Pwapwa Esemuch Lon Lang Are Won Fonufan?

OM pwapwa a akkaewin longolong won ikewe ka nonnom ie? A lap me lein aramas repwe apasa pwe pwapwa a kan longolong won ar meefi pochokkul, ar meefi pwe mi auchea manauer, me ar chiechioch ngeni aramas. Iei alon eu mwiitun lon Paipel: “A murina ach mongofengen iasai, nge mi wor tong lefilach, lap seni ach ochochfengen fituken kow mi kiris, nge mi wor koput lefilach.”​—An Salomon Fos 15:17.

Iwe nge, a eu minen aletipechou pwe leeniach, ei fonufan, a fen ur ren oput, foffor mi mwanesol, me chommong sokkun fofforingau seni chok lom lom. Nge a ifa ussun lang, are ewe leenien ngun, ikewe chommong aramas ra aneanei ar repwe feilo ie mwirin ar malo? Ita ina eu leenien chengel me kinamwe fansoun meinisin, me ita ese fokkun wor och fitikoko ie, ussun chommong ra ekieki?

Ewe Paipel a apasa pwe Kot a nonnom lang fitifengen me fite milion ngun mi iteni chonlang. (Mattu 18:10; Pwarata 5:​11) Paipel a apasa pwe ir ngun, “noun Kot kewe.” (Hiop 38:​4, 7) Ussun chok aramas, ekkewe chonlang ra tufichin pwisin nemeni fofforur, nge sap minne ir mi ussun ekkan mwesin. Ina minne, repwe pwal tongeni filata pwe repwe fori minne mi pwung are minne mi mwaal. Ekkewe chonlang repwe ita filata ar repwe fori minne mi mwaal? Eli ekkoch repwe mairu ren ar silei pwe fite ngerou ier lom, chommong chonlang ra tipis ngeni Kot​—weween, ra u ngeni i!​—Juta 6.

Chon U ngeni Kot lon Lang

Tipis a fisita lon ewe leenien ngun pokiten an emon chonlang u ngeni Kot, iwe, ena emon a iteni Setan (Chon U Ngeni) me Tefil (Chon Pweni). Ena chonlang mi alleasochis me lom a pwisin filata an epwe fori minne mi mwaal. Mwirin, a wiliiti eu minen angaua pwal fitemon ngun, ina minne, lupwen a tori fansoun Noa, nge mwen ewe Noter, chommong leir ra fiti Setan le u ngeni Kot.​—Keneses 6:2; 2 Peter 2:4.

Ekkena chonlang mi ttur rese muttir katowu seni lang. Nge, mi mumuta ngeniir ren fite ngerou ier ar repwe ekketta ikewe ie, nge neman a wor mettoch mi pinepin seniir. Iwe nge, lupwen a much ewe fansoun Kot a mutata ngeniir, ra “koturutiu” seni lang, iwe, lo, lo, repwe nninniilo. Iwe, eu mongungu lon lang a apasa, “Iei minne, oupwe pwapwa, ami kena lang, o pwal ami kena mi nonnom lon ir!” (Pwarata 12:​7-​12) Neman ekkewe chonlang mi tuppwol ra mwanek pokiten an ese chuen nom lon lang ekkena chon efisata fitikoko!

Lupwen sia nengeni ekkena poraus ese lien sinnelo lein aramas, a ffat pwe esap tongeni wor kinamwe mi enlet iteiten fansoun meinisin lupwen forien Kot kewe mi mirit repwe tunalo an Kot kewe alluk me emmwen. (Aisea 57:​20, 21; Jeremaia 14:​19, 20) Iwe nge, lupwen meinisin repwe alleasochisi allukun Kot, kinamwe me lukulukoch epwe choufetal. (Kol Fel 119:165; Aisea 48:​17, 18) Iwe, ika aramas meinisin repwe tongei me alleasochisi Kot me pwarata tong lefiler, esap weween pwe fonufan epwe eu leeni mi enletin ammeseik me pwapwa? Ewe Paipel a apasa ewer!

Nge ifa ussun ir kewe rese mochen aukatiu ar kewe foffor mi ngau? Repwe ita atai tori feilfeilo chok kinamween ir mi enletin mochen fori letipen Kot? Aapw, pun Kot a apwungu ekkewe chonlang mi ngau lon lang, iwe, epwe pwal apwungu ekkewe aramas mi ngau won fonufan.

