Ina minne ra sotun asera pwe epwe apasa minne repwe tongeni aresini ren. Iwe nge, rese tongeni apasa och ren poluen Jises.—Mattu 21:23–22:46.
13. Ifa ewe kapasen emmwen Jises a ngeni ekkewe chon auseling ussun ekkewe soumak me Farisi?
13 Pokiten ekkewe soumak me Farisi ra ita wisen asukula aramas ussun an Kot we Alluk, Jises a pesei ekkewe mi auseling ngeni: “Iwe, mettoch meinisin minne ra erenikemi oupwe chok fori o tumunu, nge ousap fori ussun ar foffor, pun ra chok kapas nge rese fori.” (Mattu 23:1-3) Met ren pochokkulen an apwungur mwen mesen aramas! Nge Jises esaamwo wes. Iei ewe amuchuloon ran an epwe nom lon ewe imwen fel, iwe, a pworacho le eani fitu kapasen apwung—eu me eu ussun chok fitu chopulap.
14, 15. Ikkefa an Jises kkewe kapasen apwung ngeni ekkewe soumak me Farisi?
14 Fan wonu Jises a apasa: “Riaffou ngenikemi soumak me Farisi, likotuputup ami!” Ussun Jises a awewei, a ina ussur pun ra apungalo ewe Muun lang seni aramas, iwe, rese mut ngeni ir kkewe mi mochen tolong ar repwe tolong. Ekkeei chon likotupotup ra pwellifeil won matau me fonu pwe repwe awili aramas, nge ra chok emmwenir ngeni kiteter. Ren ar likitalo “ekkewe mettoch mi lamot lon ewe alluk, pwung, umoumoch, o luku,” ra alamota an aramas asoresini eu-na-aengolun peioffur. Ussun ita nge ra limeti “lukun kap me sepi, nge lon ra uren sola me mocheisou,” weween, a limengau letiper inaamwo ika me lukun, repwe lapalapeni lapalapen aramas mi pin. Pwal eu, ra aueta me alingalo leenien peiasin ekkewe soufos pwe aramas repwe ingeiti ar kkewe foffor-murinno, nge fen ir chon “upun won chon nielo soufos.”—Mattu 23:13-15, 23-31.
15 Ren an epwe apungu an ekkewe chon oput osupwang lon pekin ngun, Jises a apasa: “Riaffou ngenikemi, chon emmweni mi chun.” Ra mesechun lon minne mi pwung pun ra alamota ewe kolt lon ewe imwen fel lap seni aucheaan ena leenien fel lon pekin ngun. Iwe, a sopweilo an kapasen apwung mi chou. A apasa: “Ami serpent, ami noun serpent, epwe ifa ussun ami su seni ewe kapwungun Keena?” Ewer, Jises a erenir pwe pokiten ar aleni ena alen ngau, repwe kuna kiteter esemuch. (Mattu 23:22, 33) Iwe, amwo sipwe pwal pworacho le afalafala porausen ewe Muu, pwal mwo nge lupwen ach sipwe apwungu lamalam chofona.
16. Ifa ewe oesini mi fokkun lamot Jises a ngeni noun kkewe chon kaeo atun ra mommot won ewe Chuukun Olif?
16 Iei Jises a tou seni ewe imwen fel. Lekuniolun ewe ran, ir me noun kkewe aposel ra feita ngeni ewe Chuukun Olif. Atun ra mommot ikkewe ie, Jises a oesini ussun kiteterin ewe imwen fel me esissinen an nonnom me sopwolon ekkewe ototen mettoch. Lamoten ekkena kapasen oesini a pwal tori ach ei fansoun. Lekuniolun ena ran, Jises a pwal ereni noun kkewe chon kaeo: “Oua silei pwe mwirin ruu ran epwe fis ewe Pasofer, o ewe Noun-Aramas epwe kuna otutur pwe repwe nielo.”—Mattu 24:1-14; 26:1, 2.
Jises a ‘Tongei Pwisin Noun Kkewe tori Le Sopolon’
17. (a) Atun a fis ewe Pasofer, Nisan 14, ifa ewe lesen Jises a aiti ngeni ekkewe 12? (b) Ifa ewe achechem Jises a poputani mwirin an asulo Jutas Iskariot?
17 Lon ekkewe ruu ran mwirin—Nisan 12 me 13—Jises ese tolong lon ewe imwen fel. Ekkewe nouwisen lamalam ra kutta manauan, iwe, ese mochen och mettoch epwe eppeti an epwe eti noun kkewe aposel le eani ewe Pasofer. Iwe, Nisan 14 a poputa ren tuputiuen ewe akkar lon Aruanu—ewe amuchuloon ranin manauen Jises won fonufan ussun emon aramas. Lon na pwinin, Jises me noun kkewe aposel ra nonnomfengen lon eu imw lon Jerusalem, ikkewe ra fen mmolneta fan iten ar repwe eani ewe Pasofer ie. Atun ra aeafengenni ewe Pasofer, a aiti ngeni ekkewe engol-me-ruuemon eu lesenin tipetekison mi amwarar ren an tolu pecher. Mwirin an atou Jutas Iskariot, atewe mi fen tipeeu ngeni an epwe afangema noun we Masta fan iten 30 moni silfer—liwinin emon chon angang me ren ewe Allukun Moses—Jises a poputaani Achechemenien an we malo.—Ekistos 21:32; Mattu 26:14, 15, 26-29; Jon 13:2-30.
18. Ren tong, ifa pwal eu lesen Jises a ngeni noun kkewe 11 aposel mi tuppwol, iwe, ifa ussun a allisir le mmolneta ngeni ewe fansoun esap chuen nom rer?