Eu Fonufan mi Alimelim

Kot a apasa pwe “Lang ai lenien mot, nge fanufan lenien puun pechei.” (Aisea 66:⁠1) Pokiten Kot a unusen fel, esap mut ngeni “lenien puun pechen” an epwe ngauolo ren fofforingau tori feilfeilo chok. (Aisea 6:​1-3; Pwarata 4:⁠8) Ussun chok an limetawu seni lang ekkewe ngun mi ngau, epwe pwal ina ussun an epwe amoielo seni fonufan aramas mi ngau meinisin, ussun an a ffatolo ren ekkan wokisin seni Paipel mi mak fan:

“Pun epwe poku ir ekkewe mi ingau; nge ekkewe ra witi ewe SAMOL repwe fonueni ewe fonu.”​—Kol Fel 37:9.

“Pun ekewe chon pwung repwe fanueni ewe fanu, pwal ekewe aramas mi wenechar repwe nonom lon. Nge ekewe aramasangau repwe karila seni ewe fanu, pwal chokewe resap allukuluk repwe uttuta seni me lon, usun ira ra uttuta seni pwul.”​—An Salomon Fos 2:​21, 22.

“Iwe, fonufan [aramas mi ngau] epwe morelo, o pwal an kewe mocheniangau; nge i mi fori letipen Kot epwe nonnom feilfeilo chok.”​—1 Jon 2:​17.

Fonufan epwe Kinamwefocholo?

Inaamwo ika Paipel a affata pwe mi kauk an Kot mutata fofforingau, nge ifa ussun sipwe tongeni wesewesen luku pwe ika mettoch mi ngau epwe morolo, esap chuen liwinsefal? Popun, pun ekiselo mwirin ewe Noter lon ranin Noa we, fofforingau a pwal pwukutasefal me a kon lapalo, ina minne, Kot a eppeti an aramas kewe ekiek mi ngau ren an afitikokoi ar fos.​—Keneses 11:​1-8.

Sia akkaewin luku pwe mettoch mi ngau esap chuen pwukutasefal pun fonufan esap chuen nom fan nemenien aramas pwe iwe a poputasefal an aramas nemenem ekiselo mwirin ewe Noter. Nge fonufan epwe nom fan nemenien an Kot we Muu. Ena Muu epwe nemenem seni lang, iwe, ina ewe eu chok muu epwe nemeni fonufan. (Taniel 2:​44; 7:​13, 14) Epwe muttir apwungu emon ika epwe sotun popuetasefalli mettoch mi ngau. (Aisea 65:20) Mi enlet pwe ena muu epwe nnielo ewe emon mi poputani mettoch mi ngau​—weween, Setan ewe Tefil​—fitifengen me ekkewe timon, nge ikkeei ir ekkewe chonlang mi ngau mi appiru i.​—Rom 16:20.

Ewe Popun Ekkoch repwe Feita Lang

Iwe nge, chommong chon alleani Paipel ra silei alon Jises ei: “Mi chommong rum lon imwen Semei. . . . Ua feilo ammolata leeniemi.” (Jon 14:​2, 3) Alon na ese ita appolua ewe ekiekin manau esemuch lon eu paratis won fonufan?

Sap minne ra ufengen ekkena afalafal. Nge, mi enlet pwe ra tipeeufengen. Akkom, ewe Paipel a apasa pwe mi kauk nampaan ekkewe chon Kraist mi tuppwol repwe manaueta lon pekin ngun pwe repwe manau lon lang​—weween, ukuukur a 144,000. Met popun ra angei liwinir na mi amwarar? Popun, pun ir chon ewe mwich Jon a kuna lon eu langepwi, iwe, ra “manausefallita, o ra eti Kraist le nemeni ukukun engerou ier. (Pwarata 14:​1, 3; 20:​4-6) Ika sipwe apopofengenni ekkewe 144,000 me ekkewe fite bilion aramas won fonufan, mi enlet pwe ir eu “mwich kisikis.”​—⁠Luk 12:32.

Iei Filiach​—Manau are Malo

Met sipwe fori ren ach sipwe angei ewe feiochun ach sipwe manau tori feilfeilo chok lon Paratis won fonufan? Aewin, sipwe kaeo an Kot we Kapas, ewe Paipel mi Fel. Lon an we iotek, Jises a apasa pwe “Iei ewe manau esemuch, pwe repwe silei en, ewe emon chok Kot mi enlet, pwal Jises Kraist ewe ka akunooto.”​—Jon 17:3.

Ach akkapwonueta minne sia kakkaeo, iei pwal eu foffor epwe emmwen ngeni pwapwa esemuch. (Jemes 1:​22-​24) Ekkewe mi akkapwonueta ewe Kapasen Kot lon manauer ra eani ewe apilukulukun ar repwe kuna fonufan an epwe wiliiti eu Paratis, ussun ewe Paipel a fen pwonei.