18 Mwirin an Jises poputani ewe Achechem, ekkewe aposel ra aninifengen won io leir mi lapalap. Jises ese kapas pochokkul ngenir, nge fan mosonoson, a aiti ngenir lamoten ar repwe angang ngeni ekkewe ekkoch. Pokiten an aucheani ar pache ngeni fan an kkewe sossot, a fori pwisin an pwon ngenir fan iten eu muu. (Luk 22:24-30) Jises a pwal alluku ngenir ar repwe tongfengen lefiler ussun chok an a tongei ir. (Jon 13:34) Iwe, atun ra nonnomfengen lon ena ruum, Jises a alisir le ammolnata pun ekiselo chok, nge esap chuen nom rer. A alukuluku ngenir pwe i chiener, a peser ar repwe anganga ar luku, me a pwon ngenir alillisin ewe ngun mi fel. (Jon 14:1-17; 15:15) Me mwen an epwe tou seni ewe imw, Jises a iotek ngeni Seman we: “Semei, ewe fansoun a tori. Kopwe chok alingalo noum ei, pwe ewe Nau epwe alinga en.” Pwungun pwe Jises a ammolnata ekkewe aposel fan iten an feilo senir, iwe, a wesewesen ‘tongei ir tori le sopolon.’—Jon 13:1; 17:1.
19. Pwata a watte an Jises osukosuk lon ewe leeni itan Ketsemeni?
19 Eni a fen lu seni lukenipwin lupwen Jises me noun kkewe 11 aposel mi tuppwol ra tori ewe leeni itan Ketsemeni. Ir fengen me noun kkewe aposel ra fen feilo ikkewe ie fan chommong. (Jon 18:1, 2) Mwirin fitu chok aua, Jises epwe ninnilo ussun chok emon chon atai alluk mi fokkun ngau. Pokiten an weires chapur ren met epwe fis ngeni me ifa ussun epwe tongeni aitengaua iten Seman we, atun Jises a iotek, pwichin a suputiu won pwul ussun chok supusupun chcha. (Luk 22:41-44) Jises a ereni noun kkewe aposel: “A tori ewe fansoun. Nengeni, atewe mi afangemaei a arapoto.” Iwe, lupwen a chuen kapas, Jutas Iskariot a feilo ren, eti eu pwin aramas mi chommong mi uwei ekkewe lamp me pisekin maun. Ra feito pwe repwe aresini Jises. Iwe, Jises ese u ngenir. A awewei: “Nge ifa ussun pwonuetaan makken ekkewe puk pwe epwe chok iei ussun?”—Mark 14:41-43; Mattu 26:48-54.
A Lingelo ewe Noun Aramas!
20. (a) Ikkefa ekkewe riaffou a tori Jises mwirin an ares? (b) Fitu chok minich me mwen an epwe malo, pwata Jises a puchor: “A wes”?
20 Mwirin an ares, ekkoch ra tipimwaal ngeni, ekkoch soukapwung mi apap ra apungu pwe a tipis, Pontius Pailat a apungu met epwe fis ngeni, ekkewe samol fel me ewe pwin aramas ra esiita, me ekkewe sounfiu ra turunufasei me eriaffoua. (Mark 14:53-65; 15:1, 15; Jon 19:1-3) Atun a tori leonowasen Animu, Jises a fen chufolueta won ewe iraan ninni me kuna watten metek atun choun inisin a awattei kilasen poun me pechen kkewe ren ewe chufol. (Jon 19:17, 18) Orun kulok ulungat mwirin leonowas, Jises a pupuchor: “A wes!” Ewer, a unusen apwonueta minne a feitiu fonufan pwe epwe fori. A likiti ngeni Kot ngunun we, iwe, a pworetiu mokuran me malo. (Jon 19:28, 30; Mattu 27:45, 46; Luk 23:46) Lon ewe aulungatin ran mwirin, Jiowa a amanauasefallita Noun we. (Mark 16:1-6) Faik ran mwirin an manausefal, Jises a feita lang me lingelo.—Jon 17:5; Foffor 1:3, 9-12; Filipai 2:8-11.
21 Epwe ifa ussun sipwe ‘tapweilo mwirin lon ipwen Jises kewe’? (1 Piter 2:21) Ussun chok i, sipwe akkachocho ngeni lon ewe angangen afalafal me foralo chon kaeo, iwe, sipwe pwal pworacho le apasaou ewe kapasen Kot. (Mattu 24:14; 28:19, 20; Foffor 4:29-31; Filipai 1:14) Sisap monuki ia sia nonnom ie lon ei fansoun are tumunungaua ach apochokkula emon me emon lefilach lon tong me foffor-murinno. (Mark 13:28-33; Ipru 10:24, 25) Sipwe mut ngeni letipen Jiowa me ach silei pwe sia nonnom lon “ewe ranin le sopwolon” an epwe unusen nemeni alen manauach.—Taniel 12:4.
Ifa Ussun Kopwe Polueni?
• Ifa ussun an Jises silei pwe a arapoto an we fansoun malo a kku an amuchuloon angangen afalafal lon ewe imwen fel lon Jerusalem?
• Met a pwarata pwe Jises a ‘tongei pwisin noun kkewe tori le sopolon’?
• Met an Jises kkewe foffor lon ekkewe fitu aua me mwen an we malo ra pwarata ussun i?
• Ifa ussun sipwe tongeni appiru Kraist Jises lon ach angangen afalafal?
21. Ifa ussun sipwe tongeni appiru Jises?
[Picture on page 14]
Jises “a tongei ir tori le sopolon”